Meng pasak huyện Tu Mơ Rông, hadei di labaih 2 tuk nao tapa 30 km jalan mbuan ceik glaong biar, kol dahlak nao tal palei Ba Tu 1, xã Ngọc Yêu. Hadei di var lisei haong sara amriak kalu, ikan thu haong caduk paloi, dalam tuk amaik ame saong tuai daok ndom biai tapen ging pui, Y Tiếm daok la tame labik bac di drei, daok ngak bài toán, lý tal 9. Sang daok atah di sang bac labaih 7km, nao mai kan kandah, nan ye Y Tiếm gam daok di sang bac Trung học cơ sở xã Ngọc Yêu. Yaok adit hu mai sang sa mbang di harei adit, daong amaik ame bruk lisei ia bloh kham merat bac da-a. Ia mbaok anai anek saih urang Sê Đăng yau hadah tagok tuk ndom tal dom gru pato saong bruk bac da-a di drei di sang bac:

 “Dom gru pato biak sangka tal adei. Gru pato mbuan thau, meyah labik halei adei oh ka cambaih ye tangi sua veik, cei gru, nai gru langyah veik brei adei thau. Adei takre bac môn lý lô. Anai pato môn lý biak mbuan thau saong anai ndom biai biak bingi pang. Taong abih ayut di adei jeng hu dom gru pato caik hatai sangka”

Thun bac ini, xã Ngọc Yêu hu 147 anek saih pakat 1 saong 117 anek saih pakat 2. Dalam dom thun bac meng bloh, anek saih tari taring di xã Ngọc Yêu  tuk halei jeng hu jaik 100%; jaik meteh dom anek saih khá saong joi. Gru Nguyễn Ngọc Dũng - Hiệu trưởng sang bac Tiểu học Ngọc Yêu brei thau, yaom lac raidiuk di mikva daok rilo kan kandah, min dom amaik ame jeng iek glang tal bruk bac da-a di anek bhik.

 “Sang bac Tiểu học Ngọc Yêu hu taong abih anek saih lac urang bangsa takik. Bilan hajan kan kandah, amaik ame pajeng anek meng Tam Rin, Long Láy mai njauk tuk ka anek tame bac. Iek glang tal bruk bac da-a di anek bhik, amaik ame blei tapuk, siphau saong khan ao ka anek saih. Dom thun tapa anek saih nao bac jaik ginup abih, bhian hu meng 98% tagok”

Ndom ka bruk bac da-a di urang Sê Đăng xã Ngọc Yêu, tapen ging pui di sang rông, dom taha palei di labik ini jeng oh var hu dar phor di dom gru pato hu ba akhar di Đảng mai tal puk palei. Taha A Nho daok di palei Tam Rin khan lac: Dom thun tapa, drei mboh dom cei gru, nai gru nao tapa ceik glai, tapa ngin hajan mai pato akhar ka anek naih dalam palei. Dom harei lingik li-an, anek saih ruak kik, dom cei gru nai gru abih hatai iek glang meng mbang huak tal jru menyum. Gru A Phun – Phaok Phòng pato megru huyện Tu Mơ Rông brei thau, Ngọc Yêu hu jeng labik hadah dalam bruk bac megru di tỉnh Kon Tum nan, mai meng bruk pachreih bac, iek praong iek glaong gru pato di dom amaik ame saong yaok anek saih.

 “Patagok ilamu pachreih bac di xã, dom adei urak ini thau kham merat bac da-a. Amaik ame jeng kham merat brei anek nao bac. Urak ini jalan mbak dalam xã hu mbuan lagaih, bruk nao mai di mikva jeng hu mbuan lagaih. Thun bahrau 2015, tantu bruk bac da-a di dom adei hu siam mekre jang”.

         Tuk padeih Tết thun sak pabe lac mbang ka 2 dalam thun, gru saong saih sang bac Trung học cơ sở xã Ngọc Yêu palao gauk. Dalam kadung bak nao palei di dom gru pato, hu dom janih pandap ndung bak hatai anit ranam di urang daok di bhum glaong, nan lac rabung thu, baoh ploi, bei plom… Dom janih pandap ini tok hu alin brei ka gauk gar, ka dom urang mboh anit ranam yau anek kamuan dalam sang. Gru Nguyễn Ngọc Huynh - Hiệu trưởng sang bac brei thau, oh urang halei meda từ chối dom janih pandap yau nan. Ini lac bruk bui sambai, haniem phul di dom gru pato ba abih rai di drei kak kajap haong puk palei, haong sang bac. Hu sa kadha bo dom gru pato di Ngọc Yêu oh var ngak dahlau di tuk mai palei mbang Tết, nan lac iek glang ka dom anek saih sang kan kandah hu mbang Tết. Gru Nguyễn Ngọc Huynh brei thau:

“Dom adei sang kan kandah, sang bac jak ba dom  gru pato, dom urang jakar, urang đảng daong ka sang dom adei tuk Tết sa bộ khan ao bahrau, ahar, kẹo, menyek mbang, sara, mesin, bột ngọt, dom drei menuk. Yaom lac sit, lac takik, min nyu ngak brei kajap jang talei rohim di sang bac haong sang di dom anek saih”

Bruk pato megru di bhum taneh pachreih bac Ngọc Yêu daok tabiak bingu pahe, baoh yamen akaok bilan. Nan lac dak harei dak hu rilo anek saih joi pakat huyện, pakat tỉnh. Meng sang bac Ngọc Yêu bak kan kandah ini, rilo anek saih dahlau deih daok kak kajap haong bruk pala menuac. Bloh meng nan, rilo urang jakar xã, huyện hu ngak brei hadah angan palei Ngọc Yêu pachreih bac./.