Labik huak di urang ngak hu brei pacang

Meng labaih 9.000 urang ngak, Mban yam ndoc Cty TNHH Timberland, di phường Khánh Bình, ban sit Tân Uyên thau lac, meyah hu sa urang njom ruak Covid-19 ye meda brei padeih ngak bruk. Nan ye, langiu di dom jalan pacang jit, Cty hu buh jien tabiak blei 2 mac dut iek pandiak rup pabhap meng atah yaom 700 trieu dong piah patrun bruk njom ruak tapa gauk. Ong Lê Văn Hiệp, urang lambaok gah pablei mac brei thau, mac nan dut iek pandiak dalam rup meng camera hồng ngoại pasang tapa sa mbang taong abih urang ngak piah brei thau dom urang halei jaik ruak dahlau di tuk tame sang xưởng:“Camera mboh hu meng atah saong dut nhiệt độ di rilo urang dalam sa mbang haong gauk, payua tin nhắn tapa SMS, zalo, thaot binguk piah gah khik iek di Cty thau, daong ka urang thau piah pacang samar chip”.

Thau lac caga jit lac bruk praong, Cty Cổ phần Sáng Ban Mai di khu công nghiệp Mỹ Phước 2, phường Mỹ Phước, ban sit Bến Cát hu caga  labik brei daok karei meyah hu urang F0, brei meteh urang ngak bruk văn phòng, urang pablei salih ngak bruk online. Daok dalam sang mac, urang ngak brei pa-atah di gauk saong ngak tui 5 paka di Mintri Y tế. Ông Trần Thành Trọng- Tong yam ndoc Cty Cổ phần Sáng Ban Mai lac:“ Khol dahlak brei menuac tui iek gam gam, Mban Tong yam ndoc jeng salih gauk yaok harei tui iek piah khik oh brei ngak suan atau kurang. Khol dahlak jeng hu ngak tui jalan ba pandap tal labik ka urang oh brei taom gaok piah plaih ruak meng langiu njom tame sang mac”.

Dalam mbang jit ka 4, Binh Duong hu 164 urang njom Covid-19 dalam bhap bini, dalam nan hu 90 urang ngak di dom DN; labaih 5.300 urang F1, F2 lac urang ngak di 171 Cty. Tỉnh daok brei peih praong labik brei daok karei tagok 10.000 laneng ndih, patagok bruk dut iek hu labaih 6.000 mẫu đơn dalam sa harei. Dom labik iek ruak di tỉnh meda taduan labaih 600 urang ruak saong daok kuhria peih praong labik taong ruak 500 laneing ndih iek ruak. Tỉnh brei padeih dom darak tamuh eng; patagok bruk duah menuac taom gaok urang ruak, ba nao daok labik karei, pacang caga saong drah samar duk iek ruak. Ong Nguyễn Hồng Chương- Yam ndoc Sở Y tế tỉnh Bình Dương brei thau:“ Khol dahlak padang labaih 100 kapol pasang iek dom labik ngak kong; brei peih praong bruk dut iek ruak dalam bhap bini. Binh Duong daok kham merat duah dom gah pablei jru hu Mentri Y tế brei adat, piah blei vacccine tame ka tỉnh. Saong daok hu pok panuac tagok Mentri Y tế brei hu rilo vaccine ka tỉnh piah klauk ka urang ngak bruk”.

Liên đoàn lao động tỉnh Bình Dương hu payua harak ka công đoàn di dom D.N brei pakhang bruk pathau khan, kakei urang ngak brei caga jit tuk daok ngak di Cty jeng yau tuk mai labik daok; brei ngak njauk tui tacei pato caga jit di D.N saong tỉnh. Gam haong nan, takik taom gaok urang ngak di Cty karei tuk daok di sang trọ, cuh pataih pacang pabah idung tuk taom gaok, piah takik abih bruk njom mbak ruak ka urang ngak di dom doanh nghiep. Ong Nguyễn Đình Khánh-Phaok akok Liên đoàn lao động tỉnh Bình Dương bei thau: “Urak ini, rilo công đoàn di dom doanh nghiep brei ngak daning pacang labik mbang huak saong pa-atah tukvak ngak bruk piah caga jit tui tacei pato di Tổng Liên đoàn lao động saong Mban tacei jalan pacang caga jit Covid-19 tỉnh Bình Dương"

Mban khik iek dom labik ngak kong tinh Binh Duong bhian padang rilo kapol urang tame tal sang mac pasang iek bruk peih ngak dom jalan pacang caga jit. Dom gah chức năng dalam tỉnh jhul khang pathau khan ka bruk ngak di D.N, menuac urang meyah caik ka jit njom mbak meda njauk langyah hình sự tui Hukum di karja./.

Urang lang: Ai Nghiem -30/6/2021