Urang dam dara halan hatian ao hijao daong bruk pacang jit

Dalam dom mbang halan hatian “Bilan hè hijao” di dom thun dahlau, Tỉnh đoàn Bình Thuận padang dom kapul dam dara halan hatian ba akaok nao dahlau haong bruk ngak “4 gam” nao tal dom bhum atah bayah, bhum urang bangsa takik piah daong ka mikva cakrok patagok bruk ngak mbang, kinh tế, padang ngak palei pala bahrau. Daok thun ini, anak bruk jit ruak rah tabiak srau kadau, nan ye “Bilan hè hijao” hu Tỉnh đoàn ba tabiak danak dak “Ao hijao ba akaok nao dahlau – ton ralai Covid” ngan haong dom kapul dam dara halan hatian ba akaok nao dahlau tal dom bhum jit, dom bilai pasang iek jit piah gam haong kapul pacang jit, daong bruk pacang caga jit ruak.

Dom harei ini, di dom bilai pasang iek jit Covid -19 dalam tỉnh Bình Thuận, rilo sinh viên halan hatian mai meng dom sang bac cao đẳng dalam tỉnh hu mbaok luac harei melam haong dom gah chức năng peih bruk pasang iek jit. Dom urang halan hatian hu mbaok tame tacei pato bhap bini ngak harak khai báo y tế, harak sanya, yaok pataom dom menuac tame tabiak bilai, vak angan, duk iek pandiak rup pabhap, pruh jru pametai anek ruak di plak tangin ka rahra saong daong dom bruk karei di bilai. Bruk ngak yaom lac glaih glar, thavi thavar kayua menuac tame tabiak bilai biak rilo, min dom urang lin ao hijao jeng ngak bruk biak siam saong abih drei tui jalan “pacang jit yau pacang khamang”.

Di bilai pasang iek jit xã Vĩnh Tân, huyện Tuy Phong, 20 sinh viên halan hatian di Sang bac Cao đẳng Cộng đồng Bình Thuận jeng daok harei melam kham merat daong ka gah chức năng ngak bruk pasang iek jit Covid-19 piah ngak jeng paga pacang jit khang kajap, patrun patakik di abih bruk njom mbak di jit ruak. Tui kuhria, kapul halan hatian di sang bac ngak bruk dalam 1 adit min kayua dom radaih mai tal bilai rilo nan ye kapul halan hatian daok veik piah daong bruk 1 adit tra.

Duk haong dom bilan hè dom thun dahlau daih, meda lac, bilan hè hijao thun ini lac biak karei ngan saong dom sinh viên halan hatian ini. Adei Nguyễn Yến Nhạc – sinh viên Sang bac Cao đẳng Cộng đồng Bình Thuận khan lac: “Thun halei adei jeng halan hatian tut angan tame “Bilan hè hijao” min ini lac mbang camereip abih adei hu mbaok tame bruk pacang caga jit Covid-19. Tuk camereip amaik ame oh brei nao kayua huac taom gaok rilo menuac meng bhum jit mai mbuan njom mbak. Min adei kham merat likau amaik ame brei nao. Yaom lac bruk ngak glaih glar, melam jeng hu mbaok khik iek, glaih hasit min adei mboh biak buai sambai kayua drei hu rik daong hasit prein yava di drei tame bruk jhul kadun likuk jit ruak”.

Daok di bilai pasang iek jit xã Tân Đức, huyện Hàm Tân, kapul sinh viên halan hatian di Sang bac Cao đẳng Bruk ngak Bình Thuận jeng bharau ngak salah bruk  hadei di 1 adit nao daong bruk. Salih tame nan, Kapul dam dara halan hatian Tỉnh đoàn ngan saong 15 urang tagok jalan patui bruk daong ini. Daok  2 kapul dam dara halan hatian di Đoàn Trường Cao đẳng Y tế ngan saong 43 urang halan hatian hu mbaok di ban sit La Gi piah daong iek glang prein yava ka rahra daok di dom labik daok karei brei ka urang F1 saong duah thau labik pambak ruak, mek mẫu dut iek…Sa-ai Phan Đình Thông – Bí thư Đoàn Sang bac Cao đẳng Y tế brei thau: “Tuk camereip, ka oh thau bruk daong yau habar, nan ye dom ayut halan hatian jeng mboh duh hatai. Min tuk bhian randap haong bruk blaoh, urang halei jeng mboh bui sambai, chreih chrai, abih drei ka bruk ngak”.

Piah khik siam mekre, salamat ka taong abih dom urang halan hatian hu mbaok tame danak dak “Ao hijao ba akaok nao dahlau – ton ralai Covid”, Tỉnh đoàn Bình Thuận tacei pato dom đoàn trường peih bruk pato pasram dom jalan khik kajap siam mekre, salamat, pacang njom mbak Covid-19 saong taong abih urang halan hatian brei dut iek samar Covid-19 mboh lac âm tính dahlau di tuk nao saong mai meng dom bilai pasang iek jit, bhum jit. Gam haong nan, piah daong pandap khik caga siam mekre salamat ka dom urang lin ao hijao halan hatian di dom bilai pasang iek jit ngak hu siam bruk ngak, Tỉnh đoàn hu alin hadiah 3 “Cabin umo ranaih – klah rabha anit ranam” brei ka bilai pasang iek jit di  xã Tân Đức, huyện Hàm Tân./.

Urang lang: M.Phuong – 14/08/2021