Rilo amaik ame di ban raya HCM kham merat abih drei piah hu mon daong anek bac online

Labaih 1 bilan ini mai, sa-ai Minh Quân daok di ban Thủ Đức biak having akaok tuk gam nao ngak, gam kuhria bruk bac online di 2 urang anek. Sa-ai bahrau mai veik Cty hadei di sa tukvak atah brei pa-atah  di gauk, diuk kumei di sa-ai jeng jar var haong bruk pato bac online nan ye rilo tuk oh rami ramik hu tukvak piah daong ka anek. Hu harei, mon pato laik tame mon kiểm tra di anek min diuk di sa-ai Quân jeng kham merat piah daong ka anek payua bài thi kayua dua anek bac tiểu học, oh ka gheih pandar komputer. Sa-ai Quân duh hatai lac: “Oh njauk lac daok la bac haong anek bo daok hu rilo bruk gam tui, yau ye kuhria bruk mbang menyum, ndih daok, ba tabiak mon bac, atau nộp bài brei ka dom anek. Yaok anek hu 3-4 kapul daong bruk, lac: kapul nộp bài tập, kapul amaik ame, kapul bac sap Anh… dalam tuk sang dahlak hu 2 anek naih. Urak ini anai gru hu brei ka dahlak tame 7 kapul, rilo tuk bài tập anek sit ba meluk tapa kapul di anek praong”.

Daok bruk mbang huak ndih daok di sang sa-ai Ngọc Thuỳ (daok di quận 7) jeng srau kadau tuk hu anek bac online. Sang takik menuac nan ye tuk Cty ieu nao ngak veik di akaok bilan 10, sa-ai Thuỳ likau ngak online veik 2 bilan tra piah hu mon iek glang anek. Tal urak ini, bruk bac di anek daok rilo cuang kandah, jalan internet klaih klaoh, komputer khut, anek oh taom gaok tapak haong gru pato nan ye bac takik thau cambaih, amaik njauk pato veik. Dalam tuk nan, bruk ngak di sa-ai Thuỳ jeng jar var nan ye sa-ai biak glaih glar: “Mesup kham merat medeih ndih aval jang piah ngak lisei ia, pandap mbang, brei anek bac, biar harei anek bac angaok ti vi, hadei di nan drei meng ngak bruk hu. Tapa nan drei takik hu mon huak lisei, ngak bruk sang. Var mesup kuhria ka anek, nan ye bruk hit pataom tame biar harei saong melam.”

Jeng yau rilo amaik ame di ban raya HCM hu anek bac online, sa-ai Huyền Trân (daok di quận 6) brei kham merat abih drei piah hu mon daong anek bac online. Anek bahrau tame tal bac 1, oh ka thau hagait nan ye brei hu bruk daong di amaik ame. Kayua yau nan ye, sa-ai biak caong khin dom sang bac taduan raok dom anek saih tal bac 1, 2 haong anek saih puac pakat mai veik bac da-a. Ini oh njauk lac jalan daong ka amaik ame mbuan suak yava jang tuk mai veik haong bruk ngak, bo daok hu daong ka dom anek naih pasiam labik bac da-a, salih ka bruk pandar jamriak điện tử: “Lingiu di bruk hu nao tal sang bac, bruk hatung hatian, jalan sahneng di dom adei jeng lac biak praong. Dom anek naih padeih bac meng bilan 5 tal ini, nan ye biak caong hu taom gaok gru pato, taom gaok ayut sahabat. Dahlak sahneng lac, bruk hatung hatian, jalan sahneng di dom anek naih jeng njauk hu sangka”.

Tui ong Nguyễn Văn Hiếu, Yam ndok Sở Pato Megru ban raya HCM, bruk nao bac veik brei hu jalan pambuak gauk di dom gah karei taong yaom saong ngak iek. Dom labik pato bac brei khik kajap bruk salamat tuk peih pabah mbang sang bac:“Bruk padang jalan ngak parabha sit mon tal sang bac, kol dahlak daok kuhria brei dom tal bac sit 1, 2 haong tal bac puac pakat lac 6, 9, 12 hu nao bac dahlau. Meng bruk ngak iek peih pabah mbang sang bac di huyện Cần Giờ gam haong ilamu di dua sang bac angaok xã pulao Thạnh An ye anak tal meda peih ngak bruk ini”.

Urak ini, bac online oh daok lac bruk bahrau min meng gru pato tal anek saih saong amaik ame jeng gaok kan kandah rilo gah tuk peih tabiak dalam tukvak atah. Bruk brei ka anek saih mai veik sang bac lac bruk njauk ngak, trun trak damak ka amaik ame, ka gru pato, min brei hu jalan khik kajap salamat tuk jit ruak jeng daok rah tabiak srau kadau./.

Urang lang: M. Phuong – 13/11