Thủ tướng kakei dom urang ngak gah y tế njauk ba abih pren yava piah pacang cakak jit 

Tui rilo urang ilamu, hadei di rilo kham merat, ban raya hu dom jak jeng njauk pok meyaom tuk camereip dalam bruk pacang caga jit, dom manuac metai takik nao tapa yaok harei. Yau nan min, ban raya njauk salih jalan ngak atah dhua, juai peih bruk dut iek prong dalam, saong duah pataom F0 yau urak ini kayua lac yau nan lahik abih biak rilo jien ndo, suai lavik meda ngak patrun pren yava di kapul nyaom urang y tế. Ban raya tok dut iek dom urang daok di dom labik mbuan njaom mbak jit ruak yau urang y tế atau dom urang daok ngak bruk di mblang kapal haok atau di dom sang mac pataom rilo manuac. Kayua lac meyah pataom mek hu abih F0 jeng oh pacang hu COVID-19 mai veik saong ngak kan kandah ka ban raya.

Jeng saneng dreh yau Phaok Giáo sư - Bác sĩ Vũ Minh Phúc, Giáo sư Trần Diệp Tuấn langyah lac, ban raya HCM oh daok pamaong tal bruk lac “Zero F0”, yau nan hadei di tuk dut iek “samar drah”, prong dalam, piah duah tabiak F0 ye jalan ngak patui veik nan lac ngak hagait, ngak yau habar? Meyah dut iek piah neh tabiak, ba F0 nao labik karei piah khik labik daok hijao ye njauk dut iek 3 harei sa mbang, nan lac njauk ngak miat saong abih biak rilo jien ndo. Kayua yau nan ye, Giáo sư Tuấn hu panuac lac njauk pataom manuac urang tame bruk klauk vaccine:

"Tok hu dom urang bo khaol drei medhil lac njauk ruak COVID-19 ye khaol drei meng ngak. Pren yava dut iek di kol drei njauk pataom tame ngak vaccine ka nyu salah, pataom tame bruk klauk vaccine ka urang mbuan njaom mbak, urang umo labaih 65 thun, 50 thun saong patui di nan, lac taong abih urang hu umo labaih 18 thun"  

         Daok Bác sỹ Lê Trường Giang, urang dahlau diah ngak Phaok Akaok Sở Y tế ban raya HCM ndom lac, meyah caong khin jhul kadhul likuk jit COVID-19 ye njauk hu jalan ngak bahrau. Pren khang di ban raya urak ini, lac hu vaccine saong ngak hu siam. Bác sỹ Lê Trường Giang hu panuac caong ban raya njauk pandar prein khang ka dua jeng biak khang min oh hu ka iek prong, nan lac jru taong ruak:

"Njauk di nyu panuac ndom urak ini lac Jru pagam Vaccine pagam 5K, pandar dua janih nan sa mbang haong gauk nan lac vaccine saong jru piah ka khaol drei samar pacang cakak hu jit ruak"

         Tiến sỹ Vũ Thành Tự Anh, Đại học Fulbright lang yah: Ban raya juai pacang caga jit meng bruk huac kanda bo njauk pacang caga jit ruak meng bruk thau cambaih, meng dữ liệu, thong tin… Dalam tuk bruk klauk vaccine di ban raya hu glaong, biến thể Delta saong dom biến thể dalam harei hadei lac biak karei, nan ye dom jalan pacang jit yau: Sarak 15, 16, 19 oh daok laghaih saong brei taoh talaih.

Ndom ka bruk ngak mbang kinh tế, Tiến sỹ Vũ Thành Tự Anh ndom lac: “Ban raya HCM njauk peih”. Meyah patui veik bruk pacang caga jit ruak yau jalan ngak klak ye khat lahik ka bruk cak rok patagok GDP dut haong GDP meda mek hu jaik 8-10%, nan lac jaik 6 tỷ USD, samu 2% GDP di taneh aia saong meda daok lahik suai lavik. Abih di nyu lac meyah brei kreik pabah mbang miat ye doanh nghiệp biak glaih glar, oh daok pren cak rok

"Bruk oh daok pren cak rok ini bo oh samar daong, cang tal tuk metai ye dom thun hadei tra khaol drei oh meda ndom tal bruk pasiam veik hu. Kayua lac tuk khaol drei daok daong hu ye doanh nghiệp meda daok veih akaok tagok hu, daok caik suai lavik paje dreh yau sa urang bo oh hu oxy piah suak yava, caik suai lavik ye ba tal metai" 

        Daok phaok Giáo sư – Tiến sỹ Trần Hoàng Ngân, Akaok Viện Roh duah cak rok patagok ban raya HCM ndom lac, urang pan akaok ban raya njauk khang hatai pathau tagok Trung ương dom hagait oh ka laghaih. Anak meta, ong Trần Hoàng Ngân caong khin ban raya njauk ngak bruk haong Trung ương piah ba brei vaccine pataom tame dom urang tal tukvak klauk mbang 2; njauk paglaong bruk ngak y tế, menuac ngak y tế, jru taong ruak. Abih di nyu, ban raya njauk samar peih pabah mbang saong njauk pandar 2 adit ngak iek, pathram dahlau, kuhria caga dom bruk peih pabah mbang ka nyu siam mekre meng ini tal harei 30/9.  

        Ban raya HCM kuhria brei peih veik dom bruk ngak mbang kinh tế tui jalan pasang iek gah dịch tễ saong bruk hu khik caga di bhap bani pambak tame dua bruk praong lac bruk klauk vaccine saong bruk salamat di gah y tế. Piah ngak hu bruk ini, ban raya HCM brei hu jalan nao ka nyu njauk dalam bruk pacang caga jit COVID-19 jeng yau hu dom jalan ngak brei pacadu, peih pabah mbang ka nyu tani tanat, khang kajap, pambuak siam dua bruk lac pacang caga jit ruak haong dom bruk ngak mbang kinh tế./.

Urang lang: Jasi -23/9