Ban raya HCM oh mek jien bac daong ka anek saih bangsa takik 

kan kathaot yam tagok dalam bac da-a

***

Hadei di jaik 3 thun ngak tui Nghị định 49/2010/NĐ-CP di rajaei ka bruk klak, trun takik jien bac, daong jien bac da-a saong cơ chế thu, pandar jien bac di dom labik pato pakai di hệ thống pato megru quốc dân, ban raya Hồ Chí Minh hu ba mbuan lagaih ka yaok rabau anek saih bangsa Cam saong Khmer sang kan kandah yam tagok dalam bac da-a, rik daong khik kajap an sinh xã hội. Ala ini lac kadha vak di Aí Nghiêm, urang vak di rayo sap ndom VN daok di ban raya Hồ Chí Minh:

Thun 2010, rajaei patabiak Nghị định 49/2010/NĐ-CP brei bruk klak, trun takik jien bac, daong jien bac da-a saong cơ chế thu, pandar jien bac di labik pato pakai di hệ thống pato megru quốc dân, meng thun bac 2013 - 2014 tal thun bac 2014 - 2015. Hadei di tuk Nghị định ba tabiak ngak tui, uy mban bhapbini ban raya Hồ Chí Minh jao ka Sở pato megru pambuak bruk saong Sở jien padai gam saong mban bangsa tacei pato ngak tui sarak oh mek jien bac di anek saih bangsa Cam saong Khmer di ban raya. Tui quyết định ini, taong abih anek saih bangsa Cam saong Khmer daok bac meng pakat mẫu giáo tal trung học phổ thông, kuhria gam pato megru thường xuyên hu klak abih jien bac tui tanut jien bac công lập.Tukvak oh mek jien bac meng thun bac 2013-2014 tal thun bac 2019-2020.

Meng thun 2013 tal ini, uy mban bhapbini ban raya hu brei ka dom quan, huyen, Sở pato megru jaik 3 tỷ meteh piah klak jien bac ka anek saih bangsa takik di ban raya. Thun 2015 ini, abih tih jien bo ban raya brei ka gah patao megru labaih 1 tỷ 243 triệu đồng piah klak jien bac ka jaik 1.120 anek saih bangsa Cam saong Khmer. Dom sarak ka anek saih bangsa takik hu ban raya peih ngak ginup, yau gauk. Adei Amina, bangsa Cam, anek saih tan bac 7/5 lac sa dalam 57 anek saih bangsa Cam sang kan kandah di sang bac Trung học cơ sở Dương Bá Trạc, quận 8, ban raya Hồ Chí Minh hu klak jien bac meng Nghị định 49 ini. 

Tuk tame thun bac, dom anek saih bangsa Cam saong Khmer hu payua harak likau klak jien bac pagam tui harak ndih tapui atau sổ hộ khẩu atau Chứng minh nhân dân ka sang bac ye hu klak jien bac tapak di sang bac. Nghị định ini hu ba mbuan lagaih ka sang dom anek saih hu mbang tui sarak ưu tiên saong sang bac. Cei gru Nguyễn Minh Tiến, Hiệu trưởng sang bac Trung học cơ sở Dương Bá Trạc, quận 8, ban raya Hồ Chí Minh chreih chrai ndom lac : Ngak tui sarak oh mek jien bac ka anek saih Cam saong Khmer daok bac di sang bac lac biak njauk, ba mbuan lagaih jang ka sang bac jeng ye anek saih. Langiu di nan, sang bac daok daong học bổng, jien bac da-a ka dom adei kayua dom adei ini lac sang kan kandah. 

Piah ka anek saih bangsa takik hu mbang tui ginup, patagok siam lagaih dalam bruk pachreih bac, tukvak tal, dom pakat, dom nganh pato megru ban raya HCM daok ngak tui njauk dom quy định, sarak klak jien bac tui Nghị định 49. Ông Lê Hoài Nam, Phó akaok Sở pato megru ban raya HCM brei thau : Anek meta, ngak njauk tui tacei pato di dua sở ka bruk klak jien bac di anek saih bangsa Cam saong Khmer dalam ban raya mbiah tal thun 2019-2020 tui Nghị định di rajaei. Dom sang bac njauk pataom iek anek saih bangsa Cam saong Khmer piah pandar sarak di ban raya. 

Meng sarak karei di ban raya Hồ Chí Minh, yaok rabau anek saih bangsa Cam saong Khmer kathaot hu sahanang hatai nao bac, rik daong pagalong dân trí dalam bhapbini bangsa takik di ban raya ./.