Bhap bini caong khin peih ngak piah jien daong ka urang yam tapa kan kandah kayua jit ruak

  Diuk rai meng bruk blei ve chai, amuk Trần Thị Tuyết (daok di quận Phú Nhuận) brei thau, jaik 2 bilan ini mai tuk TP.HCM ba tabiak dom jalan ngak piah pa-atah di gauk piah pacang caga jit, ve chai amuk blei hu yaok harei biak takik. Harei rilo abih, amuk Tuyết jeng duah hu jaik 30.000 đồng min. Kayua yau nan ye, tuk mehit ban raya daong ka menuac ngak bruk tự do lahik bruk ngak kayua Covid-19, dalam nan hu dom menuac pablei vé số, peih radaih xe ôm atau blei ve chai yau amuk hu daong 50.000 đồng sa urang sa harei, kuhria meng di tuk TP.HCM pandar Sarak 15 di Thủ tướng Rajaei ka jalan pacang caga jit ruak, amuk Tuyết mboh biak uan tabuan:“Uan tabuan lo. Meyah hu daong yau nan biak uan tabuan. Kayua dom harei drei nao blei oh hu hagait, atau labik drei daok njauk pacang veik, oh nao blei hu, ye eik lisei. Min meyah drei hu 50.000 đồng jien daong nan, drei diuk hu, oh daok huac eik lisei".

Jeng dreih yau amuk Tuyết, ong Hà Thái Bảo, sa urang peih radaih xe ôm daok di quận Bình Thạnh biak uan tabuan saong daok caong hu jien daong ini. Min ong Bảo suh sah lac dom menuac ngak bruk tự do yau ong, ngak habar piah taduan hu jien daong:“Dahlau daih, dahlak peih radaih sa harei jeng duah hu 300.000 tal 400.000 đồng. Daok urak ini duah 100.000 đồng lac biak kan. Radaih xe ôm urak ini jeng takik menuac nao kayua huac jit ruak. Dahlak jeng caong khin samar taduan hu jien daong. Min dahlak ka oh thau ngak habar piah hu taduan jien daong nan.”

Lac darak pasar meng kan mai di quận Bình Thạnh daok jaik Quận 1, darak pasar Thị Nghè dahlau daih hu biak rilo menuac tame tabiak. Min jaik 1 bilan mai ini, darak pasar brei sạp saong po pablei, salih gauk harei pablei, harei padeih piah patakik menuac pablei salih, kayua yau nan ye menuac nao pasar jeng takik tui. Rilo sạp tuan bảng pablei sạp. Tuk mehit TP.HCM brei daong ka dom urang pablei salih di dom darak pasar meng kan dalam mbang ka 2 ini, urang halei jeng caong lac pok jien daong samar tal tangin mikva. Amuk Trương Bích Liên, sa urang pablei salih di darak Thị Nghè brei thau:“Meyah hu yau nan, lac biak siam kayua dalam darak pasar ini, rilo sạp kreik pabah mbang 2 bilan ye, hu dom urang daok hu anek mbang bac, jeng bhian tame gaok mban khik iek darak pasar likau trun jien je. Drei jeng caong khin lac sarak nan samar daong ka dom urang pablei salih oh patuah njauk padeih pablei daok di sang, kuhri kuhria biak rilo bruk”.

Sa-ai Phan Chánh Phi, po sa labik pablei salih pandap điện lạnh di quận Gò Vấp lac sa dalam dom menuac hu taduan 2 triệu đồng meng pok jien daong mbang ini di TP.HCM. Sa-ai biak caong khin samar taduan hu jien daong: “Kol dahlak gaok kan kandah kayua jit ruak, oh peih pabah mbang pablei salih hu. Labik pablei hu 4 urang ngak jeng lahik bruk ngak saong daok bayar jien pah labik yaok bilan. Biak kan kandah ngan saong kol dahlak. Urak ini mehit hu pok jien daong di karja, yaom lac rilo atau takik, jeng trun hu meneing kan kandah tuk ini. Biak caong hu bruk daong di karja”.

Pok jien daong 886 tỷ đồng mbang ka 2 di TP.HCM hu ba tabiak dalam tukvak ini, lac biak njauk. Bhap bini caong khin dom pakat, dom gah haong karja palei samar peih ngak piah jien daong nao tal tangin njauk menuac njauk urang, daong ka urang yam tapa kan kandah kayua jit ruak./.

Urang lang: Mousa Phương – 10/07