Bruk drak samu gauk sa janih pajaih saong sa tukvak daok daong paglaong siam mekre dalam bruk mong iek, pacang caga jit ruak

Sa-ai Chamaléa Khuê lac sa dalam 58 sang akaok mereip di xã Phước Chính, huyện Bác Ái, tỉnh Ninh Thuận ngak padai angaok mblang hamu prong. Meng dom laok hamu sit di rilo labik karei di gauk, urak ini hu sa-ai li-ua, ramik ngak ar jeng 7 sào hamu. Sa-ai Chamaléa Khuê biak bui sambai tuk padai pala hu gam gam tagok, meng 4,5 tạ sa sào thun akaok mereip, tal urak ini hu labaih 6 tạ sa sào:“Năng suất tagok dua, klau mbang tuk drei ngak mblang hamu prong. Dahlau daih drei ngak oh tui mùa vụ, min urak ini ngak samu gauk, mboh hu jang”

Mblang hamu prong di xã Phước Chính, huyện Bác Ái hu ngak angaok mblang taneh 24ha. Oh lac ngak samu bruk pala drak, mikva Raglai xã Phước Chính daok hu tacei pato dom ilamu saong ba mac moc tame ngak, meng bruk trun pajaih tal tuk yuak saong pablei padai. Ong Nguyễn Đức Nghĩa, Akaok Kapul urang nong huyện Bác Ái, tỉnh Ninh Thuận brei thau:“Bruk ba mac moc tame ngak hu daong patrun jien buh tame ngak, meng ngak taneh tal yauk padai, daong patrun yaom jien buh tame saong paglaong jien mek tame ka baoh sang. Meng bruk peih ngak mblang hamu prong di Phước Chính, rilo xã, rilo sang hu tut angan tame saong caong khin hu daong pasiam mblang hamu karei piah ngak mblang hamu prong, ngak ka bruk ngak nong hu siam mekre jang”

Jak jeng di bruk ngak padai angaok mblang hamu prong hu daong ka mikva Raglai salih bahrau jalan ngak, bo daok hu daong ka palei paglaong tiêu chí jien mek tame dalam padang ngak palei pala bahrau. Bruk drak samu gauk sa janih pajaih saong sa tukvak daok daong paglaong siam mekre dalam bruk mong iek, pacang caga jit ruak, patrun jien buh tame ngak. Amuk Patau Asah Thị Dem, Bí thư Đảng ủy xã Phước Chính, huyện Bác Ái, Ninh Thuận, lac: “Peih ngak mblang hamu prong, mikva pandar mac moc tame ngak, paglaong jien mek tame, năng suất glaong jaik dua, klau mbang. Bruk pandar ilamu kỹ thuật tame dalam bruk ngak jeng hu daong paglaong rai diuk di mikva dalam tukvak tapa”

Hadei di peih ngak iek siam jalan ngak mblang hamu prong di xã Phước Chính, huyện Bác Ái tacei pato dom puk palei pambak prong tabiak di dom xã Phước Tiến, Phước Thắng saong Phước Tân, rilo meng lac ngak padai saong ratak naih. Tui ong Ngô Thanh Lâm, Phaok akaok UBND huyện Bác Ái, t.Ninh Thuận, karja thau lac, ini meda lac jalan peih tabiak ka dom puk palei bhum bangsa Raglai tabiak truh kathaot khang kajap:“Khaol dahlak padang mblang hamu prong, parabha dom mblang taneh ka nyu laghaih, hu mblang taneh ginup prong, ba mac moc tame ngak. Urak ini, bhap bani ngak padai samu gauk, mikva yuak meng mac moc, meng nan jien buh tame ngak trun biar saong hu kein laba glaong”

Pambuak gauk, pambuak bruk pala, ngak haong pablei kaya nong, padang mblang hamu prong daok lac jalan nao njauk. Jak jeng di bruk ngak tui jalan mblang hamu prong di xã Phước Chính hu daong ka mikva Raglai huyện Bác Ái, tỉnh Ninh Thuận jhul khang bruk pataom veik mblang hamu, salih bahrau jalan ngak, daong paglaong jien mek tame ka bhap bani labik ini./.

Urang lang: Jasi – 11/11