Di tỉnh Trà Vinh, kayua hajan takik, ia taba di gah akaok kraong nyu biar nan ye ia mbak njom tame dalam mblang hamu avar jang yaok thun jaik meteh bilan. Piah khik caga taneh padai đông xuân, tỉnh Trà Vinh brei keik sre taong abih cống praong meng puac bilan 12, ngak ka ralo labik padai kuhrang ia biak khang.

Piah pacang cakak pandiak bhang, njom mbak, vụ đông xuân ini Trà Vinh kakei urang nông pala drak 65.000 ribau ha, takik jang 13 ribau ha duk saong vụ đông xuân thun bloh. Gah chức năng jeng ba tabiak lịch thời vụ avar jang 10 harei duk saong yaok thun. Taphia di nan peih bruk kuac rok dom jalan thủy lợi praong.

Min tal urak ini, rilo labik dalam tỉnh Trà Vinh daok njauk ia mbak pacang cakak, dalam tuk ia angaok dom kraong ba ia taba meng gah Vĩnh Long jeng daok trun biar, ralo labik njauk gluh pacang ngak ka jaik 12 ribau ha padai đông xuân daok tabiak tanye di dom huyện Trà Cú, Tiểu Cần saong sa binah di huyện Châu Thành njauk kurang ia biak khang. Piah daong ka phun padai, karja palei jak ba urang nông tabiak hamu kuac rok, pok ar njuk ja tame daong ka phun padai. Min, ngan saong urang nông pala njam patam gaok kan kandah kayua daok kurang ia saong ia njom mbak. Ong Lê Văn Hải, daok di xã Long Thới, huyện Tiểu Cần brei thau: 

 “Hadei tết ia trun biak biar. Pala njam patam oh jeng, nan ye mikva urak ini klak taneh tasaok biak ralo. Daok padai ye njuk chuyền ia tame, min khat lihik meng 30 tal 40%”.

Dreih yau nan, di tỉnh Tiền Giang tukvak ini hu yaok rituh ha padai daok cang ia. Tui gah ngak nông tỉnh, dom harei jaik di ini, pandiak khang, độ mbak tagok glaong nan ye gah thủy lợi brei kreik sre dom cống đập labik ia taba Gò Công. Kayua yau nan ye, ia dalam kraong thủy lợi di dom huyện Gò Công Tây, Gò Công Đông, Chợ Gạo saong ban sit Gò Công, tỉnh Tiền Giang daok thu nao, ngak ka labaih 500 ha drak hu labaih 60 harei kurang ia. Dalam nan, hu jaik 30 ha padai di langiu labik đê bao di huyện Gò Công Tây mbuan lahik abih kayua urang nông pala drak suai.

Dom harei tapa, karja dom puk palei jak ba urang nông bhum ia taba Gò Công, tỉnh Tiền Giang njuk chuyền di 22 labik meng 2 tal 4 mbang ka labaih 1000 ha padai di dom labik takik hu ia. Kayua dom ribaong dalam mblang hamu oh ka hu kuac rok, njauk gluh pacang, hareik harom, njam baok tamuh biak ralo ngak ka bruk pabak ia ka hamu padai gaok kan kandah. Ong Dương Văn Tuấn, urang nông xã Bình Nhì, huyện Gò Công Tây, tỉnh Tiền Giang lac:

 “Padai thun ini  njuk chuyền taong abih, hu labik oh hu ia piah njuk. Urak ini ribaong daok takik ia, hu karja, pakat angaok kuac rok veik dahlau nan nyu  thu abih”.

Jeng yau dom puk palei tapen tasik bhum taneran kraong Cửu Long, bruk pandiak bhang, njom mbak di tỉnh Sóc Trăng jeng daok rah tabiak khang. Tui chi cục thủy lợi Sóc trăng, độ mbak duk hu dom harei tapa di dom labik jeng daok di tanut glaong. Eng harei 31/3, di labik Trần Đề, độ mbak gloang di abih duk hu nan lac 15,1 phần ngàn saong labik Long Phú lac 8,8 phần ngàn.

Ni jeng lac dua labik dalam tỉnh gaok kan kandah trak di abih kayua pandiak bhang, ia mbak njom tame dalam bilan thu. Urak ini dalam tỉnh hu labaih 7 ribau ha taneh padai Xuân hè daok mbuan kurang ia pruh. Dalam nan, hu jaik 3 ribau ha padai pala hu meng 40 tal 45 harei daok mbuan si gaok kan kandah trak, khat lahik tal năng suất, ralo meng lac daok dalam labik khép kín di dự án Long Phú – Tiếp Nhật.

Urak ini gah ngak nông tỉnh Sóc Trăng daok kham merat pasang iek, tui iek bruk njaom mbak saong thu lagu piah vận hành dom công trình brei ka bruk pala drak, daong ka phun padai di mikva urang nông, patrun khat lahik tal tanut biar di abih. Taphia di nan, kakei mikva brei pasang iek ia angaok dom kraong ribaong, dahlau di tuk ba ia tame hamu, danao brei ka bruk pala drak.

Tui kuhria mboh dahlau di rayo khí tượng thủy văn bhum nam bộ, pandiak bhang daok dui atah tal kreh bilan 5, pablak dom mbang pandiak meda hu harei hajan saong ribuk meng dom nhiễu động ba dom aih ngin meng tasik tame baoh taneh, gam saong bruk ia bốc hơi samar dalam dom harei pandiak. Hadei di yaok mbang hajan, langik daok pandiak khang jang. Kayua yau nan ye, bruk pandiak bhang, ia njom mbak dalam dom harei tal daok khang jang, ngak khat lahik trak ka bruk pala drak meyah dom puk palei oh hu jalan njuk khik ia taba daong ka padai saong njam patam. Taphia di nan, brei rami ramik bilan pala saong pala dom janih phun lagaih haong bilan pandiak, thu piah patrun jien njuk ia, patakik khat lahik ka urang nông./.