Yaok thun tuk tal bilan hè, sa-ai Lê Thị Bích Phương (daok di phường Phú Thọ, ban sit Thủ Dầu Một, tỉnh Bình Dương) haong dom adei sa-ai dalam sang jeng ba anek kamuan nao me-in atah dom harei. Thun ini, oh nao me-in atah hu, sang sa-ai Phương pataom gauk ngak mbang huak, iek glang bein phun mbang baoh, dom uraniah ye me-in sambai haong gauk:

  “Tuk drei mbang huak blaoh, dom uraniah nyu parabha bruk ka gauk, uran ini rao panyin jam, urang daih puh, uak bàn, labik mbang huak… Kayua jit ruak, dom anek kamuan jeng thau, kol nyu kakei gauk oh nao ravang ayut sahabat, oh nao labik ini labik daih”.

           Piah ba bui sambai dalam dom harei padeih hè, sa-ai Lê Thị Thanh (daok di phường Phú Mỹ, ban sit Thủ Dầu Một) blei biak rilo truyện tranh, dom dalikan ka dom urang hu angan je praong di dunya brei ka anek likei di drei maong iek. Lingiu di nan, puac adit abih gauk dalam sang bhian ba gauk tabiak mblang bein, labik joa menuac piah pahat saong suak yava dalam langik tasik la-an bingi, gam pacang caga jit gam daong ka anek hu dom harei padeih hè siam mekre:

“Meda lac tapa rilo mbang jit, anek jeng thau saong diukrai ka nyu lagaih jang. Ngan haong amaik ame ini lac tukvak daok jaik anek rilo jang, thau ka anek jang saong tacei pato anek thau iek glang rup drei siam jang”.

        Tui yaok pataom, tỉnh Bình Dương hu jaik 500.000 uranaih, dalam nan hu biak rilo anek kamuan di urang ngak. Piah ka bilan hè biak hu makna, dom thun dahlau, dom mban ngành, kapul nyaom, puk palei hu dom danak dak daong ka uraniah hu ba drei tame ngak bui, me-in sambai. Sa dalam dom bruk hu dom adei maong akaok lac bruk ba salih tapuk duh ka uraniah daok di bhum atah bayah, sang trọ saong rilo mblang me-in kein laba di dom gilang tapuk, min thun ini kayua jit ruak oh peih tabiak hu, ngak brei dom adei mboh biak uan. Piah duh ka dom uraniah, Gilang tapuk tỉnh Bình Dương brei padang gilang tapuk điện tử hu rilo tapuk biak gheih, ngak video yaih khan ba tagok angaok blah web; peih bruk pakacah vak hatai sahneng ka tapuk piah ngak jeng bhian randap puac tapuk ka uranaih ... Ong Nguyễn Văn Huệ - Yam ndok Gilang tapuk tỉnh Bình Dương brei thau:

 “Bình Dương padang jalan ngak lac salih meng bruk ngak meng kan tapa pandar công nghệ thông tin piah duh ka điện tử. Dalam dom gilang tapuk brei hu chuyển đổi số piah duh tapa bruk pandar Internet, nan lac jalan nao suai lavik bo gilang tapuk meda ba tagok brei ka UBND tỉnh thau dalam thun 2021”.

        Tui jalan ngak lac “Pacang jit min daok hu labik me-in ka uraniah”, tapa fanpage Sang anek naih 83, Hội đồng đội tỉnh Bình Dương, Sang uranaih tỉnh hu peih tabiak dom danak dak livestream dom asal kadha, daong ka uranaih hu pabak ilamu ka pacang caga bala njauk rambus, rapeik rapai uranaih… Lingiu di nan “Labik me-in puac adit online” haong rilo kadha yau: điểm tin măng non, yam tapa thử thách hu thưởng... jeng dui pachreih rilo uranaih mai maong iek. Ong Nguyễn Phan Thái Anh – Yam ndok Sang uranaih tỉnh Bình Dương lac:

       "Kol dahlak caong khin dom adei yaom lac daok dalam tuk oh tabiak lingiu hu min daok hu bac da-a, pabak ilamu saong hu thau dom bruk biak kein laba. Meng nan, dom adei mboh bui sambai dalam hatai, saong bac da-a hu dom bruk siam daong ka rup drei dak harei dak hu siam jang”.

        Yaom lac daok khang drei pacang jit min dom gah, dom puk palei oh var sangka uranaih dalam bilan ngak ka uranaih. Kapul dam dara dom pakat di Bình Dương hu jak ba, rik daong padang ngak dom labik ngak bui, me-in sambai ka uranaih di sang ilamu khu phố, ấp, labik sang trọ… Kadung jien daong uranaih dom pakat jeng hu jak ba, kaoh tabiak meng kadung jien karja brei yaok rabau pok pandap ka uranaih kan kandah. Tapa nan daong ka uranaih, abih di nyu lac anek kamuan di urang ngak hu sa bilan siam mekre, bui sambai saong rik daong jhul kadun likuk jit ruak Covid-19./.

Urang lang: M.Phuong - 19/6/2021