Dalam luac dak rai sajarah, bhap bani bangsa Khmer tuk halei jeng gun pataom, kak kajap haong dom bangsa adei sa-ai dalam dak padang saong pacang khik palei negar. Oh njauk lac tok pambuak gauk dalam jaman mesruh metak, dalam tukvak sron mbon, bhap bani dom bangsa dalam tỉnh Trà Vinh tuk halei jeng daong gauk meng dom bruk sit dalam rai diuk tal dom bruk prong di bol bhap rah ra yau: ngak jalan, padang ngak sang bac, rik daong kadung jien pachreih bacv.v... Daok dalam rai diuk yaok harei, mikva tuk halei jeng daong  gauk dalam bruk ngak mbang cak rok patagok kinh tế baoh sang. Pagap yau baoh sang ong Đặng Văn Hùng daok di xã Thạnh Hòa Sơn, huyện Cầu Ngang, sang ong hu labaih pluh kong taneh, mboh rai diuk sang drei hu tani tanat, min kurang manuac ngak, diuk pasang ong brei ka mikva Khmer dalam palei njim taneh piah pala njam patam. Pabak veik, mikva dalam palei jeng mai daong tuk ong caong khin. Ong Đặng Văn Hùng brei thau: “Dahlak hu brei ka mikva njim taneh piah pala ratak low. Pak ini urang bangsa takaik biak rilo, drei klah rabha haong mikva. Meng kan diah ngak padai hu vụ 6 bilan, urak ini sa vụ lac 3 bilan 10 harei. Bruk hagait dahlak jeng njim mikva jaik taphia, dahlak ngak hagait truh. Meng hu yau nan jeng lagaih, ngak jeng hu laba”.  

Meng pren khang di bruk gun pataom nan hu daong ka tỉnh Trà Vinh tuk halei jeng khik kajap an ninh chính trị bhum palei. Bhap bani bangsa takik dalam tỉnh tuk halei jeng jia tame jalan ba di Đảng saong Karja, sahanang hatai ngak mbang, paglaong rai diuk. Urak ini, tỉnh oh daok baoh sang kathaot mbang tui sarak brei peih ngak dahlau ka urang hu buh rilo pren yava ka taneh ia; baoh sang kathaot tui tanut kathaot rilo gah tal ini daok 1,67%, baoh sang kathaot lac urang Khmer trun daok 4%; hu 5/9 huyện mek hu tanut chuẩn saong ngak blaoh bruk padang ngak palei pala bahrau. Ong Thạch Khôl, sa urang jakar padeih hưu daok di xã Kim Sơn, huyện Trà Cú bui sambai khan lac:  “Hu bruk sangka iek glang tal rai diuk di bhap bani, ndom ka gah ngak mbang pala drak ye hu peih rilo tal pato pathram ilamu, salih pajaih nan ye năng suất di nyu biak glaong. Urak ini hu sang bac, hu balai y tế, hu tatua; dahlau harei peih paha lac jaik abih sang tak hala, urak ini sang thei jeng padang ngak khang kajap”.

Urak ini Mặt trận Negar Việt Nam dom pakat dalam tỉnh Trà Vinh daok jul pakhang bruk pathau khan, jak ba bhap bani peih ngak siam bruk jak ba “Taong abih bhap bani gun pataom padang ngak palei pala bahrau, ban ilamo” pambuak haong bruk patrun kathaot khang kajap, rik daong gauk peih ngak siam bruk pakacah “Trà Vinh gam haong taneh aia padang ngak palei pala bahrau”, “Grauk labik dalam negar sa tangin haong gauk brei ka urang kathaot – Oh caik thei njauk klaak veik gah lakuk”…

Ong Phạm Tiết Cường, Phaok akaok Ủy ban Mặt trận Negar Viẹt Nam tỉnh Trà Vinh brei thau:

“Bruk gun pataom taong abih bangsa hu jeng bruk praong, brei ngak gam gam di Đảng bộ saong bhap bani tỉnh Trà Vinh saong jeng lac kadha brei ka bruk ngak cách mạng di tỉnh dalam tuk vak anak tal”.

Tuk daok diuk Wa Ho bhian hu panuac kakei: “Dahlak kakei bhap bini gun pataom biak catang saong biak prong. 5 tuk tangin hu tuk katut tuk atah. Min katut atau atah jeng daok dalam sa palak tangin. Dalam dom triệu urang jeng hu urang ini urang diah, min urang ini atau urang diah jeng lac sa but pajaih haong gauk. Yau nan ye drei njauk peih hatung hatai. Drei njauk thau lac  anek Lạc taco Hồng ye thei jeng hu takik atau rilo hatai ranam taneh aia. Hu yau nan meng jeng prong gun pataom, hu prong gun pataom ye harei hadei meng hadah mbaok hadah meta”. Panuac ndom di Wa hu jeng jalan ka taong abih bruk ngak di Đảng bộ, karja saong dom bangsa adei sa-ai dalam tỉnh Trà Vinh./.

Urang lang: JASI -15/12/2021