Vaccine hu klauk ka bhap bini di ban ray HCM 

Tui yaok pataom di gah y tế bal raya Hồ Chí Minh, bal raya hu peih 4 mbang klauk jru vaccine pacang COVID-19 ka bhap bani. Meng harei 28/6, bal raya Hồ Chí Minh daok jul khang bruk klauk jru vaccine COVID-19 mbang 5 ngan haong jaik 786.000 mbang vaccine di AstraZeneca. Mbang ini, bal raya daok brei klauk jru ka dom urang daok dalam dom labik mbuan njauk jit ruak, urang ngak di dom labik ngak pandap, labik ngak kong, di dom doanh nghiệp, labik brei daok karei…

Labik klauk jru di Sang pakacah Phú Thọ hu ramik caik jaik 50 kapal klauk jru; dom urang ngak bruk klauk jru mai meng 9l labik karei di gauk ngan haong manuac urang y tế hu ieu pataom lac jaik 230 urang. Yaok kapal klauk jru brei klauk 200 urang sa harei, prein klauk rilo abih di Sang pakacah Phú Thọ lac 8.000 urang dalam 8 tuk. Min, kayua dalam dom harei 24-25/6 manuac urang tuh mai ini klauk jru biak rilo, dak jeng talei di anak pabah mbang tame sang pakacah, oh khik hu bruk dang atah di gauk, oh njauk haong bruk pacang caga jit ruak COVID-19, nan ye urang pal kaok Ủy ban bhap bani Quận 11 brei rami ramik veik, patrun manuac urang dang cang saong paraba dom mbang manuac urang tame klauk jru ka nyu laghaih.

Tui nan, anak pabah mbang tame klauk jru, yaok mbang dang cang rilo abih tok hu 20 urang. Dom urang hu tacei jalan tame dalam Sang pakacah Phú Thọ daok cang klauk jru jeng brei daok atah di gauk piah pacang caga jit.

Adei Lê Thùy Trang, sinh viên thun ka klau di sang bac Đại học y Phạm Ngọc Thạch brei thau: "Piah daong pren haong bal raya pacang caga jit ruak, dom sinh viên gah y jeng abih hatai hu mbaok tame. Meng pren ranaih, khaol dahlak kham merat ngak hu rilo bruk jang piah ka bal raya Hồ Chí Minh samar padam hu jit ruak. Khaol dahlak ndua dhal phol dom jabat di bal raya hu sangka, brei ka sinh viên gah y hu klauk jru vaccine COVID-19 piah mboh sahanag hatai jang tuk hu mbaok tame bruk pacang caga jit ruak. Tui kuhria dom sinh viên thun 3 di sang bac meda daong ka dom puk palei mek mẫu dut iek, duah thau jit ruak di dom quận, huyện dalam bal raya". 

Ong Dương Anh Đức, Phaok akaok UB bhap bani bal raya Hồ Chí Minh brei thau, sa adit meng blaoh nan lac sa adit biak karei, bal raya sa gah brei peih dom bruk pacang caga jit ruak di rilo labik prong kayua biến chủng Delta nyu njaom mbak biak samar, gam haong nan brei peih bruk klauk jru prong abih dalam dak rai sajarah ka jaik 800.000 urang. Yaom lac vaktu kuhria caga samar drah (dalam 2 harei) min bruk klauk jru pacang caga jit tal urak ini meda lac hu siam mkre, khik hu salamat ka urang klauk jru. Mbang ini, bal raya Hồ Chí Minh klauk jru pacang caga jit hu jaik 6%.

Urang lang: Jasi -7/7