Mai rivang baoh sang ong Mai Văn Tiền saong amuk Bá Thị Ngọc Nha daok di palei Tanat Bình Thắng, xã Phan Hoà, huyện Bắc Bình, tỉnh Bình Thuận di harei puac adit, khaol dahlak mboh hu bruk bui sambai angaok mbaok meta di dom urang ngak amaik ame tuk mboh anek taco pataom mbaok. 

Ong Mai Văn Tiền brei thau, urang Cam tui darah gah amaik, nan ye anek likei njauk daok di sang gah kamei. Ong hu 6 urang anek, dalam nan hu 4 urang anek likei di ong jeng nao daok gah sang diuk kumei, min jeng bhian mai sang rivang iek amaik ame.

Piah hu dom urang anek prong jeng manuac jeng urang yau harei ini, diuk pasang ong Tien yam tapa oh thau hadom kan kandah. Padang mbang angui meng dua palak tangin saoh, min thau lac kinh tế baoh sang lac bruk prong piah kuhria ka dom anek hu mbang bac saong padang haniem phol. Meng nan, hadiuk pasang ong kham merat ngak mbang piah pasiam rai diuk. Akaok mereip ong ngak 5 sào hamu, amuk daok sang jik khan ao. Jien duah hu, diuk pasang ong cai pandar kali kalih piah hu jien raong anek mbang bac, grap tanat rai diuk. Langiu di nan, amuk Nha daok peih kuan pablei pandap piah hu jien tame. Pabak veik bruk anit ranam di amaik ame, dom urang anek di ong kham merat bac da-a naih jioy, hu harak pok meyaom, hu pok jien bac yaok thun. Amuk Nha khan lac: “Dahlau diah, rambah kurang anak kurang likuh, oh hu jien padai. Merat jhik khan ao ka urang harei melam, ngak hamu piah duah jien, mbang  cai patak pataom…”

Urak ini, hadiuk pasang ong jeng daok ngak nong saong jik khan ao. Daok 6 urang anek di ong amuk, 4 urang anek likei bac tamat đại học saong hu bruk ngak tani tanat ngan haong dom bruk yau: gru pato, urang jaka xã, urang ngak gah gilang pariak.

Oh lac ngak siam bruk raong pato anek taco, cak rok patagok kinh tế, sang ong Mai Văn Tiền daok abih hatai haong bruk ngak di bol bhap rah ra, rik daong rilo ka dom bruk di puk palei. Meng angan je saong bruk abih hatai di drei, ong gam haong urang jakar xã hu rilo mbang nao jak ba mikva rik daong yaok pluh triệu đồng piah ngak jalan palei. Mai meng nan bo mbaok meta palei pala hu hadah hadai, daong ka xã samar drah mek hu chuẩn palei pala bahrau (2016). Saong jaik di abih nan lac bruk ngak bimon kalan Pô Patao Át di palei ye njauk ndom tal pren yava di hadiuk pasang ong hu daong ka mikva dalam palei hu labik peih bruk paling yang, khik ramik ilamo. Ong Lư Đức Huấn, Phaok Akaok UB bhap bani xã Phan Hoà, huyện Bắc Bình, tỉnh Bình Thuận brei thau: “Sang ong muk ini hu mbaok rik daong rilo bruk ka pablei. Dalam sang gheih daok dang, anit ranam gauk, gheih saong palei pala…”

Ong Dụng Xít –Urang hu angan je di palei Tanat Bình Thắng, xã Phan Hoà, huyện Bắc Bình, tỉnh Bình Thuận ndom ka baoh sang ong Tiền, yau ini: “Mboh sang ong Tiền muk Nha anek bik gheih ghang, haniem siam”

Sang ong Mai Văn Tiền saong amuk Bá Thị Ngọc Nha tuk halei jeng njauk gauk, khik ramik jalan diukrai siam mekre, ndom puac hu ilamu. Sang ong amuk nan lac sa dalam dom baoh sang ilamo hadah krah rilo thun gam, hu UB bhap bani xã Phan Hoà pok meyaom./.

Urang lang: Jasi -27/6/2021