Pathau mikva saong taong abih gauk! Tal tukvak ini, ban raya Ho Chi Minh jeng oh ka mboh sruh kum menuk ada halei. Min anak bruk dom tinh daok jaik taphia yau Long An, Tây Ninh hu jit saong daok mbuan pambak praong, ye bruk pacang caga jit kum A/H5N1 nan lac bruk praong daok caik tabiak ka ban raya.  Bích Huyền, urang vak di rayo sap ndom Viet Nam daok di ban raya Ho Chi Minh hu kadha vak brei thau ka bruk nan, da-a mikva saong taong abih gauk tui pang:  

Di sa labik pablei baoh menuk ada di xa Le Minh Xuan, huyen Binh Chanh, kapul pasang iek di huyen hu mboh rilo bruk ngak suan yau: tuk jit kum menuk ada oh ka patrun di rilo palei ye labik pablei baoh menuk ada ini blei mai labaih 40 ribau baoh menuk, ada, bo oh tapa dut iek dig ah chuc nang. Yaok pluh khay baoh praong oh hacih sa-at, dalam nan hu rilo khay baoh pacah saong mbau bruk. Tui panuac khan di ong Nguyen Minh Quoc, pô labik pablei baoh menuk ada ye dom baoh nan hu mek meng Đong Thap mai saong hu dut iek di labik mek baoh, nan ye oh cang dut iek veik: "Baoh ini dahlak ba meng Đong Thap mai. Hu harak dut iek, oh njauk lac oh njauk adat hukum min oh tapa đại lý pakat 1 di ban raya dut iek jit. Di labik nan urang dut iek bloh ye drei dut iek veik ngak hagait. Dahlak hu ginup harak gar. Urak ini khin langyah yau habar ye langyah nao". 

Nguồn ảnh: danviet.vn

Min pô labik pablei baoh menuk ada ini oh thau atau thau min oh ngak tui quy định ba tabiak nan lac: baoh menuk ada dahlau di tuk ba tame darak pasar ban raya, brei hu gah chuc nang di ban raya dut iek jit veik. Lingiu di nan, yaom lac  pablei tabiak yaok rituh khay baoh yaok harei, min labik ini jeng oh ka hu harak adapt pablei salih. Oh lac mboh bruk ngak suan di labik ini saoh, dalam mesup harei nan, kapul pasang iek di huyện daok hu mboh 3 bruk pajeng ba saong pablei salih menuk ada oh ka tapa dut iek jit.

Huyen Binh Chanh daok di labik pabah mbang gah pai ban raya saong lac labik “pandiak” ka bruk pajeng ba, pablei salih menuk ada suan adapt hukum. Dalam huyen urak ini hu jaik 10 labik pataom mek pandap di dom urang pablei salih menuk ada suan hukum. Meng hadei di Tet tal ini, huyen Binh Chanh hu duah mboh saong langyah jaik 250 mbang vi pham, rilo jang jaik 2 mbang dut saong bilan jaik Tet. Ban raya hu blai dut iek jit ruak menuk ada athur raong An Lac caik di jalan Roya 1A- labik tame huyen Binh Chanh, pasang iek biak catang dom radaih pajeng menuk ada meng dom tỉnh mien Tay mai ban raya. Min bruk pajeng ba suan hukum oh takik nao bo daok hu rilo jang. Makna di nyu nan lac kayua dom urang pablei salih menuk ada salih tapa pajeng meng radaih mac saong nao jalan kat piah njaik dut iek atau brei menuac tui iek bruk ngak di kapul pasang iek bloh samara khan brei gauk thau. Meyah gaok kapul pasang iek, dom urang nan meblah mek atau nduac klaak atau taong veik gah chức năng. Ong Khương Huỳnh Phúc Nguyên,  akaok balai thú y Binh Chanh brei thau: "Bruk pacang caga jit kum urak ini gaok rilo kan kandah, dalam nan praong di abih jeng lac akaok sahneng di bhap bini . Urang sahneng lac tuk njauk chap mek nan lac lahik drap ar nan ye cagar veik biak khang. Dahlau deih pachreih tui min urak ini cagar veik saong ba panduac padauk". 

Nguồn ảnh: baomoi.com

Tui kuhria mboh bahrau di abih, urak ini ban raya Ho Chi Minh daok hu 45 labik pablei salih menuk ada diuk suan adat hukum, rilo meng daok di dom quan, huyen lingiu ban raya. Ini lac dom labik mbuan pambak ruak kum A/H5N1. Dom kapul  chức năng daok kham merat palahik dom labik “juk” pablei salih menuk ada suan adat hukum, patagok bruk pasang iek di dom labik raong praong saong jhul pakhang bruk pathau khan brei bhap bini thau ka bruk pacang caga kum menuk ada. Ong Huynh Tan Phat, phaok akaok Chi cuc thu y ban raya Ho Chi Minh lac: "Ban raya daok huac di abih nan lac bruk hu rilo menuac ba menuk ada oh ka tapa dut iek meng dom tinh mien Tay mai sik ngak ralo pablei. Urak ini daok hu 45 labik yau nan, saong kol dahlak daok pataom tame langyah. Lingiu din an, daok hu bruk raong sit sot di dom huyen lingiu ban raya..Dalam tuk jit ruak mbuan pambak praong, kol dahlak hu panuac kakei urang raong glang tuk mboh menuk ada metai atau ruak kik ye khan brei gah thu y thau chip piah tui iek".

  Meda mboh lac, bruk pacang caga jit kum menuk ada daok lac bruk praong kateik trak ngan saong ban raya Ho Chi Minh. Lingiu di bruk dom gah chuc nang patagok pasang iek di dom pabah mbang tame ban raya, dom darak pasar praong, urang blei mbang jeng njauk pilih ruah menuk ada thau cambaih asal di nyu saong hu tapa dut iek jit. Ini jeng lac jalan siam di abih piah khik caga pren yava di drei eng tuk jit kum menuk ada daok tamuh khang./.