Bình Thuận hu buh tabiak yaok ratuh tỷ đồng padang ngak jalan mbak nao mai ka bhum bangsa, bhum ceik

Meng dom saman ini mai, bhap bini dom bangsa takik di Bình Thuận daok pablak haong urang Kinh, ngak jeng bruk jum pataom bangsa. Min kayua rilo kadha oh ka lagaih, KTXH bhum bangsa, bhum ceik gaok oh takik kan kandah, bruk cakrok daok suai damuai duk saong dom labik karei dalam tỉnh. Meng nan, Tỉnh ủy, HĐND, UBND tỉnh Bình Thuận hu tabiak rilo sarak, danak dak, jalan ngak piah patruh eik patrun kathaot, paglaong raidiuk di bhap bini dom bangsa takik.

Pagap yau danak dak 135, tapa rilo thun peih tabiak ngak, Bình Thuận hu buh tabiak yaok ratuh tỷ đồng padang ngak dom kraong, ribaong ba ia ka mblang hamu, jalan mbak nao mai, sang bac, bilai iek ruak... ka bhum bangsa, bhum ceik. Rilo danak dak ba tame pandar pabak hu bruk patagok saong pasiam raidiuk bhap bini dom palei, dom xã biak kan kandah saong bhum urang bangsa takik. Tal urak ini, taong abih dom xã jeng hu jalan tuh menyek nao tal pasak xã; taong abih dom xã hu pabak riyak langik piah iek hu tivi, pang hu rayo, taong abih dom xã, palei hu jalan điện negar saong hu 98% dom baoh sang hu pandar điện negar, labaih 88% dom baoh sang hu pandar ia hacih… Meyah akaok thun 2016, dalam tỉnh hu 17.162 sang kathaot, samu 5,81% ye tal akaok thun 2020, dom sang kathaot daok 1,92% min

Gam haong dom sarak daong gah KTXH, bruk bac da-a di anek kamuan urang bangsa takik dalam tỉnh jeng biak hu sangka. Bruk pato pakai di bhum bangsa takik hu glaong jang dahlau. Dom anek saih nao bac dak harei dak rilo, ilamu dalam bhap bini hu patagok, dom urang hu ilamu lac urang bangsa oh padeih patagok. Dalam bruk khik ramik, patagok ilamu dom bangsa, gah Ilamu hu padang dom kapul daoh tamia bhap bini Cam, kalup kapul daoh Then di bangsa Nùng; ieu pataom dam dara tame dom tal pato me-in dom alat ragam bangsa yau ye: taong  Ghi năng, paoh Paranưng, yuk Saranai, daoh ragu daoh bhap bini, tamia Cam.

Anak nyaom roya pakat negar mbang ka 13, bhap bini tỉnh Bình Thuận – dalam nan hu mikva bangsa takik caong lac dom bruk gah pala hacih, salamat, chế biến hadei di yuak, paik, pambuak gauk saong pablei tabiak negar lingiu, pablei kaya nong... samar hu dom bộ, ngành di TW, pakat ủy Đảng, karja palei sangka peih ngak yau gauk, kein laba jang, hu rilo sarak, jalan ngak pachreih pandar ilamu bahrau tame bruk ngak mbang, pala drak, ba tabiak rilo bruk ngak hu yaom kinh tế glaong. Mikva caong lac Nyaom roya mbang 13 di Đảng daok patagok bruk jum pataom, sa hatung hatai haong gauk, ba tabiak dom jalan ngak bahrau. Abih di nyu nan lac, Đảng daok patui jalan pato, pasram dam dara bangsa takik, rik prein yava tame bruk patagok di puk palei.

Ala bruk pan akaok ba jalan tapak saong taong abih gah di Đảng bộ tỉnh, bhap bini dom bangsa takik gam haong bhap bini dalam tỉnh Bình Thuận kham merat yam tapa kan kandah saong mek hu dom jak jeng praong dalam dom gah, ngak brei salih bahrau raidiuk, bruk ngak mbang ngak huak di tỉnh. Uan tabuan tuk mboh mbaok meta taneh ia dak harei dak salih bahrau, abih di nyu lac raidiuk bhum palei pala, bhum bhap bini bnagsa takik hu hadah hadai tagok, mikva dom bangsa di Bình Thuận abih hatai jia lac Nyaom roya mbang ka XIII  di Đảng pilih ruah dom menuac naih gheih, siam hatung hatai, abih drei ka bruk ngak, kak kajap jang haong bhap bini bhum kan kandah, padang hatai jia saong prein yava bahrau piah ka taong abih urang Đảng, taong abih bhap bini, taong abih urang lin di drei khang takai yam tapa kan kandah, ba taneh ia tame sa saman cakrok patagok bahrau./.

Urang lang: M. Phương – 24/01