Hu mong yau “hala phổi hijao” di bhum Đông Nam bộ, praong abih tih jaik 26 ribau hecta, Bein negar Bù Gia Mập, daok pak tỉnh Bình Phước jeng yau dom glai karei, daok dang anak bruk mbuan khuah glai biak khang, kayua lingik daok pandiak bhang, oh hu hajan. Dom jalan ngak piah pacang, padam  khuah glai daok hu Mban khik iek glai peih ngak tui jalan 4di labik.

Hu labaih 1 dalam 4 lac mblang taneh glai lồ ô, nan ye meyah oh paglaong sangka, glai di Bein Negar Bù Gia Mập biak mbuan khuah dalam bilan thu. Dom harei tapa, dalam bhum ini oh hu hajan, nan ye dom urang jakar, urang ngak di Mban Khik iek glai Bein negar njauk khik iek, pacang caga khuah glai luac harei melam. Dom urang dang akaok Mban khik iek Bein negar jeng thau lac, dom bein pa-aok bleit di mikva di tapen glai daok tame bilan paik baoh, ba tal bruk bhap bani meda puh ramik bein ka nyu hacih piah laghaih ka bruk paik baoh nan ye mbuan ngak brei khuah glai. Kayua yau nan ye njauk paglaong hatai sangka, samar  mboh saong samar pacang, padam. Ong Lê Xuân Long, Phaok akaok Trạm Kiểm lâm ka 1, Hạt Kiểm lâm Bein negar Bù Gia Mập brei thau: Ndom ka bruk pacang padam pui khuah glai, Balai hu jao brei khik iek labaih  2.369,2 ha. Balai hu 3 urang tuk halei jeng hu mbaok khik iek ginup abih. Pak ini lac glai pablak lồ ô, nan ye mbuan khuah. Khaol dahlak njauk khik iek luac harei melam.

Bein negar Bù Gia Mập lac glai tamo hu rilo kayau, dalam nan hu biak rilo dom janih phun pajaih menyek saong phun họ đậu quý hiếm. Ini daok lac labik daok di dom janih anek athur hoang dã, dalam nan, ralo janih hu vak dalam Tapuk  bhong Việt Nam. Tui Mban khik ramik Bein, urak ini lac tukvak tabung glaong di bilan thu, mblang taneh glai bo đơn vị khik iek daok dang anak bruk cảnh báo khuah pakat 5 – pakat biak nguy hiểm. Kayua nan ye, dom jabat pambuak pagam tal tuk halei jeng daok caga, khik ka glai hu siam mekre. Ong Vương Đức Hòa, Phaok akaok Mban khik iek Bein negar Bù Gia Mập lac: Mban Giám đốc tacei pato dom balai kiểm lâm saong Bein negar njauk caga bruk pacang padam pui khuah glai, khik iek glai. Khaol dahlak tuk halei jeng hu mbaok khik caga piah ngak siam bruk pacang padam pui khuah glai.

Ralo thun tapa, bruk pacang padam pui khuah glai di Bein negar Bù Gia Mập hu ngak siam, oh hu mbang khuah glai halei prong rah tabiak. Bruk pathram pacang caga khuah glai jeng hu đơn vị gam gam peih tabiak, dom urang jakar, urang ngak di labik ini jeng hu ralo ilamu dalam bruk ini. Min oh lac yau nan bo dom urang khik iek glai labik ini takik sangka. Ong Vũ Đình Trúc, Phaok akaok Chi cục Kiểm lâm tỉnh Bình Phước brei thau: Gah Kiểm lâm dang akaok, taphia di nan padang dom kapul nyaom,  piah pacang caga khuah. Tal urak ini, meng bruk kuhria caga pandap panda tal menuac urang jeng hu brei bruk cambaih laih piah ngak siam bruk pacang padam pui khuah glai.

Yaom lac hu ralo ilamu dalam bruk pacang padam pui khuah glai, min dom urang daok khik iek “hala phổi hijao” ini jeng oh ka sahanang hatai tuk bein hu yaok pluh ki-lô-mét jalan pacang cakak, jaik taphia haong labik đệm. Gam haong nan daok hu jalan tuần tra tapen negar; jalan giáp ranh haong tỉnh Đắk Nông. Ini lac dom labik mbuan ba tal khuah glai kayua manuac urang nao mai ralo. Taphia di bruk pacang caga khauh glai, urang jakar – urang ngak bruk dalam Mban khik iek Bein negar Bù Gia Mập jeng kakei taong abih manuac urang tame glai atau nao tapa glai brei thau khik iek glai, pacang caga khuah glai. Nan jeng lac jalan rik daong ka bruk khik iek siam mekre ka “hala phổi hijao” ini./.