Dom panuac kakei, dom thaot binguk atau tok lac điểm 9, điểm 10 di ranaih sit meng sang di urang lin tasik tuk halei jeng pabak pren khang ka urang lin sahanang hatai siam bruk di akaok riyak jhung angin. Dom urang diuk di dom urang lin daok di pulao tuk halei jeng khang kadang jang rilo mbang tuk kuhria abih bruk sang piah daong ka pasang hu sahnang hatai harei melam kajap tangin phao, khik caga chủ quyền, puk paga, palei negar.

 Tuk taduan panuac ngak diuk di urang lin, sa-ai Phan Thị Liễu, daok pak huyện Thanh Trì, Hà Nội hu pasang lac Lê Xuân Hoàng daok ngak bruk pak bhum 4 Hải quân, hu thau lac tukvak sa-ai daok taphia gauk oh hu hadom. Glaih glar, kan kandah, min sa-ai jeng ngak siam taong abih bruk sang piah ka pasang likei sahanang hatai nao ngak bruk. Melam halei jeng yau nan, dua anek maik tok caong tal tuk điện thoại merao jeng lac tuk dom urang dalam sang hu taom gaok gauk. Panuac sua tangi, pachreih ba yaom lac katut panak, min ndung bak hatai anit ranam, nyu daong pabak pren khang ka urang lin Lê Xuân Hoàng gam haong đồng đội kham merat ngak siam bruk khik caga chủ quyền taneh ia. Sa-ai Phan Thị Liễu khan lac: Anek tuk halei jeng tangi sua duah ame, min ame oh daok di sang nan ye amaik jeng langyah brei anek thau lac urak ini ame nao ngak bruk ye anek njauk kham merat bac da-a piah ka amaik klaih glaih glar. Dahlak mboh biak tự hào. Urak ini, drei kham merat taong abih bruk, ngak jeng hậu phương khang kajap piah ka pasang drei sahanang hatai ngak bruk, piah ka palei negar hu sron mbon salamat. Kayua bruk ngak di pasang drei biak prong glaong.

Kayua ngak bruk pak pulao atah, dom urang lin tasik pulao takik hu  mbaok di sang, takik hu iek glang anek bhik di drei. Yaom lac dom urang anek di dom lin tasik pulao bhian kurang tình cảm di ame min dom adei tuk halei jeng tự hào saong kham merat bac da-a naih joi. Adei Nguyễn Thị Hải Yến anek saih tal 12 sang bac THPT Thạch Thất, hu ame lac Nguyễn Thành Chung daok ngak bruk pal Lữ đoàn 469. Ndom meyai haong khaol dahlak, Hải Yến yaih khan dom janih pandap bo ame alin brei dalam tuk mai rivang sang. Yaom lac pandap giản dị, yau ye dom talei takoi, dhal bingu hu ngak meng baoh bao, kanduh sò min nyu ndung bak hatai ranam di urang ame daok ngak bruk pak pulao kaoh atah bayah: Tuk ame mai sang, ame bhian khan ka bruk di angaok tasik labik ame ngak, blaoh ame brei thau ame hadar anek bhik di drei yau habar, tuk ame hadar ye ame bhian ngak hagait nan ka cadu hatai hadar saong khan veik dom bruk ame ngak yaok harei. Dom pandap uan ka harei menek ame brei, adei caik dalam duk bac di adei piah tuk halei hadar ame ye mek tabiak mong. Adei caong payua tal ame panuac kakei lac, anek khin ame khik pren yava, ngak bruk biak siam. Anek ranam ame. Adei kuhria pakacah tame sang bac Y Hải Phòng. Kayua nan lac labik bo dahlau diah ame hu ngak bruk. Adei kham merat bac da-a biak naih piah ka ame sahanang hatai ngak bruk.        

Haniem phul dalam dom baoh sang sit di urang lin pulao hu raong ba saong prong tagok tui sap klao di uranaih saong dom blah harak meyaom anek saih bac naih jioy tuk bahrau tamat thun bac. Ini lac bruk đền đáp xứng đáng brei ka dom urang amaik – dom urang diuk di urang lin saong daok lac kadha bui sambai di urang lin tasik khang hatai dang anak angin riyak. Tuk halei jeng kanar hadar panuac kakei di ame “Anek njauk kham merat bac da-a, piah hadei ini jeng urang hu kein laba ka xã hội ”, adei Trần Việt Hoàng anek saih tal 7C sang bac  trung học cơ sở Tân Định, quận Hoàng Mai hu ame lac Trần Chung Thông ngak cảnh sát tasik, kham merat bac da-a biak naih jioy piah oh phụ lòng amaik ame. 7 thun gam, Hoàng jeng lac anek saih naih jioy. Ranam amaik, hadar ame, langiu di bruk kham merat bac da-a, Hoàng daok daong bruk ka amaik, piah ame hu sahanang hatai ngak bruk. Adei Trần Việt Hoàng lac:Adei biak hadah mbaok hadah meta hu ame ngak cảnh sát tasik. Piah ngak ka ame bui ye adei kham merat bac da-a. Dalam sang adei daong amek tahanek lisei, pambu khan ao daong amaik ngak dom bruk karei tra. Adei bhian lac haong amaik, amaik leiy kham merat nao, ame nao Trường Sa khik caga taneh ia. Nan lac sa kadha biak tự hào nan ye amaik juai drut druai. Adei caong khin hadei ini adei jeng cảnh sát tasik dreh yau ame piah khik caga taneh ia palei negar.

Yaom lac hu ralo kan kandah dalam rai diuk yaok harei, min dom urang diuk, urang anek miat miat lac hậu phương khang kajap, piah pachreih dom urang jakar, urang lin daok ngak bruk pak labik pulao tasik sahanang hatai ngak siam bruk di drei. Dom blah thư, dom blah thaot binguk nan lac dom talei uan, talei anit ranam ngak jeng niềm tin piah ka urang lin tasik ba abih umo daok ranaih di drei brei ka bruk trường tồn di taneh ia, palei negar./.