Saigon Co.op daok brei thau lac, jaik 300 dom siêu thị Co.opmart, Co.opXtra, Co.op Food di bal raya HCM hu tame pandap rilo jang labaih 30% dut haong dom harei dahlau. Dalam nan, rilo meng lac ralow that, baoh menuk ada, njam patam baoh kraoh... Urak ini, meyah kuhria gam dom pandap daok khik piah rilo yau brah, mì, pandap thu, pandap caik la-ar, rilo la-ar, pandap grap tanat yaom kaom... meda pablei tani tanat ka darak pasar dalam 3 tal 6 bilan tal.  

Hu thau, hadei di tuk dom harak adat pajeng ba hu dom jabat pambuak tal ngak brei mbuan lagaih, dom pandap panda pajeng mai dom siêu thị hu tagok biak rilo, anak meta pabak hu bruk bruk blei mbang di bhap bani bal raya HCM.  

Ndom ka jalan parabha pandap panda, langiu di bruk pablei pandap di dom siêu thị, Saigon Co.op daok patagok bruk pablei pandap angaok dom ứng dụng (app), blah web cooponline.vn, pambuak haong jaik abih dom ứng dụng công nghệ di dom hãng saong daok pambuak bruk haong dom kapul nyaom di puk palei brei phiếu “nao darak daong ka bhap bani”. Di dom  labik njauk pacang veik, brei pambuak bruk haong tổ dân phố padang angan nao darak daong ka bhap bani atau pabak brei combo 5 - 10 janih pandap pandar yaok harei ba tal yaok baoh sang. 

Pagap yau bruk pambuak gauk di UB bhap bani haong Quận đoàn Quận 6 di siêu thị Co.opmart Phú Lâm daong ka bruk blei pandap hu tani tanat. Tui nan, UB bhap bani haong Quận đoàn Quận 6 hu kapul urang halan hatian pambuak bruk haong menuac di Co.opmart Phú Lâm “nao darak” blei pandap yaok harei 2 mbang ka bhap bani di dom phường, piah ka bhap bani oh nao blei tapak di siêu thị.

Meda lac pandap panda oh tuk halei kurang min dom siêu thị brei hu bruk pambuak gauk daong blei pandar abih hatai di yaok rahra yau blei pandar mbiah, ginup, njauk haong bruk pandar piah patrun bruk meblah gauk, ngak njauk tui tacei pato khik kajap salamat tuk nao blei di siêu thị piah patrun bruk mbuan njaom mbak jit ruak, saong njauk blei online piah takik manuac dalam siêu thị, pachreih tui bruk pa-atah gauk. Bruk ngak njauk tui 5 paka di Mentri Y tế di dom labik blei pandap mbang menyum dalam tukvak ini biak hu yaom glaong kayua ini lac labik pabak pandap mbang menyum prong abih urak ini, njauk ngak catang tui piah patrun bruk njaom mbak nao mai di dom labik pablei ini, atau dom F0 hu mbaok tame blei pandar meda ngak ka siêu thị njauk kareik pabah mbang piah dut iek abih gauk. 

Kayua yau nan ye, bhap bani juai huac kayua pandap panda kaya mbang oh tuk halei kurang, bruk prong abih di urak ini nan lac juai huac, blei mbiah, ginup, njauk pambuak bruk saong ngak njauk tui tacei pato di dom siêu thị piah pandap panda kaya mbang hu pablei ka rilo menuac lac dak siam./.

Urang lang: Jasi -20/7/2021