Pathau mikva saong taong abih gauk!

Meng dom saman ini mai, me-in “Én cáy” hu jeng bhian randap haong mikva daok di huyện bhum glaong Phong Thổ, tỉnh Lai Châu. Yaok thun tuk tết tal mai, tuk ayut sahabat, adei sa-ai gauk gar mai rivang gauk, bruk me-in ini haong rilo kadha me-in bhap bini karei karei yau dui ko, jhul gai, tó mák lẹk hu mikva puk palei peih me-in chreih chrai. Dalam tuk bui sambai thun bahrau, Lường Hạnh – urang vak di rayo sap ndom VN daok di bhum Tây Bắc hu kadha vak brei thau ka bruk me-in én cáy harei tết di bhap bini Thái pak ini.

Tui dom urang taha daok di ban sit Phong Thổ, huyện Phong Thổ tỉnh Lai Châu, bruk me-in én cáy hu meng kan mai. Bruk me-in ini bhian hu mboh dalam dom harei tết, harei bui sambai di puk palei. Pandap piah me-in dreih yau bao cầu bilau menuk min nyu karei di labik urang bhik katung meng tangin, oh caoh haong takai yau caoh cầu. Bilau menuk hu mek meng bilau menuk binai, bo brei mek sa gah seok min. Meyah mek abih 2 gah seok, atau bilau menuk tano, cầu oh par hu. Baoh cầu mikva ieu lac “ én”, hu mikva mek kreim pagul veik ka nyu kajap, praong 5 - 6 cm, hadei di nan mek “ tong cọ” dalam glai mai kaoh sit dak tapak tame vòng kreim pagul veik jeng baoh cầu, meyah njul ye pabak hala tame, meyah trak ye mek hala tabiak, ngak habar ka nyu mbiah haong tangin menuac me-in. Sa-ai Teo Thị Nơi, daok di bản Vàng Pheo, xã Mương So, huyện Phong Thổ brei thau: “ Me-in én cáy ini hu parabha jeng 2 kapul, kapul likei, kapul kumei. Kapul halei katung cầu laik trun gah la, lac lah kapul deih saong kapul mbang meda mek pandap di kapul lah, yau ye mek kaong tangin, kaong takuai, khan atau pandap angaok rup, urang me-in oh quy định tuk me-in, thei nao me-in hu tuk halei ye me-in.  Bruk me-in hu meng 2 urang tagok, meyah hu rilo menuac me-in ye nyu bui sambai jang, yau  ném còn, tó mák lẹ.”

Bruk me-in “én cáy” ndung bak bui sambai chreih chrai, oh lac likei atau kumei, oh lac urang taha atau uraniah, thei jeng tame me-in hu. Jeng meng bruk me-in “Én cáy”, rilo dam dara mboh anit gauk, bloh jeng diuk jeng pasang. Yaok thun tuk tết tal mai, atau puk palei hu rija, roya ye mikva peih bruk me-in bui sambai. Yau harei pataom “ Then Kin pang” “ Xên bản, xên mường”, mikva puk palei ba gauk me-in én cáy, tó mák lẹ... Ong Nông Văn Nhay daok di ban sit Phong Thổ, huyện Phong Thổ tỉnh Lai Châu brei thau: pandap me-in ngak meng bilau menuk ieu lac én cáy, takre ngak baoh praong ye ngak praong. Likei, kumei me-in én cáy meyah urang halei oh samar tangin caik ka baoh cầu laik trun ye njauk lahik pandap. Bruk me-in bhian hu me-in di harei tết, harei kin pang then, rija Nàng Han, harei mbang cốm bahrau...” 

Bruk me-in “én cáy” tal harei ini jeng daok hu mboh di dom puk palei bhum glaong di huyện Phong Thổ, tỉnh Lai Châu. Oh lac bruk me-in bui, bruk pakacah  gauk saoh, bo bruk me-in ini daok daong kak kajap talei rohim di mikva dom bangsa, jum pataom gauk piah dak padang puk palei dak harei dak trei sir./.