Bilan pandiak bhang jeng lac tuk ia pruh ka bruk ngak nong biak catang. Yau nan min, di huyện Tân Uyên, tỉnh Bình Dương rilo thun ini mai, abih di nyu nan lac dalam bilan pandiak bhang tuk halei jeng hu ginup ia pruh, rik daong paglaong năng suất, chất lượng di phun pala. Piah hu yau nan, meng dom thun tapa, rilo ribaong kraong hu huyện Tân Uyên, tỉnh Bình Dương sangka kuac ramik brei pasiam veik, khik ginup ia ka bruk ngak nong pala drak luac thun.

Yam tame bilan pandiak bhang min mbiah tal tuk vak ini binek ia Đá Bàn, xã Đất Cuốc jeng daok labaih 2 triệu mét khối ia. Du nan ia oh lac pabak ia pruh ka labaih 450 hecta taneh pala drak di dom xã Đất Cuốc, Tân Mỹ, Thường Tân, Lạc An dalam bilan đông xuân 2013 -2014, bo daok ba ia pruh tani tanat ka padai hè thu dalam bilan pandiak bhang thun ini. Ong Nguyễn Văn Hùng – Akok balai khik ia ribaong kraong Tân Uyên brei thau:" Balai thuy nong hu pambuak saong balai khik caga phun pala brei palih ruah pajaih piah plaih rầy, balai njuk pruh ia, akok bilan pala drak, balai hu pasiam dom khut tayah hadei di bilan hajan ia sua, brei kruac rok ribaong, ngak  hareik, piah bruk njuk pruh ia hu mbuan lagaih".

Dalam huyện Tân Uyên urak ini hu 13 cong trinh thủy lợi,  dalam nan hu 2 binek ia, 2 ar pacang ia sre saong 9 balai njuk pruh ia prein khang labaih 850 mét khối ia dalam sa tuk. Dom labik nan daok ba mai siam lagaih, ba ia pruh ginup ka labaih  1.000 hecta taneh pala drak dalam huyện. Meng nan, taneh klaak saoh oh pala drak hu dalam bilan pandiak bhang yaok thun trun daok takik, daong ka mikva urang nong pala drak hu luac thun, paglaong jien tame, patagok kinh tế baoh sang. Ong Dương Văn Hải, urang ngak nong daok di xã Bạch Đằng, huyện Tân Uyên brei thau: " Hahlau ia pruh ka phun padai bilan pandiak biak tani tanat, yau nan ye padai tamuh siam".         

Daok ong Dương Minh Trí, urang ngak nong di xã Bạch Đằng, huyện Tân Uyên brei thau ka jalan parabha ia pruh hu siam lagaih di dom danak dak ribaong kraong dalam bilan pandiak bhang yau ini: "Balai njuk pruh ia Tân Hòa ba ia pruh biak tani tanat. Hamu tanu di dahlak  ba ia tame sa mbang, daok mikva hu hamu dhaong ye dua adit ba ia sa mbang".

Gam dom danak dak ribaong kraong di huyện Tân Uyên, urak ini tỉnh Binh Duong hu labaih 50 danak dak ribaong kraong nduac eng, binek danao ia saong balai njuk pruh ia meng điện, khik ginup ia pruh ka bruk ngak nong di mikva dalam bilan pandiak bhang yaok thun. Dom pakat karja pambuak tal bruk khik iek gah ribaong kraong jeng caik hatai tal bruk ramik pasiam piah ka dom danak dak ribaong kraong hu siam mekre, tani tanat, ba tame pandar hu kein lagaih di abih.

Lac sa tỉnh công nghiệp, min Binh Duong tuk halei jeng sangka tal bruk ngak nong... Bruk buh jien tame ngak brei pasiam saong khik hu kein laba dom danak dak ribaong kraong yau di huyện Tân Uyên, piah pabak ia pruh ka phun pala, gam saong bruk daong ilamu, daong bruk pablei tabiak dom pandap panda kaya nong, daong ka urang ngak nong patagok bruk ngak mbang kinh tế nan lac jalan nao njauk di tỉnh./.

                                                                                                Bhumi