Bilai pacang khik bhum hijao di dom palei Cam di Binh Thuan

Phan Thanh lac xã harat urang Cam di huyện Bắc Bình, tỉnh Bình Thuận. Dalam xã hu 7 palei daok rah tui jalan Roya 1A. Meng tuk jit COVID-19 tamuh khang mbang ka 4, tal harei ini dalam xã oh ka hu urang F0. Dalam dom harei puac bilan 9 meng blaoh, tuk dom tỉnh, ban gah Meraong pacadu bruk brei daok atah di gauk, urang pan akaok xã hu jalan ngak cambaih laih piah pasang iek urang mai meng bhum jit, piah pacang khik bhum hijao.

  Ong Đặng Phúc Chính – akaok UBND xã Phan Thanh, huyện Bắc Bình brei thau, xã hu padang bilai khik iek di dom canah jalan tame palei, padang kapul pasang iek urang daok  atah mai, kapul halau janeng gam haong bhap bani eng drei khik iek,… Meng nan, dom urang daok atah tame palei mikva thau abih saong khan brei ka MBan tacei pato pacang caga jit COVID-19 di xã thau piah hu jalan pacang cakak. Pak ini daok brei thau 3 số phon (Akaok UBND, phaok akaok UBND saong Akaok balai y tế xã) tal yaok baoh sang di bhap bani piah mbuan laghaih pambuak bruk. Ong Đặng Phúc Chính ndom lac: “ Urak ini, xã Phan Thanh hu taduan 48 urang mai meng bhum hu jit dalam harei 2/10 blaoh…”

   Daok di xã  Phan Hoà, huyện Bắc Bình, tal urak ini hu jaik 3.000 urang meng bhum jit gilac veik palei. Dalam nan, labaih 400 urang daok brei pataom di sa labik, 400 urang hu ngak salah blaoh bruk brei daok pataom sa labik gilac veik sang patui bruk brei daok atah di gauk, labaih 1.000 urang hu ngak salah blaoh bruk brei daok atah di gauk pak sang.

Amuk Lư Thị Kim, Akaok MBan ngak bruk mặt trận palei Bình Thắng, urang daok khik iek bilai labik jaik UBND xã Phan Hoà, huyện Bắc Bình brei thau, palei Bình Thắng hu manuac urang mai palei rilo di abih dut haong dua palei daok veik di xã. Pak ini mikva nao ngak mbang atah mai palei biak rilo, min oh ka mboh thei njaom mbak ruak Covid-19. Bruk ini jeng mai meng dom pakat karja ngak siam bruk pacang caga jit ruak. Amuk Lư Thị Kim brei thau:“Harei halei jeng khik iek, min iek salih ka gauk. Harei ini kapul ini, tapa harei karei lac kapul dieh…” 

Dalam xã Phan Hoà hu 8 kapul pasang iek urang daok atah mai ngan haong 50 urang hu mbaok grauk dom palei dalam xã. Langiu di dom urang yau công an, quân sự, dom kapul nyaom, xã daok iew pataom dom gru pato, halau janeng hu mbaok tame piah samar mboh urang daok  atah mai bo oh pathau khan y tế.

Dom jalan ngak pacang caga bhum hilao hu dom xã bhap bani Cam dalam dalam huyện Bắc Bình, tỉnh Bình Thuận peih ngak avar nan ye ba mai  siam kre.

  Taphia di nan, dom puk palei jeng patagok bruk pasang iek jit ruak di dom labik mbuan njaom mbak ruak glaong yau: di darak, labik ngak pandap, labik padang ngak, labik padeih padei,.. piah samar duah mboh, padam jit tuk hu mboh urang njauk ruak, oh caik ka jit njaom mbak tabiak dalam bhap bani. Đại úy Nguyễn Thịnh Vượng, Phaok akaok Công an xã Phan Hiệp, huyện Bắc Bình, ndom lac: “Karja palei hu peih bruk brei mbaoh tangin sanya di dom baoh sang ngak mbang pablei salih. Langiu di nan daok pathau khan angaok loa papar sap ka bruk ngak tui tacei pato di trung ương “thei daok  halei daok gindang pak nan”, saong tuk  tabiak jalan brei cuk suek pabang mbaok. Abih di nyu lac tuk mai tut angan ngak bruk haong dom jabat karja, hu mboh mikva peih ngak biak siam. Daok bruk oh pataom rilo manuac urang ye mikva jeng njauk hatai ngak tui. Puk palei jeng kham merat pambuak bruk haong dom gah chức năng khik iek dom anek kamuan nao ngak mbang atah, tuk bo hu thau mai palei ye brei daok atah di gauk pak di sang atau brei daok atah di gauk pak huyện.”

Ong Nguyễn Đức Phúc, Phaok akaok UBND huyện Bắc Bình, tỉnh Bình Thuận brei thau, tukvak anak tal huyện daok tacei pato dom puk palei, abih di nyu lac dom xã hu rilo urang bangsa takik peih ngak dom jalan ngak grap tanat bruk ngak mbang pablei salih siam mekre dalam  pacang caga jit COVID-19. Taphia di nan jeng pataom tame tacei pato dom doanh nghiệp, jabat daok ngak dalam huyện ngak tabiak tui hatai caong khin di darak pasar piah grap tanat bruk pabak pandap panda kaya nong, abih di nyu lac dalam tukvak puac thun ini. Ông Nguyễn Đức Phú lac: “Bruk ini, piah khik caga bhum hijao gam haong bruk pacang caga jit ruak, meng akaok mereip khaol dahlak hu pambuak bruk haong dom jabat, gam haong nan tapa dom nyaom biai piah ndom biai nao mai ka bruk pambuak tal pacang caga jit ruak, ngak tui 5 paka di Mintri Y tế, khik kajap salamat”

  Bình Thuận lac tỉnh hu rilo urang Cam ngan haong labaih 45.000 urang, dalam nan, daok rilo abih di huyện Bắc Bình, meblah jaik 60%. Hadei di tuk dom tỉnh ban gah Meraong brei pacadu bruk brei daok atah di gauk, rilo urang ngak meng TP.HCM, Bình Dương, Đồng Nai… gilac veik Bình Thuận, dalam nan hu rilo urang Cam. Anak dom cuang kandah di jit ruak, rilo palei Cam di Bình Thuận daok tui iek dom urang ini, piah peih ngak siam bruk pacang caga jit ruak, khik kajap bhum hijao, rik daong peih ngak 2 bruk haong gauk, lac “gam pacang caga jit hu siam mekre, gam cakrok patagok kinh tế, grap tanat rai diuk bol bhap rah ra”./.

Urang lang: Jasi – 10/10