Ngan saong urang bangsa takik, limen lac sa drap ar praong, hu labik dang praong dalam raidiuk, hu maong yau menuac dalam sang, dalam puk palei di drei. Di xã Đak Nhau, huyện Bù Đăng, tỉnh Bình Phước hu sa baoh sang urang bangsa M’Nông lac sa dalam dom baoh sang yau nan. Dom urang nan daok kham merat khik iek dom drei limen daok veik di ceik glai.

Yaom lac umo bahrau labaih 20 thun, min sa-ai Điểu Trọng hu labaih 10 thun kak kajap haong dom drei limen di sang drei, bruk ini nyu daong ka sa-ai hu rilo ilamu jang dalam bruk pato limen. Tui sa-ai Trọng, yaom lac hu rilo động tác điều khiển min dom tín hiệu meng sap di urang pato limen jeng lac praong di abih saong tapa nan limen nyu ngak tui hatai di urang pô. Limen yaom lac praong saong trak damak, min nyu biak gheih. Sa-ai Điểu Trọng palei Đak La, xã Đak Nhau, huyện Bù Đăng, tinh Bình Phước, lac: “Pato limen mbuan min, limen nyu pang tui saong thau hu hatai caong di urang pô. Nyu daong ka drei biak rilo bruk. Ngan saong dahlak, limen yau ayut sahabat. Mboh anit saong abih hatai iek glang ka nyu”

2 drei limen pajaih châu Á trak jaik 2 tấn sa drei, umo di nyu labaih  50 thun, min nyu biak khang kadang, daok menek hu siam. Meng sa drei athur glai tuk hu pato, livik livik harei limen nyu jeng ayut sahabat di anek menuac dalam raidiuk yaok harei di labik ini.

Lingiu bruk pandar limen ngak pren dui pandap trak ka mikva yau ye dui kayau, pajeng pandap, ngan saong urang M’Nông, limen daok ba mai patuah jamo. Kayua yau nan ye, yaom lac hu rilo menuac mai khin blei min sang oh pablei, bo khik veik piah raong, piah brei veik ka anek taco.

Sa-ai Điểu Vóc, palei Đak La, xã Đak Nhau, huyện Bù Đăng, Bình Phước, daok raong pato limen, brei thau: “Drei raong ka nyu siam, drei iek glang siam mekre ka nyu, abih di nyu nan lac tuk nyu ruak kik. Dahlau deih ong kaok caik veik, tal rai di drei jeng kham merat caik veik ka anek taco di drei harei hadei. Drei iek nyu yau drap ar praong di drei, nyu kak kajap haong drei.”

Urak ini Bình Phước hu 6 sang di huyện Bù Đăng daok raong 8 drei limen binai, pajaih châu Á, yaok drei trak meng 2 - 3 tấn, umo meng 30 - 50 thun, dalam nan hu 7 drei khang kadang, daok menek hu siam. Tui Chi cục Kiểm lâm tỉnh Bình Phước, meng quý 4 ini, Chi cục brei daong 4 baoh sang raong 4 drei limen di xã Đắk Nhau, huyện Bù Đăng, tui yaom daong 500.000 đồng yaok bilan ka sa drei limen tui hatai caong di dom baoh sang, saong piah daong paglaong akaok sahneng ka yaok urang dalam puk palei ka bruk khik iek tapon limen./.