Rah rah, urang jakar dalam tinh pachreih tui panuac ieu “Taong abih bhap bani tame bruk pacang caga jit ruak Covid-19”, 

Lac urang dahlau diah ngak Thanh niên xung phong, bhian hu mbaok tame bruk mesruh pacang Mỹ daong taneh aia. Dom harei tapa, ong Chamaléa Doi daok di xã Phước Kháng, huyện Thuận Bắc tuk halei jeng sahneng tal ayut sahabat, tal bhap bani dalam tuk taneh aia daok gaok kan kandah kayua jit ruak Covid-19. Nan ye, tuk karja palei ba tabiak bruk daong brei kadung jien pacang caga jit Covid 19, ong Doi nao tapa labaih 5km tal UBMT negar VN huyện Thuận Bắc piah rik daong 500.000 đồng. Yaom jien ong ong Chamaléa Doi rik daong nan lac bruk klah rabha, bruk ngak di bhap bani ngan haong Karja sa tangin haong gauk pacang caga jit Covid 19. Ong Chamaléa Doi, xã Phước Kháng, huyện Thuận Bắc, tỉnh Ninh Thuận ndom lac: “Tui sap iew di Raja-ei, di akaok UBMT negar VN tỉnh saong UBMT negar VN huyện Thuận Bắc ieu manuac sia rik daong piah pacang jit Covid 19 nan ye dahlak haong adei sa-ai urang dahlau diah ngak thanh nien xung phong rik daong hu hasit tui prein di drei, piah daong grap tanat rai diuk bhap bani."

Amuk Mai Thị Hà, Phaok akaok UBMT negar VN huyện Thuận Bắc, tỉnh Ninh Thuận brei thau: “Dalam dom manuac urang mai tapak jabat Mặt trận piah rik daong, hu rilo mikva urang bangsa takik, yaom lac rai diuk biak kan kandah min mikva hu rik daong jien padai, caong khin ba tangin tame haong taneh aia jhul kadul likuk jit ruak Covid 19.”

 Meng caong khin rik daong pren tame bruk pacang caga jit Covid-19, bahrau ini, bhap bani Cam di dom puk palei dalam tỉnh Ninh Thuận hu rik daong labaih 100 triệu đồng brei kadung jien vắc xin pacang caga jit Covid-19. 

Bruk rik daong Kadung jien vắc xin pacang caga Covid-19 daok pambak praong, brei mboh ilamu meng kan lac “anit ranam daong ba gauk” di bangsa, hatai anit ranam taneh aia, anit ranam anek manuac saong bruk ngak di drei ngan haong bol bhap rah ra ba gauk tame pacang caga jit Covid-19. Ndom ka bruk rik daong kadung jien vắc xin pacang caga Covid-19 di bhap bani dom bangsa takik dakam tỉnh, ong Lê Văn Bình, akaok UBMT negar VN tỉnh Ninh Thuận brei thau: “Bhap bani abih drei rik daong, meng urang hu jien padai tal urang kan kandah hu mbaok tame tui jalan lac thei hu rilo ye daong rilo, thei hu takik brei takik. Dom harei tapa, hu rilo menuac meng bhum palei atah bayah mai tal jabat Mặt trận tỉnh piah rik daong tame bruk pacang caga jit. Dahlak mboh lac bruk ini brei mboh hatung hatai biak njauk pok meyaom, khaol drei daok patagok dalam tuk vak anak tal." 

Pachreih tui panuac ieu “Taong abih bhap bani tame bruk pacang caga jit ruak Covid-19”, tal harei ini, UBMT negar Việt Nam tỉnh Ninh Thuận taduan hu labaih 11 tỷ đồng jien saong pandap panda y tế meng 140 jabat, doanh nghiệp, manuac urang rik daong. Bruk sa tangin haong gauk, rik daong pren di bhap bani Ninh Thuận, dalam nan, hu bhap bani dom bangsa takik brei mboh hatung hatai saong bruk ngak di yaok urang dalam bruk padang kadung jien vắc xin, jhul kadhul likuk jit prong Covid-19./.

Urang lang: Jasi – 11/07