Kon Tum lac tỉnh hu jalan tapen negar atah di abih dalam bhum Tây Nguyên, lac 292 km nao tapa 13 xã di 4 huyện, jaik haong negar Lào saong Campuchia. Urak ini, gah BP tỉnh Kon Tum daok khik 66 bilai pacang, hu ginup menuac khik iek, peih bruk pasang iek jalan tapen negar luac harei melam. Dalam puk palei, gah BP pathau khan ka bhap bini daok di bhum tapen negar thau ka bruk pacang caga jit, pambuak haong urang jakar pacang urang tame negar suan hukum, pathau khan, pato pakai urang jakar, urang lin ngak njauk tui 5 paka di Mintri Y tế, tuk halei jeng caga meyah hu bruk salih karei. Đại tá Lê Minh Chính, Bí thư Đảng ủy, Chính ủy BĐBP tỉnh Kon Tum brei thau: “Kol dahlak khik siam dom bilai rah tui jalan tapen negar, abih di nyu lac pabah mbang negar, dom jalan haluk praong, sit, pambuak bruk khang kajap di BĐ BP haong dân quân thường trực di Bộ chỉ huy quân sự tỉnh patagok bruk daong gauk dalam bruk ngak. Gam haong nan, kol dahlak tacei pato ngak siam bruk pathau khan urang jakar, urang lin saong bol bhap rahra daok di bhum tapen negar piah thau paglaong hatai sangka pacang caga jit, ngak siam tui 5 paka di Mintri Y tế.”

Jeng dalam tuk ini, ngak bruk rah tui 90 km jalan tapen negar jaik haong  tỉnh Ratanakiri, Negar Campuchia, meng 1 pabah mbang negar haong rilo jalan haluk praong, sit, gah BP tỉnh Gia Lai jeng daok khik 24 bilai pacang caga jit Covid-19 rah tui jalan tapen negar. Gam haong nan, lac 10 kapul nao khik iek luac harei melam piah pacang cakak bruk tame, tabiak negar suan hukum. Di pabah mbang negar pakat dunya Lệ Thanh (huyện Đức Cơ), meng bruk pruh jru rilo tal, salih urang peih radaih, gah BP pambuak haong gah hải quan, y tế khik ka pandap panda pablei salih nao mai hu mbuan lagaih. Dalam puk palei, dom đồn BP pambuak haong taha palei, urang hu angan je pathau khan brei bhap bini thau piah padeih bruk tapa jalan tapen negar piah ravang gauk, gam haong nan, tacei tabiak dom bruk ba menuac tame tabiak negar suan hukum. Đại uý Phan Thanh Hà, Phó Đồn BP Ia O (Bộ Chỉ huy BĐ BP tỉnh Gia Lai) daok ngak bruk di huyện biên giới Ia Grai brei thau: “Đồn BP Ia O daok khik 1 bilai pacang menuac tame tabiak negar suan hukum, 1 bilai pacang caga jit Covid-19 haong 1 kapul khik iek nao mai, pambuak haong dom gah nao pasang iek bhum tapen negar, piah samar mboh bruk tame tabiak negar suan hukum, pagalong bruk pacang caga jit saong ngak catang tui 5 paka di Mintri Y tế, urang jakar, urag lin tuk halei jeng hu mbaok ginup piah khik iek”.

Daok tỉnh Đăk Lăk hu jalan tapen negar atah labaih 74 km nao tapa 2 huyện Ea Súp saong huyện Buôn Đôn, jaik tỉnh Mundulkiri, Negar Campuchia. Thượng tá Nguyễn Minh Tuyên – Phaok akaok Bộ chỉ huy BĐ BP tỉnh Đắk Lắk brei thau, urak ini dom đồn BP hu patagok bruk pasang iek, khang hatai pacang cakak bruk tame negar suan hukum rah tui 4 xã di 2 huyện tapen negar. Meng paglaong hatai sangka saong ngak njauk tui dom jalan khik caga, pasang iek, bo tukvak tapa, gah BP hu mboh saong pacang cakak hu yaok pluh urang tame negar suan hukum:“Dalam tuk bilan pandiak, jalan nao mai di 2 gah biak mbuan, kol dahlak khik 6 bilai, 12 kapul khik iek nao mai luac harei melam, khang hatai chap mek dom menuac meng Campuchia mai tame Việt Nam suan hukum. Kol dahlak jak ba bhap bini ngak njauk tui dom adat hukum bhum tapen negar, oh nao mai tapa jalan tapen negar. Di jabat, kol dahlak pacap cuk pataih pacang mbaok saong ngak njauk tui  5 paka di Mintri Y tế”.

Meng kham merat abih drei gam haong rilo jalan ngak saong tuk halei jeng paglaong hatai sangka, gah BP khik iek yaok ratuh km jalan tapen negar di Tây Nguyên daok ngak jeng paga pacang khang kajap, pacang cakak jit Covid-19; ba mbuan lagaih di abih piah ka dom puk palei gam pacang caga jit, gam khik ramik dom bruk ngak mbang KT-XH./.

Urang lang: Ai Nghiem - 5/5/2021