Ong YSA daok di Phường 13, Quận 3

Lac labik hu 54 bangsa adei sa-ai hu mbaok di grauk dom quận, huyện, ban Thủ Đức, dalam luac tukvak labaih 4 bilan pa-atah di gauk, yaom lac bhap bini daok rilo kan kandah, min hatai anit ranam gauk tuk halei jeng khang kajap. Sa-ai Nus Layla bangsa Cam daok di  quận Phú Nhuận, oh ka abih druat druai tuk  khan brei thau ka tukvak meng blaoh: “ Tuk pa-atah gauk, raidiuk rahra gaok biak rilo kan kandah, abih di nyu lac dom urang kan kathaot, dom urang oh daok prein ngak mbang. Yau nan min, adei saong mikva urang bangsa takik daok di phường 17, quận Phú Nhuận tuk halei jeng hu sangka  daong brei brah, kadung an sinh, pandap mbang huak… piah tani tanat raidiuk, taduan hu ginup dom paok alin hadiah”.

Dreih yau nan, ong YSA daok di phường 13, quận 3 khan lac: “Sang hulin njom ruak Covid-19, hu nao taong ruak di Sang iek ruak dã chiến 12. Hu dom y, bác sĩ abih hatai daong iek ruak, khol dahlak abih ruak saong gilac veik mai sang. Karja pak ini tuk halei jeng sangka, iek glang saong ba mbuan lagaih abih ka khol dahlak, meng pandap mbang yaok harei tal jru tavao menyum”.

 Tui jalan ngak lac “piah oh hu urang halei daok veik gah likuk”, gam saong jalan sangka siam ka bhap bini bangsa takik, bruk an sinh xa hoi saong daong y te ka mikva tuk halei jeng hu karja sangka. Langiu bruk daong brei ginup dom kadung an sinh, pandap panda…ka dom urang njom Covid-19, mikva tuk halei jeng hu dom urang jakar y te  bhian mai rivang, iek ruak, taong ruak di sang saong cấp cứu ba tame sang iek ruak ka dom urang ruak trak.

Mban Bangsa Ban raya bhian pambuak bruk haong dom kapol nyaom, Mặt trận negar pak ini nao rivang, alin pandap, daong brah, pandap mbang ka urang bangsa takik dalam tuk pa-atah di gauk, ngan saong labaih 20 tấn brah saong labaih 500 paok pandap. Langiu di nan, daok hu biak rilo paok pandap saong dom pandap daong an sinh xa hoi meng dom kapol nyaom ngak pahala, agama daong brei ka mikva.

Dua bilan tapa blaoh, sa-ai Nguyễn Thị Tuyết bangsa Lo daok di quận 10 jeng daok druat druai tuk ndom tal harei bilan bo sa-ai sahaneng lac oh yam tapa hu. Sang sa-ai Tuyết lac sang kan kathaot. Sang hu 5 urang ye 4 urang njom Covid-19, dalam nan hu sa-ai, hu ruak dahlau dalam rup. Dalam tuk kan kandah yau nan, pasang sa-ai lac  menuac ngak raong sang, min oh tapa hu. Sa-ai Tuýet brei thau: “Nao taong ruak mai, pasang plang lahik, dalam sang oh ngak tabiak jien dalam tuk pa-atah di gauk, min hu karja pak ini sangka bhian daong brei pandap mbang saong ginup dom paok daong tani tanat raidiuk. Abih tukvak pa-atah di gauk, hu UB bangsa  saong dom urang ngak pahala sangka daong. Yaok janih yaom lac sit hu urang daong ye sang dahlak jeng iek praong.”

Tui yaok pataom oh ka ginup abih, mbiah tal abih bilan 9 thun 2021, Ban raya HCM hu labaih 2.000 urang njom Covid-19 lac urang bangsa takik, dalam nan rilo meng lac urang hu raidiuk kan kandah. Piah klak rabha kan kandah, pachreih bhap bini gilac veik mai haong raidiuk siam mekre birau, mBan Bangsa  Ban raya HCM pambuak saong dom quan, huyen, Ban Thủ Đức peih bruk nao rivang, alin pandap di UB Bangsa ka dom sang urang bangsa takik kan kathaot, njom Covid-19. Gam haong nan, jak ba dom gah ngak pahala, dom kapol nyaom xa hoi hu rilo danak dak daong brei, ba mbuan lagaih  ka mikva hu gilac veik mai haong raidiuk siam mekre birau. Dahlau di nan, Uy ban MT negar  Ban raya  pambuak saong Mban Bangsa saong karja dom palei  alin hadiah labaih 100 baoh mac tính bảng, laptop ka anek kamuan urang bangsa takik, daong dom adei hu lagaih dalam bruk bac da-a  online./.

 Urang lang: Ai Nghiem -27/10/2021