Oh lac dok tapen gauk dalam mesruh metak, tal tuk taneh ia hu sron mbon,  mai veik puk palei, dom urang dahlau deih ngak bol lin daok thau jum patom gauk iek glang rai duik, patagok kinh tế. Song bruk “boh sang đồng đội” di kapul urang dahlau deih ngak bol lin tỉnh Sóc Trăng hu mong lac sa dalam dom labik hadah krah dalam bruk rik dong ka Đảng song karja peih ngak dom sarak bayar dar phol, iek glang ka urang buh pren yava ka CM. Kadha vak di Thạch Hồng, urang vak di rayo sap ndom VN bhum taneran kraong CL di huyện Kế Sách, sa dalam dom labik padang ngak hu rilo “boh sang đồng đội” di tỉnh Sóc Trăng.

Taduan khol lin dalam boh sang bahrau hu padang bloh dom harei ni, cei Kim Bên song anai Lâm Thị Dần, dua duik pasang urang dahlau deih ngak bol lin dok di palei Bồ Đề, xã Kế Thành, huyện Kế Sách  bui sambai khan lac: Dahlau deih rai duik kan kandah, pala li-u, rong hasit menuk, ada piah duah jien diuk tapa harei, nan ye ndih lipei jeng oh mboh lac drei hu sa boh sang siam mekre yau harei ni. Cei Kim Bên brei thau, dahlau deih, boh sang hala taik tahak njauk apui mbang abih. Hu kapul urang dahlau deih ngak bol lin huyện Kế Sách dong padang ngak sang bahrau ni, nan ye dua duik pasang biak uan tabuan. Cei Bên drut droi brei thau: Hu kapul urang dahlau deih ngak bol lin huyện, kapul urang dahlau deih ngak bol lin xã dong ka hulin hu boh sang, hulin uan tabuan lô. Dahlau deih boh sang hulin lac sang hala, oh hu hagait bo dok njauk apui mbang.. Urak ni hu sang ini uan tabuan lô.

Dreih yau cei Kim Bên hu urang dahlau deih ngak bol lin angan Nguyễn Văn Sol, dok di palei  An Ninh 2, ban sit Kế Sách. Hadei di rilo thun rambah rambeip nao ngak mbang pah di rilo labik, min kan kathaot jeng daok tui gam. Urak ni hu sang bahrau “Boh sang đồng đội” piah salih ka sang klak taik tahak, rai duik hu tani tanat jang. Cei Sol ndom lac, adei saai đồng chí, đồng đội hu brei ka ong hu labik daok siam mekre yau ni.    Dahlau deih sang hulin biak kan kandah ka sang dok, nyu taik tahak, lingik hajan ye mek cao su pacang veik. Bloh adei saai mboh rambah yau nan, adei saai urang dahlau deih ngak bol lin dong brei boh sang. Bui sambai, uan tabuan lô thau ndom hagait.       

Dua boh sang nan hu kapul urang dahlau deih ngak bol lin huyện Kế Sách padang dalam thun ni, meng kadung jien “boh sang đồng đội” hu dom urang dalam kapul rik pataom dalam thun ni, piah dong ka urang dalam kapul urang dahlau deih ngak bol lin kan kandah ka sang dok, daong klah rabha cuang kandah di đồng chí, đồng đội piah yam tagok dalam rai duik.

Tui Kapul urang dahlau deih ngak bol lin huyện Kế Sách, bruk padang boh sang đồng đội hu peih tabiak meng thun 2010, tal urak ni hu 5 thun. Piah ka bruk ni hu siam lagaih, Kapul hu jak ba padang kadung jien “Boh sang đồng đội”, yaok urang dalam kapul yaok thun rik tame meng 20 ribau đồng tagok piah padang meng 2 tal 3 boh sang yaok thun, song yaok boh sang hu dong 20 triệu đồng ka dom urang dalam kapul urang dahlau deih ngak bol lin kan kandah ka sang dok. Taeng dalam thun ni, yaom dong hu tagok 25 triệu đồng yaok boh sang. Urak ni, hu 11 boh sang hu padang ngak bloh, tui yaom jien abih tih labaih 300 triệu đồng. Cei  Lê Danh Định, Ủy viên thường vụ Kapul urang dahlau deih ngak bol lin huyện Kế Sách brei thau: Yaok sa boh sang hu padang bloh, ba tame daok, urang dalam kapul biak chreih chrai bui sambai, yaom lac pok jien dong hu takik. Meng nan hu huyện ủy, UB, ban dân vận jia tame, Kapul urang dahlau deih ngak bol lin huyện Kế Sách tacei brei patui bruk padang ngak sang đồng đội ka urang dalam kapul urang dahlau deih ngak bol lin, dong patruh eik patrun kathaot dalam puk palei, pachreih gauk patagok KT boh sang.   

 “Boh sang đồng đội” di kapul urang dahlau deih ngak bol lin huyện Kế Sách lac sa bruk ngak siam mekre ndung bak hatai anit ranam đồng đội, đồng chí di dom urang dahlau deih ngak bol lin. Meng bruk ngak ni nyu pachreih hu bruk sangka di rilo mban ngành, kapul nyaom saong samar pambak praong tal dom puk palei karei karei dalam tỉnh. Ni jeng lac jalan piah Kapul urang dahlau deih ngak bol lin tỉnh Sóc Trăng rik pren haong Đảng karja, pasiam sang taik tahak ka urang dalam kapul urang dahlau deih ngak bol lin./.