Sang sa-ai Lường Thị Hồng Chung daok pak palei Chao Hạ, xã Nghĩa Lợi, bal sit Nghĩa Lộ lac labik bhian randap di dom tuai damuai mai rivang iek gah timur tỉnh Yên Bái. Mai tal ini, tuai damuai hu daok dalam baoh sang ton ấm cúng, hu mbaok tame dom bruk ngak ilamo, daoh tamia haong bhap bani Thái, hu mbang dom janih pandap biak karei biak bingi. Yaok thun, sang sa-ai Chung taduan raok yaok ribau tuai damuai dalam saong langiu negar, jien mek tame labaih 100 triệu sa thun, hu jeng sang kaya meda dalam xã.

Jeng pak xã Nghĩa Lợi, bal sit Nghĩa Lộ, 13 baoh sang lac hội viên urang kamei palei Sà Rèn saong palei Chao Hạ 1 hu mbaok tame Dự án “Padang bruk du lịch bhap bani pambuak haong patrun kathaot saong padang ngak palei pala bahrau”, saong yaom jien abih tih 260 triệu đồng. Dom baoh sang hu mbaok tame Dự án lac dom baoh sang daok khik tamo dom asal ilamo dalam rai diuk bhian harei di bangsa Thái, caong hu ngak du lịch piah tapa truh kathaot. Kuhria rah tapa yaok baoh sang taduan raok meng 500 tal 800 tuai damuai mai rivang ma-in yaok thun, hu sang hu taduan raok yaok ribau mbang tuai damuai. Sa-ai Lường Thị Hồng Chung, palei Chao Hạ, xã Nghĩa Lợi, bal sit Nghĩa Lộ brei thau: Ngak du lịch bhap bani ye oh kan. Tok drei kham merat khik ramik ilamo di bangsa drei, blaoh meyah khan tal tuai damuai. Meng tuk ngak du lịch bhap bani ye mboh tuai damuai mai sang drei biak ralo. Mboh biak sambai. Mai meng bruk ngak du lịch bo khaol dahlak hu bruk ngak, oh daok glaih glar tra.

Dalam dom thun tapa, huyện bhum glaong biak kan kandah Mù Cang Chải hu jeng labik pachreih ralo tuai damuai mai tal, oh lac tok hu dom laok hamu takai kanyan gheih mekre bo tuai damuai daok hu ba drei tame dom lễ hội ilamo di bangsa Mông pak ini. Manuac urang mai pak ini dak thun dak ralo, abih di nyu nan lac dalam vaktu rah tabiak Adit Ilamo rivang ma-in labik gheih mekre pakat negar hamu takai kanyan Mù Cang Chải thun 2015 hu yaok pluh ribau tuai damuai tuh mai. Taduan raok tuai du lịch, langiu di bruk peih ngak ralo bruk praong, huyện Mù Cang Chải hu tacei pato dom baoh sang dalam huyen taduan raok tuai damuai mai mbang ndih pak sang, ngak habar ka tuai mboh chreih chai, gam ba jien tame ka dom baoh sang nan. Kuhria dalam tukvak padai tasak bilan 8 saong bilan 9 meng blaoh, hu sang taduan raok hu tal  200 mbang tuai damuai, jien duah hu yaok pluh triệu đồng. Sa yaom jien oh takik ngan haong mikva pak bhum glaong tok thau pambak tame hamu taneh. Ong Lò Văn Sê, tổ 10, bal sit Mù Cang Chải brei thau: Dahlau diah rai diuk di mikva dalam palei ini biak kan kandah, urak ini hu Đảng, Karja sangka, ralo sang tame ngak du lịch, tuai damuai mai ini biak ralo. Mikva thei jeng bui, khaol dahlak daok patagok bruk du lịch bhap bani.

Tok dalam sa bilan tapa, tỉnh Yên Bái pachreih hu labaih 26.500 mbang tuai damuai mai rivang ma-in. Tuai damuai mai tal Yên Bái ralo kayua Yên Bái peih Adit ilamo rivang ma-in Mường Lò saong Adit ilamo rivang ma-in labik mekre gheih pakat negar hamu takai kanyan Mù Cang Chải thun 2015. Meng bruk mbang huak, ndih daok, gah du lịch ba mai jaik 105 tỷ đồng dalam bilan 9, tui kuhria dalam thun meda mek hu jaik 1.246 tỷ đồng, oh ka kuhria yaok ribau tuai damuai mbang ndih tự túc atau nao daok di sang mikva dalam palei. Ini lac sa yaom jien biak prong ngan haong sa tỉnh bhum ceik yau Yên Bái, peih tabiak jalan patagok bruk du lịch, patagok yaom jien mek tame ka mikva bangsa takik daok pak bhum glaong. Amuk Lương Thị Xuyến, Phaok Akaok UB bhap bani huyện Mù Cang Chải brei thau: Du lịch bhap bani ye khaol dahlak biak sangka. Meng thun 2013 khaol dahlak hu tacei pato ka dom baoh sang ngak du lịch. Meng blaoh khaol dahlak peih bruk pasang iek, jak ba mikva pak dom labik patagok bruk du lịch, khaol dahlak jeng buh jien tame piah daong ka mikva pasiam veik sang danaok, kuhria caga cơ sở vật chất ka nyu siam jang piah taduan raok tuai damuai mai rivang ma-in dalam yaok bilan du lịch.

Patagok bruk du lịch pambak tui dom hagait hu blaoh, meyah peih ngak siam ye ini lac sa dalam dom jalan nao piah patrun kathaot khang kajap di bhum glaong, bhum atah bayah, bhum urang bangsa takik./.