Meng bilan 8/2021, jit ruak COVID-19 di Bình Dương rah tabiak khang, hu harei hu yaok ribau urang njauk ruak nan ye dom labik iek ruak oh daok labik. Tuk ini, hu Mentri Y tế brei ngak, Bình Dương padang “Balai y tế nao mai di dom labik daok di bhap bani” piah taong ruak F0 oh hu triệu chứng di sang. Meng sa, dua balai hu peih ngak siam bloh tagok tal 158 balai y tế dalam dom labik daok. 3 bilan tapa, dom balai iek ruak nao mai hu daong duah mboh samar drah, hu mbaok tame taong ruak ka jaik 16.500 urang ruak tapa bruk tacei pato jalan iek glang pren yava, brei jru, sơ cứu blaoh ba tagok sang iek ruak dom urang ruak trak... Meng bruk hu mbaok iek glang samar drah di dom urang jakar y tế di balai iek ruak nao mai, jaik 14.500 F0 hu taong ruak di sang abih ruak, ba drei tame veik haong puk palei. 

Amuk Nguyễn Thị Dương, urang daok di phường Thuận Giao, bal Thuận An brei thau, dua diuk pasang amuk jeng njauk COVID-19 saong hu brei daok karei, taong ruak di sang trọ. Hu urang y tế balai iek ruak nao mai khu phố Bình Thuận bhian rivang, iek pren yava nan ye dua hadiuk pasang biak sahanag hatai: “Hu urang jarka y tế daong abih drei saong brei daok karei di sang nan ye dahlak biak thau dhal phol, yaom lac duh hatai min nan jeng lac pren khang daong ka khaol dahlak samar abih ruak, saneng miat jeng oh siam. Urak ini drei daok dalam sang ye oh peih pabah mbang tabiak langiu, kham merat menyum jru ka nyu njauk tuk piah samar abih ruak.”

Tukvak tapa, balai iek ruak nao mai dalam khu ngak kong hu daong ka doanh nghiệp dut iek ka urang ngak. Dom urang dương tính haong SARS-CoV-2 oh caik daok dalam doanh nghiệp bo hu ba tabiak balai iek ruak nao mai dalam khu ngak kong piah mong iek pren yava, taong ruak. Urang jarka y tế daok tacei pato doanh nghiệp brei daok karei dom urang F1 di sang mac, pruh jru pametai anek ruak piah daok hu ngak bruk.

Urak ini, Bình Dương salih meng “oh hu jit COVID-19” tapa “diuk rai siam mekre haong jit ruak”, nan ye bruk ngak di balai iek ruak nao mai daok hu patagok. Yau nan min, kan kandah di abih urak ini lac kurang menuac ngak y tế kayua dom jabat mai daong urak ini nao veik palei, gam haong labik iek ruak oh siam laghaih dalam tuk “bruk mesruh pacang jit” COVID-19 daok dui atah. Ong Nguyễn Thanh Tâm- Akaok UBND ban Thuận An caong lac:0“Khaol drei njauk kham merat samar patagok manuac ngak saong pato pathram dom urang nan piah pakhang pasiam veik balai iek ruak nao mai, abih di nyu lac tuk gah Quân y 103 mai daong blaoh tabiak nao di harei 31/11. Caong khin urang pal akaok samar hu sarak ka adei sa-ai ngak y tế nao mai piah pachreih ngak ka siam.”

Anak dom kan kandah yau nan, urang pan akaok tỉnh Bình Dương hu tacei pato dom puk palei peih ngak pakhang, pasiam balai iek ruak nao mai tui akaok menuac di labik daok saong labik ngak kong; jak ba dom bác sĩ, y sĩ, điều dưỡng, urang jakar y tế halar hatian; pambuak bruk haong dom pasak y tế huyện, bal sit, patagok bruk duh ka ka balai iek ruak nao mai. Gam haong nan, peih bruk pato, pasram pabak menuac ngak ka balai y tế lưu động.  Tui ong Nguyễn Văn Lợi- Bí thư Tỉnh ủy Bình Dương, dom puk palei njauk mek pandar cơ sở vật chất piah peih prong balai iek ruak nao mai, rik daong tame bruk mong iek pren yava ka bhap bani: “Dom balai iek ruak nao mai, dom labik hu rilo bhap bani njauk pandar sang ilamo di khu phố piah ngak trạm xá, kayua luac harei nao rah rah angaok radaih lac oh njauk haong jalan ngak. Tal thun 2022 jit jeng daok saong meda dui atah, khaol drei hu ilamo paje ye brei pacang cakak sit gilac saong padang tổ taong ruak di labik hu rilo F0.

Meda ndom lac, balai iek ruak nao mai dalam labik daok di bhap bani, labik ngak kong nan lac jalan ngak siam mekre, hu daong ka bol bhap rahra, urang ngak hu iek ruak samar drah, bo daok daong ka Bình Dương pasang iek hu jit ruak dalam tukvak “diuk rai haong jit ruak”./.

Urang lang:Jasi -25/10/2021