Pathau mikva saong taong abih gauk! Hu sa baoh baha Khmer Nam tôngdaok  di jalan Mạc Đĩnh Chi, phường An Cư, quận Ninh Kiều, ban Cần Thơ yaok harei oh lac labik tu bac di dom sư sãi bo ini daok lac labik piah dom sinh viên kan kathaot kham merat bac daa, kham merat yam tapa thar vak piah salih barau rai diuk meng jalan bac daa dalam bruk daong ba, anit ranam di labik baha. Nan lac baha Pitu Khôsa răng Sây daok ieu lac baha Viễn Quang. Labik hu ralo bruk ngak daong ka urang kan kathaot, sinh viên saong dom anek saih tame bilan pakacah… Kadha vak di Hữu Trãi, urang vak di rayo sap ndom VN daok di bhum taneran kraong Cửu Long:

Daok kandauk dalam hẻm jalan Mạc Đĩnh Chi, phường An Cư, quận Ninh Kiều,  yaom lac mblang bein di baha oh laneng lanoi yau dom baha khmer phật giáo nam tông di bhum taneran kraong Cửu Long min labik ini khu chánh điện hu padang ngak praong, siam dalam mblang bein joa lange piah dom ong bhik tu bac. Jeng dalam mblang bein ini, sa ký túc xá brei ka dom adei sinh viên ngan saong talei kha-gaiy ndih 2 tal hu padang ngak siam taphia chánh điện lac labik piah sinh viên bac daa.

Adei Kim Thanh Lâm,  sinh viên thun ka sa tal Dược B K41 đại học y dược ban Cần Thơ palei daok di huyện Trà Cú, tỉnh Trà Vinh brei thau, sang kan kandah, ame njauk ruak gila, amaik ngak công nhân công ty takhaok klik Mỹ Phong. Thau lac sang adei kan kandah nan ye ong bhik daok di baha dalam palei payua, nan ye adei hu Thượng tọa Lý Hùng,  sư cả baha Pitu Khôsa Răng Sây di Cần Thơ taduan panuac brei daok trọ piah nao bac. Adei Kim Thanh Lâm brei thau:

“Adei biak bui sambai tuk hu sư brei daok di baha saong kuhria điện, ia, lisei piah adei hu điều kiện bac siam jang. Meyah oh hu bac di labik ini ye bruk bac di adei njauk padeih. Meyah daok sang trọ jeng oh hu điều kiện”.

Jeng hu thar vak yau nan hu adei Danh Đạt Minh, lac sinh viên thun ka 3 gah xây dựng, đại học cần thơ, palei daok di huyện Hòa Bình, tỉnh Bạc Liêu. Lac sang ngak nông kan kathaot, tuk mehit lac trúng tuyển đại học, sang adei biak duh hatai kayua oh hu jien brei ka anek nao mbang bac di Cần Thơ. Thau hu bruk kan kandah, Thượng Tọa Lý Hùng hu taduan brei adei daok dalam baha dalam luac tukvak bac daa. Meng nan bo bruk bac   da-a oh klaih klaoh.

“Sư labik ini daong ka adei biak ralo, nan ye adei abih biak takik jien mbang, daok, jien điện, ia jien sang trọ jeng yau dom janih jien karei. Meyah oh hu baha brei daok ye bruk bac daa di adei njauk klaih klaoh atau padeih bac”

Dua adei angaok nan daok dalam labaih 600 sinh viên gaok kan kandah di dom tỉnh dalam bhum taneran kraong Cửu Long, hu thượng tọa Lý Hùng daong ba meng dahlau tal urak ini.

Thượng tọa Lý Hùng khan lac: Dahlau daih dahlak jeng gaok kan kandah tuk nao bac, hu bruk sangka daong ba di hòa thượng, mban quản trị baha daong bac daa. Kayua yau nan ye dahlak khin bayar dhar phon  veik ka dom urang urang hu daong drei nan ye dahlak brei sinh viên daok di baha.

 “Mboh raidiuk bhap bini bangsa khmer dalam dom thun dahlau biak kan kandah. Ong muk, amaik ame bhian duh hatai ka bruk bac daa di dom adei. Dom adei takre bac min sang kan kathaot oh hu jien brei ka dom adei bac hu đại học. Meng hatai anit ranam nan, drei khin bayar dhar phon dom urang hu daong drei nan ye drei brei sinh viên kan kathaot daok di baha”.

Meng thun 1996 tal urak ini, yaok thun thượng tọa taduan raong dalam baha 50 sinh viên likei daok bac di dom sang bac đại học, daong bruk mbang, daok, dom pandap sinh hoạt. Tanut piah hu taduan lac sang kan kathaot, salut mbut, tari tarieng.

Thượng tọa Lý Hùng brei thau, dom thun camereip daok kan kandah, baha tok brei dom adei daok dalam mblang bein sit, giniuk, hadei di nan meng hu padang ký túc xá piah dom adei daok hu laneng lanoi jang, tal urak ini labik ký túc xá taduan meng 40 tal 60 sinh viên saong tăng sinh daok yaok thun. 

Taong yaom ka bruk ngak di thượng tọa Lý Hùng. Ong lý Xinh – akaok mban bangsa Cần Thơ lac: “thượng tọa Lý Hùng lac kreih camin hadah ka phẩm hạnh, hatai siam, anit ranam ka urang”. Baha oh lac labik daong sinh viên kan kathaot bo daok pato pakai đạo đức, ilamu, pato akhar khmer ka dom adei. Abih di nyu nan lac, yaok thun baha daok jak ba jien padai, alin jien bac ka sinh viên kan kathaot, rik pataom jien daong ka urang kan kathaot, padang ngak jalan mbak di ralo labik di dom tỉnh dalam bhum taneran kraong Cửu Long. Abih tih jien ka bruk ngak XH meng dahlau tal ini labaih 1 tỉ đồng.

 “Dahlak biak pok meyaom lac gam saong bruk di agama ye thượng tọa Lý Hùng biak kham merat dalam bruk ngak pahala, jak ba mikva phật tử rik pren tame daong ka bhap bini kan kathaot. Thượng tọa biak sangka tal gah patao megru ka mikva kan kathaot, anek kamuan di drei oh hu jien nao bac ye thượng tọa jeng jak ba jien, pandap panda brei ka dom adei nao bac”.

Urak ini, ký túc xá di sinh viên baha Pitu Khôsa Răng Sây hu talei sang praong jaik 300 m2 ngan saong dom talei kha-gaiy tani tanat, angaok akaok yaok kha-gaiy lac bàn bac gam saong kệ tapuk saong gum. Dalam baoh sang hong gauk ini, thượng tọa Lý Hùng iek dom sinh viên yau dom urang anek, iek glang, patao pakai dom adei diuk rai siam meng panuac pato pakai jeng yau ba dom adei tame dom bruk ngak pahala di baha. Meng tuk daong sinh viên kan kathaot tal urak ini, thượng tọa Lý Hùng hu daong yaok rituh sinh viên hu nao bac daa saong yaok ribau anek saih mai daok cang pakacah dom mbang pakacah tame đại học. Hu biak ralo sinh viên bac tamat jeng menuac jeng urang, mai ngak bruk di puk palei saong mai daong jien padai ka baha piah daong ka dom sinh viên hu nao bac daa./.