Tỉnh kham merat cakrok patagok kinh tế - xã hội dalam tukvak samar di abih

Labaih dua bilan meng hu tabiak truh sang, yaom lac jit ruak hanjul jang min amuk Võ Thị Tâm daok di bal sit Giồng Trôm, huyện Giồng Trôm tuk halei jeng caik hatai pacang caga jit, ngak njauk tui  "5K" di Mentri Y te tuk nao darak. Amuk Tâm brei thau, kan kandah rilo karja saong bhap bani tỉnh Bến Tre meng ngak hu yau ini min jit ruak jeng daok mbuan njaom mbak, nan ye meyah yaok urang drei ngak njauk tui bruk ba tabiak, jak gauk patui bruk pacang caga jit, kham merat khik bhum hijao ye rai diuk di bhap bani meda hu siam mekre salamat jang.

Ong Võ Thanh Tùng, Phaok akaok UBND ban sit Giồng Trôm brei thau, yaom lac jit ruak daok trun, min dom urang pacang caga jit jeng daok caga langyah dom bruk meda rah tabiak. Dom kapul COVID-19 bhap bini dalam khu phố, ấp tuk halei jeng pathau khan ka bhap bani ngak njauk bruk pacang caga jit, yaok baoh sang lac sa labik pacang caga jit hu siam mekre.

Abih di nyu lac, dalam ban sit hu 2 baoh darak, 1 baoh darak huyện saong sa baoh darak sit, bhian pataom rilo menuac, mbuan ngak brei jit ruak pambak prong. Kayua yau nan ye, karja bhian brei manuac trun kakei, pahadar, pathau khan bhap bini tuk nao darak njauk ngak tui bruk ba tabiak piah pacang caga jit.

Tal urak ini, tỉnh Bến Tre hu taong abih 9 huyện, ban saong taong abih  157 xã, phường, ban sit hu mai veik raidiuk siam mekre bahrau. Ong Trần Ngọc Tam, Akaok UBND – Phaok akaok  Mban tacei pato pacang caga COVID-19 tỉnh Bến Tre brei thau: bruk njuak ngak urak ini lac pacang caga saong khik kajap bhum hijao, jhul khang bruk kluak vaccine saong pasiam , patagok kinh tế.

Lac labik kinh tế ngak nong rilo janih, pataom rilo tame dom gah yau: ngak bein, raong glang saong kaya ikan dalam aia; dalam nan, tỉnh jeng thau saong padang dom chuỗi giá trị kaya nong khang di drei. Abih di nyu lac, labaih 74.000 ha la-u saong labaih 1.950 ha raong hadang ilamu glaong gam haong mblang taneh raong hadang prong daok lac pren khang piah ka tỉnh kham merat cakrok patagok kinh tế - xã hội dalam tukvak samar di abih.

Tal urak ini, tỉnh Bến Tre hu 666 doanh nghiệp daok ngak, pablei salih, mek hu 16% dalam abih 4.143 doanh nghiệp daok peih ngak. Gam haong nan lac jaik 400 jabat, doanh nghiệp; 29 jabat mbang tui, 34 baoh sang pablei salih peih ngak tui jalan "3 di labik" ngan haong 15.597 urang ngak.  

Ong Lê Đức Thọ, Bí thư Tỉnh uỷ Bến Tre brei thau, anak tal, Đảng bộ, karja saong bhap bani tỉnh jeng thau bruk prong lac khik caga dom jak jeng di bruk pacang caga jit piah pataom tame cak rok patagok bruk ngak mbang kinh tế - xã hội. Dom pakat, dom gah pambuak bruk catang, duah thau bruk daok rah tabiak, samar ba tabiak jalan ngak, lang talaih kan kandah, daong ka doanh nghiệp, labik ngak dalam tỉnh, peih bruk ngak mbang pablei salih siam mekre, salamat.

Gam haong nan, daong palaghaih ka dom chuỗi sản xuất, chuỗi giá trị ngak bruk siam mekre; salamat,  samar pasiam, pambuak veik dom jalan ngak pabak brei pandap panda njauk klaih klaoh, atau "jaoh jaleih" dalam tukvak  pa-atah di gauk; abih di nyu lac bruk pajeng ba pandap panda, pasiam veik saong peih pambang gilac bruk pablei salih pandap panda ka nyu siam mekre saong khang kajap./.

Urang lang: Jasi – 04/10