Lễ hội Ramưwan nan lac sa dalam dom lễ hội quan trọng di bhap bani Cam BàNi pak tỉnh Ninh Thuận. Lễ hội thun ini rah tabiak dalam 3 harei meng harei 16, tal harei 18/6/2015. Kayua tua riya pandiak bhang dui atah, pambak tal bruk ngak mbang pala drak, rai diuk di mikva gaok ralo kan kandah. Kayua nan ye, bruk peih ngak lễ hội meng kan di bhap bani Cam pak tỉnh Ninh Thuận thun ini jeng gaok oh takik kan kandah. Kadha vak di Thúy Linh – Urang vak daok rayo sap ndom Việt Nam pak bal raya Hồ Chí Minh: 

Xã Phước Nam, huyện Thuận Nam hu urang Cam daok meblah labaih 87% bhap bani dalam xã, ralo meng lac urang Chăm Bàni, hu takik urang Cam Islam. Dalam 2 thun tapa, xã Phước Nam lac labik hu pandiak bhang trak di abih, ngak khat lihik praong tal bruk ngak mbang kinh tế di mikva urang ngak nong daok pak ini. 730 baoh sang hu taneh min oh pala drak hu. 3.000 urang njauk klaak palei nao labik karei piah ngak mbang duah jien. Yaok rituh ribau drei athur raong oh ginup aia menyum, kurang pandap mbang nan ye lavang lavaih bloh metai nao… Urak ini, dalam dom palei Cam pak xã Phước Nam tok daok mboh urang taha saong uranaih. Ngak habar piah bhap bani Chăm taduan raok Ramưwan dalam bui sambai, trei sil daok lac bruk oh mbuan di karja labik ini.

Bruk urang klaak  palei nao ngak mbang atah rilo di abih dalam xã Phước Nam nan lac palei Ram Văn Lâm 3, hu tal 80% manuac urang dalam palei. Dom urang klaak palei nao rilo meng lac urang dalam umo ngak bruk. Makna di nyu kayua kurang ia oh pala drak hu. Daok dom harei tra tal Ramưwan min bruk uan raok Ramuwan di palei ini mboh biak joa kandang. Ralo sang brei thau, Ramưwan dom thun dahlau, urak ini urang blei ginup pandap panda, puh ramik sang danaok... min thun ini oh mboh chreih chrai, jeng yau oh hu mbang menyum bui sambai. Yaom lac kan kandah yau nan, min mikva jeng kuhria caga ngak salao lisei, baoh kayau, salao har meng kan piah iew da-a amuk akei.

Oh lac di xã Phước Nam saoh, bo di ralo palei Cam karei dalam tỉnh Ninh Thuận jeng gaok kan kandah dalam peih bruk uan raok Ramưwan. Tuk tame Ramưwan yaok thun, labaih 10 baoh sang urang kamei dalam Dhar kapul urang kamei palei Thành Tín, xã Phước Hải, huyện Ninh Phước, tỉnh Ninh Thuận bhian rik pataom pandap panda piah ngak dom janih kaya mbang meng kan di urang Cam piah payak tuai, piah ieu da-a amuk akei dalam harei roya di bangsa, caong hu sa bilan Ramewan siam mekre salamat; atau hu mbaok tame bruk văn nghệ, daoh dom kadha daoh bhap bani Cam ngak brei ka bruk uan raok Ramewan di puk palei hu bui sambai jang. Min, thun ini kayua langik tasik tua riya dui atah, oh hu aia pruh  ka phun pala, njam patam metai thu ngak kan kandah prong tal rai diuk di ralo baoh sang adei sa-ai. Kayua yau nan ye , bruk pataom mbaok adei sa-ai biak kan kandah, tui sa-ai Kiều Thị Duyên,  akaok Dhar kapul urang kamei palei Thành Tín ye tui kuhria dahlau, thun ini hu jaik 4 tal 5 baoh sang urang kamei hu mbaok tame kayua oh ginup jien padai.

Daok dom harei tra, bhap bani Cam Awar tỉnh Ninh Thuận peih bruk taduan raok Ramưwan - roya prong abih dalam thun. Meyah tua riya pandiak bhang daok rah tabiak yau urak ini,  meda ngak ka bruk taduan raok Ramewan di bhap bani Cam labik ini joa lange biak ralo. Kan kandah mboh cambaih yau nan, saneng lac dom pakat, dom ngành, gam haong karja palei njauk hu dom jalan daong ka nyu samar piah daong ka bhap bani uan raok bilan Ramưwan siam mekre, salamat, haniem phul./.