Jeng yau bhap bani dalam taneh aia, bhap bani tỉnh Kiên Giang, meng urang trí thức tal dom halau janeng, urang tui agama, urang ngak nong jeng biak sangka tal Nyaom Roya Đảng mbang 12 – sa bruk parong di taneh aia. Jaik abih bhap bani biak jia tame bruk pal akaok ba jalan di Đảng saong caong khin nyaom roya meda palih ruah tabiak dom urang pal akaok hu đức, hu tài piah ba taneh aia Việt Nam cakrok patagok.

 Tapa tui iek bruk kuhria caga ka Nyaom rora, ong Nguyễn Văn Khiết, Akaok Liên hiệp dom kapul nyaom khoa học kỹ thuật tỉnh Kiên Giang mboh lac nyaom roya hu kuhria caga biak tani tanat, cambaih laih ka văn kiện saong manuac urang. Brei mboh hatai caong di drei tame nyaom roya, ong Khiết lac: Tapa roh duah dom văn kiện nyaom roya mbang ka 12 khaol dahlak thau lac Đảng drei biak sangka tal bruk pacang cakak tham nhũng. Meyah pacang cakak hu tham nhũng meda padang hu hatai jia di bhap bani brei ka Đảng saong kadha bo khaol dahlak caong tra nan lac taneh aia caong cak rok patagok ye njauk sangka tal dom urang trí thức. Njauk hu sarak salih bahrau piah ka dom urang trí thức sangka tal bruk cống hiến, sáng tạo piah ba taneh aia kol drei cakrok patagok.

Daok amuk Nguyễn Thị Minh Giang, Akaok Sở Pato megru Kiên Giang mboh biak hadah mbaok tuk drei lac sa dalam dom urang hu nao pataom mbaok dalam nyaom roya pakat negar. Tapa roh duah dom văn kiện ba tagok nyaom roya 12 di Đảng, amuk Giang biak sangka tal dua kadha 2 nan lac bruk ngak nong – palei pala - urang nong saong gah pato megru. Tuk vak tapa, Đảng saong Karja hu buh jien tame ralo ka 2 gah ini min jeng oh ka pabak hu hatai caong khin. Rai diuk di urang nong daok biar. Pato megru hu ralo salih bahrau min oh ka hu tani tanat saong khang kajap. Amuk Nguyễn Thị Minh Giang mboh lac: Taong abih urang ngak amaik ngak ame, taong abih rahra, abih hệ thống chính trị thei jeng caong hu salih bahrau yau habar piah ka bruk pato megru Việt Nam cakrok patagok samu haong dunya, saong khu vực. Dahlak caong khin tuk khaol drei ba tabiak bruk ngak njauk hu jalan ngak, gam saong nan, lac  dom jalan ngak lagaih haong yaok bhum palei piah ka bruk salih bahrau hu grap tanat, khang kajap, hu jalant patagok tui quy luật.

Dalam dom tu sĩ phật giáo pak tỉnh Kiên Giang jeng biak sangka tal bruk prong ini di taneh aia. Tuk vak tapa Gíao hội Phật giáo Việt Nam tỉnh Kiên Giang hu pathau khan tal bhap bani phật tử saong tăng ni tui njauk jalan ngak di giáo hội nan lac bangsa, chủ nghĩa xã hội, jia tame bruk pan akaok ba jalan saong bruk hadah krah di Đảng.

Đại đức Thích Minh Nhẫn, Phaok ban gam lac Chánh thư ký Giáo hội Phật giáo Việt Nam tỉnh Kiên Giang brei thau: dalam nhiệm kỳ bloh urang pal akaok Đảng saong Karja hu ba taneh aia Việt Nam tagok labik dang glaong angaok dunya. Ndom tal  Việt Nam urang negar langiu thei jeng mong mboh hu sa taneh aia salih bahrau, sa taneh aia daok patagok. Đại đức Thích Minh Nhẫn payua hatai jia di drei tal nyaom roya yau ini: Tui bruk di dunya, thei jeng caong khin cakrok patagok kinh tế piah dalam tuk ba drei tame, drei dang samu haong dom taneh aia karei. Dua tra nan lac chủ quyền tasik pulao njauk khik hu tamo. Tuk halei halau janeng saong bhap bani jeng jia tame Đảng saong Karja dalam mbang nyaom roya ini meda palih ruah hu dom urang hu bản lĩnh chính trị piah pan akaok  taneh aia dalam tuk mbeik drei tame dunya.

      Di bhum atah bayah palei An Minh di tỉnh Kiên Giang, ong Đỗ Xuân Chính biak jia tame buk pal akaok hadah hadai di Đảng Cộng sản Việt Nam. Hu dua kadha bo ong caong tame nhiệm kỳ bahrau meda ngak biak siam nan lac khik caga chủ quyền pulao tasik saong ba kinh tế - xã hội di Việt Nam patagok khang, kajap. Ong lac: Bhap bani biak caong khin urang pal akaok taneh aia hadei ini, sa nan lac kadha an ninh quốc phòng, dua tra lac patagok kinh tế tui jalan cộng đồng ASEAN. Urak ini drei hu yam tame cộng đồng ASEAN blaoh bo ngak mbang lah urang ye  kinh tế taneh aia kan kandah. Hatai jia lac Đảng drei ba jalan hu siam jang. Đảng drei biak siam, kayua bhap bani, kuhria ka bhap bani nan ye bruk pal akaok tuk halei jeng kayua quyền lợi di bhap bani.

Meng hatai jia tame, urang jakar, urang đảng saong bhap bani dalam tỉnh Kiên Giang caong lac Nyaom roya mbang ka 12 di Đảng meda ba tabiak hu dom jalan ngak  njauk ba taneh aia drei patagok taong abih gah, nao samu haong dom taneh aia ayut sahabat angaok dunya./.