Liên đoàn Lao động quận hu alin dom paok pandap piah daong ka urang ngak

Palei daok di An Giang, 2 thun ni mai saai Võ Thị Ngọc Chi, urang ngak di Công ty Freetrend (Khu chế xuất Linh Trung 2, quận Thủ Đức, TPHCM) ka oh hu nao palei mbang Tết. Thun bloh kayua jit ruak, Cty takik ngak nan ye jien mek tame di saai jeng takik tui. 4 bilan gam, saai tok taduan hu jien bilan labaih 4 triệu đồng yaok thun, dalam tuk daok biyar jien pah sang daok, jien mbang saong jien  bac ka 2 anek daok nao bac. Kayua yau nan ye, thun ni sang saai Ngọc Chi daok veik TPHCM mbang Tết, patak pataom jien piah mbang cai yaok harei: “Meng tuk hu jit ruak, ngak mbang kan kandah nan ye yaom lac daok di miền Tây min dahlak jeng oh nao sang. Jien bilan takik dalam tuk 2 urang anek daok nao bac saong biyar jien pah sang, jien mbang huak, jien bac ka anek nan ye oh ginup piah nao palei”.

Daok saai Lê Thị Liên palei daok di Hải Phòng ye kan kandah jang. Dua diuk pasang tame TPHCM duah bruk meng akaok thun 2020, min jit ruak rahtabiak ngak ka dua diuk pasang biak glaih glar meng likau ngak hu di Công ty jhik Nhà Bè (Quận 7). Lac urang ngak bahrau, nan ye saai tok taduan hu sa paok pandap sit ka Tết Nguyên đán anak tal: “Thun ni jit ruak biak kan kandah, bruk ngak oh tani tanat, jien bilan ka oh hu nan ye oh hu jien nao palei. Dahlak jeng bahrau tame ngak di công ty ni, nan ye jeng ka oh taduan hu rilo bruk daong di tuk Tết, tok hu dom paok pandap sit, daok jien thưởng Tết ka oh hu”

Yaom lac bahrau tapa sa thun kan kandah min bruk daong ka urang ngak jeng hu rilo doanh nghiệp sangka tal. Ong Nguyễn Thái Thành, Phó akaok Công đoàn dom labik chế xuất, khu công nghiệp TPHCM brei thau, tết thun ni hu brei 13.000 paok pandap ka urang ngak gaok kan kandah, daok dom urang oh nao palei mbang Tết, Công đoàn khu chế xuất-khu công nghiệp di ban raya hu peih bruk brei nao rivang, main sambai di dom labik dalam ban raya. Dom sang urang ngak daok hu daong taong abihjien mbang manyum, main sambai saong hu alin brei sa paok pandap yaom 500.000 đồng piah mbang tết hu bui sambai jang. “Dom urang ngak oh nao palei, khol dahlak hu mayai haong dom công đoàn cơ sở, doanh nghiệp hu dom paok pandap brei ka dom urang nan. Gam tui di nan jeng pambuak haong Hepza peih bruk brei ka 500 urang ngak haong diuk anek nao main Đầm Sen di harei 28 Tết. Khol dahlak jeng pambuak haong dom labik, mayai haong dom po sang trọ piah peih dom bruk me-in sambai ka urang ngak oh hu nao palei”).

Di dom labik daok di urang ngak, bruk daong ka urang ngak tuk tết jeng hu sangka tal. Yau ye di quận Tân Phú, tết nii hu labaih 300 urang ngak daok veik di TPHCM rok Tết Nguyên đán. Kayua yau nan ye, Liên đoàn Lao động quận hu pok panuac saong alin dom paok pandap piah samar daong ka urang ngak saneng hatai rok tết. Muk Phạm Ngọc Lan, akaok Liên đoàn Lao động quận Tân Phú khan lac:  “Gah công đoàn sangka daong ka 300 urang ngak oh hu nao palei mbang tết, yaok urang 500 ribau đồng saong peih bruk mbang tết bui sambai. Hu 2 mbang taom mbaok dom urang ngak di labik sang trọ saong alin dom pandap yau ye mì, brah… ka urang ngak bruk rok tết, gam tui di nan jeng hu bruk papaok har bánh chưng, alin labaih 1.000 baoh bánh chưng ka urang ngak”

Tui ong Trần Đoàn Trung, Phó akaok Liên đoàn Lao động TPHCM, tết sak kubau thun ni, công đoàn pataom tame daong ka urang ngak daok di bhum kreih negar hu sang njauk kan kandah kayua ribuk ia sua. Gam saong nan, danak dak Tết bui sambai jeng hu peih tabiak di dom labik piah duh ka dom urang ngak gaok kan kandah oh hu nao palei mbang tết. Tui kuhria thun ni meda hu 4.000 sang hu mbaok tame danak dak Tết  bui sambai, rilo jang 3 mbang dut saong thun blaoh: “dom urang bo khol dahlak biak sangka tal, nan lac rilo doanh nghiệp gaok kan kandah kayua jit ruak, ngak kan kandah tal bruk ngak saong biyar jien bilan, jien thưởng ka urang ngak. Tapa pasang iek, yaok pataom, khol dahlak parabha ka nyu lagaih, ngak habar piah ka yaok urang yaom lac takik atau rilo jeng hu daong piah hu sa tết  siam makre”.

Tết thun sak kubau daok mai jaik tal, dom urang ngak daok ngak bruk di TPHCM tok caong khin hu sa tết bui sambai piah caong tame thun bahrau hu siam makre, raidiuk hu tani tanat jang./.

Urang lang: Thu Thảo – 01/02