Rilo urang y tế daok gaok trak damak bruk ngak biak prong, abih di nyu lac dalam dom mbang tabung glaong pacang cakak jit COVID-19

Balai Y tế xã Trung Chánh (huyện Hóc Môn, ban raya HCM) tok hu  6 urang, bruk ngak di balai lac taduan ngak 19 danak dak bruk ngak pakat negar, gam haong nan hu mbaok tame pacang caga jit COVID-19, khik iek saong taong ruak F0. Meng tuk jit COVID-19 tamuh khang, bhap bani nao tal balai y tế iek ruak biak rilo dalam tuk urang y tế biak takik menuac.

Sa-ai L.B.L., urang y tế ngak bruk di sa balai y tế di huyện Bình Chánh, vak harak likau padeih bruk hadei di jaik 4 thun ngak bruk. Sa-ai L. khan lac, dom urang y tế di balai njauk parabha jeng rilo ka khik iek ngak bruk luac harei melam. Sa urang dalam sa tukvak ngak bruk brei ngak rilo bruk meng pabak hu bruk iek glang pren yava ka bhap bani. Langiu áp lực tukvak saong bruk ngak, hadei di jaik 4 thun ngak bruk jien bilan di sa-ai tok hu 5 triệu đồng sa bilan, nan oh ka ndom tal sa tukvak atah dahlau diah yaom jien bilan tok hu 4 triệu đồng sa bilan.

Jeng dreih yau sa-ai L., bác sỹ Trương Thanh Tùng, Akaok balai y tế xã Vĩnh Lộc A (huyện Bình Chánh), labik tok hu 10 urang y tế "naong" jaik 170.000 bhap bani (xã hu menuac rilo abih di ban raya Hồ Chí Minh) ndom lac, yaom lac kak kajap haong balai y tế 20 thun ini mai min tal harei ini jien bilan di sa-ai oh ka tal 6 triệu đồng sa bilan. Dalam balai daok hu điều dưỡng jien bilan tok hu 4 triệu đồng sa bilan. Tui yaom jien bilan yau nan, dom urang y tế oh ginup jien cai pandar ka rup drei, nan oh ka kuhria tal dom urang daok hu hadiuk anek, amaik ame taha njauk raong.  

Anak bruk yau nan, ong Tăng Chí Thượng, akaok Sở Y tế Ban raya Hồ Chí Minh brei thau: Ban raya Hồ Chí Minh hu rilo sang iek ruak prong, sang iek ruak tuyến puac abih min di pakat ala ye bruk parabha urang jakar y tế lac biar di abih dalam taneh aia, kuhria rah tapa tok hu 2,3 urang jakar y tế angaok sa pluh ribau rahra. Dalam tuk nan, meng mbang jit ka 4 brei mboh y tế gah ala hu gam dom y tế phường, xã, bal sit saong balai y tế nao mai hu rik daong biak rilo dalam bruk patrun naong trak ka dom sang iek ruak taduan urang ruak tame taong ruak. Bruk ngak, labik dang di y tế gah ala daok trak jang tuk Ban raya peih bruk brei daok karei, taong ruak ka urang njauk ruak COVID -19 di sang. Rilo áp lực dalam bruk ngak saong jien bilan oh samu haong pren buh tabiak, ngak ka rilo urang oh daok dang veik hu haong bruk ngak, meng nan likau padeih bruk hadei di rilo thun kak kajap haong bruk ngak.

Anak bruk yau nan, gah Y tế Thành phố Hồ Chí Minh daok padang ngak đề án payua Thường trực UBND ban raya dom sarak pakhang veik, pasiam veik, paglaong pren khang y tế gah ala saong khik takai urang y tế. Cambaih laih, Sở Y tế pok likau sarak anak meta daong gah jien bilan, lingiu jien bilan, bác sỹ daok taduan hu jaik 1,5 yaom jien bilan, daok điều dưỡng hu 1 mbang jien bilan. Dahlau diah, ban raya Hồ Chí Minh jeng hu daong ka urang jakar y tế gah ala min biak biar. Langiu di nan, ban raya caong khin hu dom sarak dui pachreih piah khik takai urang y tế daok veik haong gah ala. Dalam nan, Sở Y tế hu likau daong ka bác sĩ di balai y tế nan lac 5 triệu đồng sa bilan, trình độ đại học, y sĩ daong 4 triệu đồng sa bilan saong ilamu cao đẳng 3 triệu đồng sa bilan.

Ndom ka sarak dui pachreih urang jakar y tế nao tal balai, ong Tăng Chí Thượng brei thau: Sở Y tế hu ngak bruk saong dom sang bac đại học, abih di nyu lac Đại học Y khoa Phạm Ngọc Thạch ka jalan ngak bahrau piah dui pachreih bác sỹ bahrau bac tamat. Urak ini, tui adat, bác sỹ bahrau bac tamat njauk nao tame sang iek ruak ngak iek 18 bilan meng brei chứng chỉ ngak bruk iek ruak. Urak ini gah y tế hu ba tabiak jalan ngak ba bác sỹ bahrau bac tamat mai balai y tế ngak iek 12 bilan, 6 bilan ngak iek di sang iek ruak, bruk ngak ini hu kein laba ka dua gah. Tui nan, bác sỹ bahrau bac tamat hu nao ngak bruk jaik bhap bani jang, thau cambaih ka bhap bani jang ye hadei ini mbuan ngak bruk. Cagar veik, dom balai y tế phường xã meda hu bác sỹ ranaih salih gauk mai ngak bruk gam ngak iek.

Akaok Sở Y tế ban raya Hồ Chí Minh brei thau: “Piah dui pachreih bác sỹ ranaih nao tal balai y tế ngak iek, Sở hu panuac likau Ban raya daong sa binah jien ndo dalam tukvak trun ngak bruk y tế gah ala, yaok bilan taduan mek hu jaik 1,5 mbang jien bilan, oh njauk buh jien ngak iek. Meyah panuac likau ini hu jeng biak, ban raya meda hu dom bác sỹ ranaih pasang iek ruak ka bhap bani pak di tuyến gah ala”.  

Tui Sở Y tế ban raya Hồ Chí Minh, dalam mbang jit meng blaoh ban raya ieu pataom hu 5.202 urang ngak pahla meng dom urang jakar y tế padeih hưu, y tế tư nhân, dom urang halan hatian di dom agama atau urang njauk COVID-19 hu abih ruak hu mbaok tame bruk pacang caga jit. Piah patrun naong trak ka hệ thống y tế, gah y tế hu panuac likau patui veik bruk ngak yau nan piah pabak urang jakar ngak bruk di balai y tế. Dom urang jakar ini meda hu mbang jien daong meng 1 tal 2 mbang jien bilan, pandar tui adat di yaok tukvak, yaok urang. Tui kuhria abih tih jien padai brei ka danak dak ini jaik 17 tỷ đồng sa bilan.

Tui meta maong gah bruk ngak, bác sỹ Nguyễn Tri Thức, Akaok sang iek ruak Chợ Rẫy (ban raya Hồ Chí Minh) brei thau, dalam tukvak atah, negar drei tok pataom tame patagok y tế Trung ương saong tuyến tỉnh daok tuyến huyện, xã oh ka hu sangka buh jien tame ngak ka nyu siam, balai y tế phường, xã daok gaok biak rilo kan kandah. Abih di nyu lac, tapa mbang jit COVID-19 mbang ka 4 ini, brei mboh labik dang biak prong di y tế cơ sở. Kayua yua nan ye, bruk buh jien tame ngak ka y tế gah ala nan lac bruk njauk ngak bo oh daok cang hu.

Tui nan, njauk hu sarak karei bayar jien ka urang jakar y tế gah ala, min bruk brei peih ngak dahlau ini jeng daok dalam adat brei ngak. Pagap yau hu pabak jien phụ cấp, palaghaih ka urang jaka y tế phường, xã hu bac megru rilo jang./.

Urang lang: Jasi – 31/12