Di xã Ân Nghĩa, huyện Hoài Ân, tỉnh Bình Định thei jeng thau radiuk kan kandah di sang sa-ai Đinh Thị Hằng, umo 43 thun. Pasang di sa-ai ruak patuk hanek, luac thun ruak kik oh ngak bruk trak hu. Sa-ai Hằng nao mesre  grauk labik piah iek ruak ka pasang saong raong 2 urang anek mbang bac. Thau ka bruk kan kandah nan, karja xã ba sang ini tame angan baoh sang kan kathaot piah hu mbang tui dom sarak daong di Karja yau anek bik nao bac oh abih jien, brei saoh BHYT, hu mesre phun jien piah ngak mbang…Hadei di rilo thun kham merat, tal urak ini, bruk ngak mbang duah jien hu siam tagok, prein yawa di pasang sa-ai jeng hu siam jang, sa-ai Hằng jeng hu jien mek tame tani tanat meng bruk raong manuk, pabui binai saong bein keo…Bruk ngak mbang tani tanat, thun blaoh, sa-ai Đinh Thị Hằng ngak harak likau tabiak truh angan baoh sang kathaot: “Rilo menuac daok rambah jang drei. Urak ini, drei brei veik ka urang karei. Blaoh urang nan kham merat yam tagok blaoh brei veik ka urang karei tra”.

Tui bruk ba tabiak di karja, baoh sang kathaot hu mbang tui dom sarak daong ka bruk iek ruak, anek bik nao bac oh abih jien, hu daong brei mesre phun jien padang ngak sang daok…Anak meta mboh lac, daok hu dom baoh sang kan kandah oh hadom min daok dalam angan baoh sang kan kathaot. Jeng hu oh takik baoh sang urak ini ngak mbang hu tagok min oh khin tabiak truh baoh sang kathaot. Ngan saong dom baoh sang kathaot di xã Ân Nghĩa, langiu di bruk kham merat yam tagok patruh kan kathaot, mikva daok pahadar gauk brei sahaneng tal bruk klah rabha saong daong ka dom urang kan kandah jang drei. Nan jeng lac hatai sahaneng di ông Nguyễn Trọng Yêm saong muk Bùi Thị Xuân tuk halan hatian likau tabiak truh angan baoh sang kan kathaot di xã Ân Nghĩa: “Urak ini, mboh baoh sang hu mbiah ginup ye oh daok hagait kan kandah tra nan ye caik veik ka dom urang karei hu mbang tui. Brei veik ka urang karei piah drei hu tapa truh kathaot, drei kham merat ngak, piah hadei ini urang jeng hu dreih yau drei”. 

Xã Ân Nghĩa, huyện Hoài Ân, tỉnh Bình Định urak ini hu labaih 3.000 baoh sang, dom baoh sang kan kathaot thun 2019 labaih 22,7%. Thun blaoh, anak dom kan kandah kayua jit Covid-19 min baoh sang kan kathaot di labik ini trun jaik 11%. Dalam 2 thun meng blaoh, xã Ân Nghĩa hu 16 urang halan tian likau tabiak truh angan kan kathaot khang kajap. Muk Trần Thị Tình, Phaok akok UB bhap bini xã Ân Nghĩa, huyện Hoài Ân, tỉnh Bình Định brei thau: tuk dom baoh sang daok kathaot  likau tabiak truh angan baoh sang kathaot nyu pachreih ka dom baoh sang kathaot karei kham merat ngak mbang yam tapa truh kan kathaot.

“ Ini lac sa bruk hu rilo menuac ngak tui. Yau thun 2019, hu dom baoh sang likau tabiak truh angan baoh sang kathaot saong ngak brei manuac sia sahaneng tal biak rilo. Ngan saong dom baoh sang karei daok kathaot ye urang kham merat yam tagok meng bruk raong glang atau pala drak piah cakrok ka baoh sang drei”.

Bruk bhap bini halan hatian likau tabiak truh kan kathaot oh lac brei mboh hatai kham merat yam tagok bo daok ndung bak makna klah rabha, daong brei ka gauk. Ong Trần Văn Thơm, Phaok akok UB bhap bini huyện Hoài Ân, tỉnh Bình Định brei thau, oh ngak piah mek angan siam, karja pak ini pasang iek biak bruk tani tanat tuk brei baoh sang halei nan tabiak truh angan sang kathaot, kayua lac tuk urang kathaot gilac veik meda ngak kandah praong tal bruk patruh iek patrun kathaot khang kajap di palei.

“Tuk baoh sang kathaot ngak harak likau tabiak truh angan baoh sang kan kathaot ye khol dahlak brei pasang eik. Tapa nan meyah mboh lagaih ye brei tabiak. Saong tapa yaok thun pasang iek veik baoh sang kathaot likau tabiak patruh kan kathaot nan, meyah mboh lagaih ye brei patagok daok oh ka lagaih ye brei daong veik.”

Urang lang: Aí Nghiem - 1/4/2021