Angaok taneh prong jiak 2 ha, dahlau deih, sang amuk Nguyễn Thị Bảy dok di palei  3, xã Tân Thạnh Tây, huyện Củ Chi, pala rilo janih phun min kein liba oh glong. Meng di tuk salih tapa pala bingu lan, rai duik di sang muk hu rilo hadah hadai. Abih di nyu nan lac, meng tuk hu quyết định di Ub bhap bini ban raya HCM  ka bruk pachreih pasalih jalan ngak nong đô thị di ban raya HCM tuk vak 2013-2015, sang amuk Bảy nao meraiy 1 tỷ đồng song yaom liba 12% sa thun, min hu ban raya dong 60% jien liba piah peih prong bruk ngak mbang. Meng jalan ngak ni, dalam 2 thun gam, sang muk Bảy laba hu 1 tỷ đồng yaok thun. Amuk Bảy bui sambai khan lac: 

Hulin mboh bruk pala bingu lan ni, yaom lac drei buh jien tabiak tuk cemereip, min hadei di nan drei pambak prong pajaih tabiak. Langiu ilamu pataom hu tuk drei ngak, drei dok hu Đảng song karja dong. Ngan song dom tal bac megru pabak ilamu pala drak ka mikva, hulin mboh mik va sahnang hatai, oh hu hagait piah duh hatai.

Meng labaih 190 ha taneh pala bingu lan, Củ Chi lac labik pabak labaih 70% janih bingu ni ka darak pasa ban raya HCM. Oh lac di Củ Chi, bruk pala bingu lan jeng hu dong ka yaok rituh boh sang di dom huyện lingiu ban raya hu ginup meda. Yau sang ong Sơn Sarah, bangsa Khơme dok di palei  2, xã Nhơn Đức, huyện Nhà Bè, meng 500 m2 taneh pala bingu lan, nyu ba mai kein liba labaih 60 triệu đồng dalam thun ini. Ong Sơn Sarah lac: 

Hulin lac urang bangsa hu karja puk palei sangka dong. Ndom ka pajaih ye urak ni bein sang hulin hu 2 ribau got lan ye huyện dong brei meteh. Jalan pruh ia tự động yaom 25 triệu đồng drei tok buh tabiak meteh, dok veik huyện dong meteh. Bruk sangka dong di huyện brei ka sang hulin lac biak siam brei ka hulin hu yau harei ni.

Piah pambak prong bruk pala bingu lan dalam dom bhum palei pala bahrau, karja dom huyện yau Củ Chi, Hóc Môn, Nhà Bè, Bình Chánh hu dong pajaih, phun jien, ilamu iek glang ka mik va urang nong. Urak ni mik va thau pandar ilamu pruh ia sương, ngak sang halam piah pala bingu ni. Rilo sang bein jeng hu pambuak bruk haong khu nông nghiệp công nghệ glong ban raya HCM, atau dom DN piah hu ba brei pajaih, ilamu buh khak song pacang caga halak halin. Ông Đỗ Việt Hà, Phó akaok mBan khik iek Khu Nông nghiệp Công nghệ glaong ban raya Hồ Chí Minh brei thau:

Urak ni , Củ Chi dok lac labik pabak pajaih bingu lan prong abih di negar, dalam nan khol hulin pabak yaok thun 2 triệu phun. Piah patagok bruk pala bingu lan jeng sa bruk ngak siam  meng pabak pajaih, pabak vật tư bloh urang nong iek glang, khol hulin daok hu pabak bruk iek glang pren yava ka phun song dom bruk karei karei yau paik bingu, khik piah, sơ chế bloh ba tal siêu thị, ba tal dom cửa hàng pablei salih.

Yaom lac bruk pala bingu lan ba mai kein liba glong, min urang nong brei hu phun jien rilo song hu ilamu kỹ thuật glong. Ni lac dom kan kandah dok hu ban raya HCM langyah dalam tuk vak anak tal. Dự thảo Pathau khan chính trị Nyaom roya pakat Đảng ban raya Hồ Chí Minh mbang ka 10 (tukvak 2015-2020) hu ba tabiak bruk “Pabak sarak dong patagok kinh tế dalam gah ngak nong, patagok bảo hiểm dalam bruk ngak nong, padang dom talei pambuak bruk saong pabak ka bruk ngak nong”. Ong Nguyễn Văn Lưu, Bí thư Huyện ủy - Akaok Ủy ban bhap bini huyện Nhà Bè brei thau:

Urak ni dalam huyện dok peih prong bruk pala bingu lan. Khol hulin dong ka mik va urang nong ilamu kỹ thuật glong, pabak công nghệ sinh học tui jalan nông nghiệp đô thị. Karja dang tabiak pambuak bruk di bhap bini song Doanh nghiệp. Bhap bini hu taneh, hu urang ngak, dok Doanh nghiệp hu pajaih, hu phun jien. Dom urang đầu tư hu tacei pato ilamu kỹ thuật ka mik va song urang blei veik abih ka urang nong. 

Pak dalam thun ni, hu labaih 200 boh sang urang nong di ban raya HCM hu mesraiy yaok pluh tỷ đồng song yaom liba lap piah pala bahrau labaih 60 ha bingu lan. Bruk dong di karja song gah ngak nong ban raya dok dong ka urang pala bingu lan di bhum lingiu ban raya hu ginup meda pak di angaok bhum palei di drei./.