Sangka raidiuk ka bhap bini bhum pacang veik

Mban tacei pato pacang caga Covid-19 tỉnh Bình Dương brei thau, kuhria tal harei 18/8, Bình Dương hu jaik 52.500 urang njom Covid-19, labaih 420 urang metai. Urak ni, dom labik y tế daok taong ruak ka labaih 11.000 urang ruak saong labaih 16.000 urang ruak karei daok hu brei daok karei, tui iek prein yava, ngak kan kandah biak praong tal gah y tế, dalam tuk kapul y, bác sĩ biak takik. Tal urak ni hu jaik 2.000 urang halain hatain meng dom tỉnh saong sinh viên sang bac gah y mai daong ka Bình Dương min bahrau hu labaih 800 urang lac urang ngak gah y tế. nan lac biak takik dut haong tỉnh daok caong hu labaih 6.000 urang, dalam nan caong hu 2.000 bác sĩ. Jaik di ini, dom kapul nao veik piah bac taa, ngak bruk nan ye kapul y tế kurang biak rilo.

Tiến sĩ, bác sĩ Nguyễn Hồng Chương- Yam ndok Sở Y tế tỉnh Bình Dương brei thau, taong abih dom y bác sĩ daok kham marat iek glang prein yava ka bhap bini: “Sở Y tế hu ieu taong abih dom labik y tế di karja, lingiu karja njauk ngak 2 bruk lac gam taong ruak Covid-19 gam iek ruak karei tui jalan ba tabiak di Mintri Y tế. Khol dahlak brei thau cambaih angan labik iek ruak, prein taong ruak urang cấp cứu. Dom labik y tế tư nhân kariek pabhang hu pasang iek, ieu kakei peih pabhang taong ruak”          

Hadei di 1 bilan paatah di gauk tui sarak 16, Bình Dương daok brei ngak veik tal abih bilan 8 piah meda pacang hu jit ruak. Piah pachreih urang ngak “thei daok halei, daok nan”, langiu di bruk daong labaih 194 tỷ đồng tui sarak 68, Bình Dương daok hu daong jien ka manuac ngak bruk tự do, urang pablei vé số dạo… yaok urang 1 triệu 500 rabau tui sarak 09 di UBND tỉnh ngan haong paoh jien labaih 123 tỷ đồng. Tỉnh hu daong jien pah sang daok ka urang ngak ngan haong yaom daong lac 300.000 đồng/ sa urang; daong pandap mbang ka dom urang kan kandah ngan haong yaom daong 500.000 đồng sa urang. Ong Phạm Văn Tuyên - Phó Yam ndok Sở Lao động-Thương binh saong Xã hội tỉnh Bình Dương brei thau, Sở daok pandar công nghệ thông tin piah daong, samar daong paok jien daong nao tal tangin manuac urang ngak:“Khol dahlak pato tacei doanh nghiệp ngak harak gar tapa mạng oh cang mai taom gaok tapak. Ngan haong sarak sang trọ bahrau tabiak saong daok peih ngak hu dom harei, kham marat dalam bilan 8 meda ngak salah paok jien daong sang trọ”)

Dalam tuk jit ruak Covid-19 daok rahtabiak khang, urang ngak biak caong hu klauk vaccine piah khik salamat. Min, vaccine hu parabha ka tỉnh Bình Dương biak takik, bahrau hu jaik 570.000 mbang, dalam tuk rahra di tỉnh hu labaih 2 triệu 600 rabau menuac. Urak ni, dom vaccine hu parabha hu klauk abih ka dom urang daok pacang caga jit, bhap bini daok di “bhum bhong” saong urang ngak di dom doanh nghiệp ngak tui jalan “3 di labik”. Ong Nguyễn Hoàng Thao- Phó Bí thư Tỉnh ủy Bình Dương brei thau lac, tuk hu viek vaccine meda brei klauk dahlau ka urang ngak daok di dom labik sang tro di “bhum bhong”, urang ngak di dom sang mac “3 di labik”:“Gah dang akaok, khik ramik karja ye khol dahlak hu sa kapul pasang iek y tế, pasang iek kanja di tỉnh Bình Dương saong jabat pasang iek naoduah thau cambaih laih bruk ni piah plaih rahtabiak bruk oh siam dalam parabha, klauk jru vaccine”.

Meng dom kan kandah di anak mata, bruk pasang iek hu jit ruak di akaok bilan 9 di Bình Dương kan si ngak hu mayah oh hu bruk daong samar drah./.

Urang lang: Thu Thao – 25/08