Bhum Dong Nam Bo hu mong lac labik patagok ka jalan mbak 

Talei pambuak bruk di TP.HCM haong Đồng Nai, Bà Rịa – Vũng Tàu biak khang kajap saong hu yaom biak glaong kayua yaok tỉnh, ban hu labik dang karei di gauk, min pambuak gauk catang oh neh rabha hu. Kayua yau nan ye, jalan pambuak pagam 3 tỉnh ban ini, lac rak darah praong dalam bruk ngak mbang pablei salih, pajeng ba pandap panda. Bà Rịa – Vũng Tàu lac pabah mbang jalan tasik pajeng ba pandap panda dunya, hu pabah lamnge Cái Mép – Thị Vải daok hu Trung ương sangka buh jien tame ngak. Đồng Nai hu dom labik ngak kong, saong TP.HCM nan lac labik pataom pandap panda, pasak kinh tế di bhum. Urak ini jalan pambuak pagam dom tỉnh bani ini daok laik tame bruk tapa prein di nyu. Bruk pajeng ba pandap panda meng dom labik ngak kong di Long Thành, Nhơn Trạch tal pabah lamnge Gò Dầu (jeng daok dalam tỉnh Đồng Nai) atau tal pabah lamnge Cái Mép – Thị Vải njauk nao tapa jalan Roya 51. Kayua tapa prein, gar jalan miat, nan ye jien ndo brei ka logistics jeng tagok glaong, ngak kan kandah ka doanh nghiệp dalam bruk meriak gauk. Sa container meng Nhơn Trạch nao Cái Mép abih 4,3 triệu đồng ngan haong jalan tok atah 40km, daok meyah meng TP.HCM trun ye jien logistics daok chit jang nao  Singapore.

Dalam bhum kinh tế prong gah Meraong, danak dak mblang kapal haok Long Thành (Đồng Nai) hu makna biak prong, peih jalan pambuak gauk meng jalan kapal haok, taphia dom jalan radaih saong dom pabah lamnge. Meyah tukvak peih ngak njauk haong bruk ba tabiak, thun 2025 mblang kapal haok ini meda ba tame pandar vaktu 1. Jalan katut di abih pambuak pagam mblang kapal haok Long Thành haong ban raya TP.HCM nan lac jalan nduac samar TP.HCM – Long Thành – Dầu Giây urak ini jeng tapa prein.  

Ong Phan Công Bằng – Phaok akaok Sở Jalan mbak pajeng ba TP.HCM taong yaom, urak ini meng thiết kế 4 jalan radaih, jalan nduac samar ini oh pabak hu dalam harei hadei tuk mblang kapal haok Long Thành ba tame pandar. Kayua yau nan ye njauk kuhria veik piah peih prong jang:

Urak ini Mentri Jalan mbak pajeng ba daok roh duah piah peih prong jalan ini. Tui hatai saneng di dahlak njauk peih prong 8 tal 10 làn. Tukvak ini meda peih prong oh caik dui atah tukvak jang tal vaktu 3 tra. Bruk ini lac bruk njauk ngak"

Tui po buh jien tame ngak danak dak peih prong jalan Roya 51 lac Cty cổ phần cakrok patagok jalan nduac samar Biên Hòa – Vũng Tàu (BVEC), thiết kế tuk akaok mereip jalan ini hu prein 12.000 mbang radaih nao mai harei melam. Tal puac thun 2020, radaih kuhria rah tapa tagok jaik 3 mbang. Daok dalam tukvak tabung glaong padeih lễ, yaok harei hu jaik 50.000 radaih nao tapa balai thu phí T2 (Long Thành, Đồng Nai). Ong Đinh Hồng Hà – Akaok BVEC brei thau: Bruk buh jien tame ngak jalan nduac samar Biên Hòa – Vũng Tàu piah parabha meneing dom radaih mai angaok jalan Roya 51 nan lac bruk njauk ngak samar drah. Yau nan min, labaih 10 thun tapa bo jalan nduac samar Biên Hòa – Vũng Tàu jeng oh ka ngak hagait.

Ndom ka jalan buh jien tame ngak, ong Hà brei thau lac jalan ngak PPP (pambuak bruk công – tư) biak kan kandah ngan haong dom bruk di anak meta. Pagap yau danak dak BOT jalan roya 51, BVEC hu 6 gilang pariak buh jien tame daong ngak min biak kan kandah dalam bruk ba brei phun jien piah buh tame ngak:

Piah jhul tagok bruk ini, njauk salih tapa đầu tư công nan ka meng samar drah hu. Meyah hu salih  jalan đầu tư công ye njauk caik hatai tal bruk peih paha mbaok taneh. Jalan roya 51 lac jalan đô thị, nan ye bruk ba-yar jien ka mblang taneh mek ngak jalan nduac samar Biên Hòa – Vũng Tàu gam gam haong jalan roya 51 nan lac biak kan kandah".

Tiến sỹ Trần Du Lịch – urang daok dalam Tổ tư vấn kinh tế di Thủ tướng ndom lac: Bruk suai damuai peih ngak jalan pambuak pagam ngak ka bruk cak rok patagok di bhum kinh tế praong gah meraong oh ka yau hatai caong khin. Bruk kan di abih lac meng phun jien buh tame ngak hu parabha ka dom tỉnh, ban yau urak ini ye oh langyah hu bruk jalan mbak pambuak pagam bhum. Ong Lịch ndom lac, jak ba urang buh jien tame ngak tui jalan PPP hu labik gar tavak lac adat di Karja oh brei rik daong tapa 50% danak dak. Bo meyah danak dak labaih 30 thun meng mek hu veik phun jien ye oh hu urang buh jien tame ngak, oh hu gilang pariak halei daong ngak. Kayua yau nan, ong Lịch caong khin njauk peih talaih ka bahu jalan ngak PPP: 

"Njauk ramik veik labik prong abih dalam Hukum Đầu tư công, nan lac Karja rik tame hadom tui tukvak mek veik phun jien di danak dak. Yaom lac dalam 100 đồng phun jien buh tame ngak, manuac urang rik tame 30 – 40% jeng hu, siam jang Karja buh jien tame ngak taong abih"

Jalan mbak nao mai nan lac kadha dang akaok piah cakrok patagok bruk pablei salih nao mai, dui pachreih urang buh jien tame ngak mbang. Sa bhum taneh biak hu yaom glaong yau bhum Đông Nam Bộ oh njauk having akaok miat dalam langyah bruk gar jalan nao mai. Piah jhul samar bruk cak rok patagok jalan mbak nao mai di bhum ini, brei hu sarak piah piah ka dom tỉnh ban dalam bhum hu pren khang jang buh jien tame ngak./.

Urang lang: Jasi -10/1