Oh daok bruk pablei salih chreih chrai yau dahlau diah, labik jaik taphia huyen Đồng Phú, tỉnh Bình Phước saong xã An Bình, huyện Phú Giáo, tỉnh Bình Dương dom harei ini oh mboh menuac nao kuah katak cao su, blei katak di dom bein cao su. Dom sang pala cao su daok duh hatai kayua yaok rituh hecta cao su tame bilan kuah katah, yaom tagok min oh kuah mek hu kayua jit ruak Covid-19.

Huyện Đồng Phú lac sa dalam dom labik hu rilo urang njom Covid-19 di tỉnh Bình Phước, pataom tame dom xã Tân Hòa, Tân Lập, Tân Lợi saong sruh jit ruak di palei Đồng Tân (xã Tân Hòa) sraw kadau abih ngan saong yaok pluh urang njom Covid-19, yaok rituh bhap bini brei daok karei di sang.  UB bhap bini huyện Đồng Phú iew brei padeih bruk blei katah, kuah katah cao su di dom bein cao su di klau xã. Dalam nan xã Tân Lợi hu labaih 3.000 hecta cao su, dom baoh sang  hu jien tame meng katak cao su meblah labaih 60% bhap bini dalam xã, 19 doanh nghiep blei katah cao su lac menuac dalam xã. Bruk padeih blei, padeih kuah katak cao su ngak ka bhap bini gaok kan kandah

Meng akaok thun 2021, sa-ai Hồ Văn Bình daok di Ban Đồng Xoài pah taneh di xã Tân Lợi ngak labik blei katah cao su. Yaok harei sa-ai Bình blei 3 tấn katak cao su, yaom 75.000 đồng sa kg, laba hu 1 trieu đồng sa tấn. Meng tuk brei pa-atah di gauk tui Sarak 16, saai Bình oh hu jien tame. Sa-ai lac: “Bilan pa-ok blait khat lahik nan ye jien mek tame daok pamaong tame katak cao su min. Dahlak caong lac tukvak pa-atah gauk tapa samar piah peih veik labik pablei salih, tani tanat bruk ngak mbang”.

Oh lac labik blei katah, rilo sang pala cao su jeng gaok  kan kandah. Tui sa-ai Nguyễn Thành Hưng daok xã Tân Lợi, kuhria rah tapa, yaok baoh sang urang dalam xã hu pala 2 hecta cao su, kuah mek katak saong iek glang eng, yaom pablei meng 72.000-75.000 đồng/kg, tani tanat jien mek tame meng 1,5 trieu tal 2,2 trieu dong sa harei. Bruk padeih kuah katak piah pacang jit daok ngak trun jien mek tame di mikva.

Tui Đảng ủy xã Tân Lợi, xã hu rilo urang F1, F2 pambuak tal dom urang njom Covid-19 di xã Tân Hòa meng dom menuac blei, kuah katak cao su. Urang nao tame tui jalan hluk sit dalam bein cao su tame xã Tân Lợi nan ye bruk pasang iek biak kan kandah. Kayua yau nan ye, xã brei hu jalan pacang cakak jit njom mbak, abih di nyu lac meng xã An Bình jaik nan, lac sa dalam dom bhum bhong meriak ka Covid-19.

Hadei di tuk Bình Phước saong dom tỉnh, ban gah Meraong negar brei paatah gauk tui Sarak 16 di Thủ tướng Rajaei, UB bhapbini huyện Đồng Phú iew dom xã yaok pataom urang dalam huyen, kuhria dahlau pandap mbang  ka dom baoh sang bhap bini dalam dom harei brei pa-atah gauk; meyah kurang brei khan chip piah hu jalan pabak sumu saong khan lac labik halei oh pathau khan, caik ka bhap bini kurang pandap mbang ye urang jakar ngak praong di labik nan taduan trach nhiem.

Baoh sang sa-ai Nguyễn Văn Thành, xã Tân Lợi hu 3 urang kuah katak mbang pah ka dom po bein cao su. Jit ruak mbang ini njauk padeih ngak ye taduan  hu jien daong tui Sarak 68 di Rajaei 1,5 trieu đồng sa urang, gam saong brah, mì tôm saong kaya mbang karei.

Bí thư Đảng ủy xã Tân Lợi - Mai Xuân Long daok brei thau lac, xã hu yaok pataom angan urang ngak bruk ka dom po bein cao su, ngak mbang apah dalam dom labik blei katah cao su dalam xã piah hu jalan daong tui Sarak 68. Langiu di nan, urang ngak daok hu daong brah, mì tôm, menyek mbang…haong dom pandap mbang karei piah sahanang hatai gam saong puk palei pacang jit Covid-19./.

Urang lang: A.Nghiem – 31/8/2021