Di ban raya Hồ Chí Minh, bruk jak ba “Bhap bini jum pataom dak padang raidiuk ilamu di labik daok” dak harei dak tame dalam, ngan saong dom jalan ngak siam, lagaih, kak kajap talei jum pataom dalam raidiuk di mikva. Kadha vak hadei ini di Kim Dung – urang vak di rayo sap ndom VN daok di ban raya Hồ Chí Minh brei thau dom jalan ngak hadah krah nan. Da-a mikva saong taong abih gauk tui pang:

Khu phố 4, phường Bến Thành, Quận 1 dahlau deih hu rilo canah jalan lac labik pandiak gah an ninh trật tự, labik nyuk ma túy haong kumei me-in, pataom rilo di jalan Nguyễn Thị Minh Khai, Huyền Trân Công Chúa, vil val mblang bein Tao Đàn. Dalam phường daok hu rilo khách sạn, nhà hàng saong saong pablei salih rilo janih. Rilo sang pablei salih sit di labik ini bhian mek takai jalan, dom ngõ, hẻm ngak labik pablei salih. Min dom bruk pablei salih di labik ini jeng khik hu siam mekre, hacih sa-at, khik hu an ninh trật tự... Tui ong Trần Ngọc Quang, Trưởng khu phố 4, phường Bến Thành, Quận 1, piah mek hu angan “Khu phố ilamu” dalam 15 thun gam, karja palei saong mban jak ba tuk halei jeng caik hatai sangka tal raidiuk di bhap bini:

 Gah lingiu mbaok jalan mikva mbuan duah hu jien jang, daok mikva dalam hẻm ye kan kandah jang. Nan ye khu phố sangka daong meng đồng hồ điện, tal đồng hồ ia, bloh ramik ramik labik ka urang pablei salih. Meng nan, dom bruk hagait ba tabiak jeng hu mikva pachreih tui, halan hatian padang khu phố.

Daok khu phố 4, Phường 6, Quận 5, pilih ruah bruk lac khu phố oh hu hareik piah jhul khang bruk jak ba “Bhap bini dak padang raidik ilamu di labik daok”. Tapa dom mbang họp tổ dân phố, mban jak ba khu phố brei ka mikva ba tabiak jalan ngak, eng drei khik caga alam môi trường. Meng nan, dom bruk dak padang raidiuk ilamu jeng hu bhap bini kham merat duah thau, eng drei ngak, eng drei pasang iek. Ong Đinh Văn Thuần, mBan jak ba khu phố 4, phường 6, Quận 5 brei thau:

 Dom tổ dalam khu dân cư jeng hu jak ba bhap bini khik ramik hacih sa-at, pacang caga pui khuah sang, pala phun hijao, khik caga hacih sa-at. Dom baoh sang mikva biak pachreih tui, meng nan bruk jum pataom sang ini haong sang deih biak siam.

Tui ong Nguyễn Thế Trung, Tổ trưởng tổ dân phố 70, Khu phố 4, phường Bến Thành, Quận 1, piah ka bhap bini caik hatai tui pang saong ngak siam tui dom sarak ye yaok urang jakar ngak bruk mặt trận njauk ba akaok nao dahlau:

 Njauk sangka tal bhap bini jang, njauk jak ba, pathau khan, brei ba akaok nao dahlau. Meyah drei dang akaok, bo drei oh ngak siam, oh jum pataom ye ngak habar drei jak ba urang hu, nan ye oh ngak hu bruk ba tabiak.

Gam saong bruk jak ba “Bhap bini jum pataom dak padang raidiuk ilamu di labik daok”, di yaok labik dalam ban raya Hồ Chí Minh, iek tui labik bo hu dom jalan ngak karei di gauk. Dalam nan njauk ndom tal bruk “Kayua ban raya văn minh – hacih sa-at – siam mekre”, padang dom mô hình “Tổ dân phố ilamu”,  “Labik hadah ilamu” hu ngak brei salih bahrau khang dalam bruk pakacah gauk jum pataom dak padang raidiuk ilamu.

Ong Nguyễn Hoàng Năng, Akaok Ủy ban Mặt trận Negar Việt Nam ban raya Hồ Chí Minh brei thau, ủy ban mặt trận dom pakat daok pachreih ngak dom mô hình sáng tạo, pambak praong jalan ngak gheih, kreih camin hadah piah bruk ngak hu tame dalam, hu pambak praong jang dalam bhap bini:

 Kol dahlak daok pamaong tal 2 kadha, ngak habar piah patagok raidiuk di bhap bini tapa bruk patrun baoh sang kathaot, patagok baoh sang ginup meda tui jalan khang kajap, jak ba bhap bini khik ramik, diukrai saong ngak bruk tui hukum negar saong adat hukum, daong paglaong bruk ngak di bhap bini ka nyu siam jang.

Tui bruk “Bhap bini jum pataom dak padang raidiuk ilamu”, urak ini raidiuk mbang ngui daok dang di bhap bini ban raya Hồ Chí Minh hu paglaong mboh di anak meta, ba gauk pakacah dak padang ban raya sioam mekre, ndung bak hatai anit ranam gauk./.