Bình Phước sa sang urang jaoh jo kham merat yam tagok

Nao tal ấp 8, xã Thanh Hòa, huyện Bù Đốp, tỉnh Bình Phước tangi sang saai Trần Minh Thống daok ieu lac “ Thống jaoh” urang labik ini thei jeng thau. Saai Thống jaoh jo meng tuk daok sit. Sai hu 3 urang anek ye dua urang jeng jaoh jo yau saai. Bruk mbang ngui di sang tuh tagok bra urang diuk lac saai Nguyễn Thị Thu Thủy. Daa mikva saong grauk yut nao ravang sa sang đặc biệt ini tapa kadha kadha vak alani di Đoàn Sĩ – urang vak di rayo sap ndom VN :

Ndih dalam baoh hẻm di sa palei, baoh sang pakat 4 di saai Trần Minh Thống saong saai Nguyễn thị thu thủy tuk halei jeng hu mikva puk paga sangka, kayua raidiuk biak kan kandah. Saai jaoh jo abih dua gah takai gam dua gah tangin, hu saai kumei anit blaoh jeng diuk jeng pasang, bloh hu anek tacoa menek tabiak dalam chreih chrai di dua saai. Min anek kumei tacoa jeng jaoh jo dua gah tangin takai yau urang ame di drei. Dua thun hadei, diuk pasang saai menek hu anek ka dua, oh ka hu bui sambai ye bruk duh hatai daok tuh mai ka diuk pasang ini. Anek ka dua jeng jaoh jo yau urang ame saong urang saai di drei. Tok hu sa urang anek kumei taluac hu siam mekre saong ba mai bui sambai ka dua saai. Jaik 25 thun tapa, bruk praong sit dalam sang jeng tuh tagok bra di saai Thủy. Rambah di abih lac anek kumei jaoh jo di sai luac harei toh thau ndih di leneng, bruk mbang, ndih tal ngak hacih rup pabhap jeng kayua sa tangin urang amaik ngak abih. Yaom lac dua gah takai, tangin jaoh jo yau urang saai di drei, min Trần Ái Hải Sơn anek likei di saai Thủy saong saai Thống, patuah lac daok la hu saong urak ini adei lac anek saih tal bac 9A 1, sang bac trung học cơ sở Thanh Hòa gam saong urang adei kumei di drei. Hải Sơn ndom lac : Dahlak nao bac tok thau daok sa labik min, oh bui mein yau dom ayut hu. Gru pato tuk halei jeng sangka saong daong dahlak. Dahlak kham merat bac abih pakat bac 3 blaoh ruah ngành hadei. Dahlak takre  công nghệ thông tin.)

Langiu paok jien biak takik meng bruk paik amraik kalu, jaoh tangei, mbang pah ruah asar pa-ok blait, raidiuk di sang saai Thống saong saai Thủy tok thau pagam pambak paok jien daong yaok bilan meng Kapul Bảo trợ  urang joah jo – uranaih metui saong urang ruak kathaot tỉnh Bình Phước. Langiu di nan, sang saai daok hu Đồn Biên phòng Thanh Hòa daong yaok bilan 500 rabau đồng ka adei Hải sơn nao bac. Saai Nguyễn Thị Thu Thủy khan lac :  Hu karja palei saong urang jakar bien phòng daong ka anek dahlak yaok bilan 500 rabau đồng piah anek hu nao bac. Bruk bac di nyu jeng biak kan kandah saong kurang biak rilo, min sang biak kan kandah. Saai maong tame jeng thau paje, sa urang bo raong tal 4 urang ngak habal bo oh kan kandah”

 Kayua sang kan kandah, nan ye sang saai Thống saong saai Thủy tuk halei jeng hu bruk sangka di karja palei saong mikva puk paga. Saai Ngô Văn nưỡng – akaok ấp 8, xã Thanh Hòa, huyện Bù Đốp, tỉnh Bình Phước brei thau : mboh sang saai yau nan kol dahlak jeng pandik harao rilo, daong hu hagait ye daong : Mboh sang saai Thống biak kan kandah sang hu tal 3 urang jaoh jo saong tok hu sa urang ngak raong tal 5 urang. Sang ini jeng biak lac đặc biệt. Karja palei jeng sangka ka sang saai, min kayua điều kiện jeng hạn hẹp, yau nan ye, rilo jang lac sangka pachreih ba.

Yaom lac raidiuk jeng daok rilo kan kandah, yaom lac dom urang anek di drei oh hu siam mekre, min diuk pasang saai Thống saong saai Thủy di ấp 8,  xã Thanh Hòa, huyện Bù Đốp, tỉnh Bình Phước  jeng kham merat abih pren drei piah ka dom urang anek di drei hu ba drei tame bhapbini saong yam tagok dalam raidiuk./.