Sa-ai Đặng Bi, urang taong ikan daok di xã Long Hải brei thau: sruh gilai ini hu ngak birau meng phun jien mesre tui Sarak 67 di Rajaei. Trun ia di akok bilan 6, gilai BTh 97887 saong dom urang nao gilai ini tabiak taong ikan di labik tathik atah yaok rituh hải lý vil val bhum tasik Trường Sa. Dua mbang nao tathik jeng lac dua mbang taong cap hu rilo ikan hadang. Mbang camereip hu 9 tấn, mbang hadei hu 8 tấn, sa-ai Đặng Bi chreih chrai lac: "Ngak blaoh gilai, ba trun ia nao taong ikan hu dua mbang. Abih tih hu labaih 1 tỷ đồng, kaok abih jien buh tame daok hu labaih 700 triệu đồng. Dom thun anak tal, meyah mek hu yau nan veik, dahlak kuhria dalm 4 tal 5 thun bayar hu abih jien mesre di Karja.

Urang nao tathik angan Châu Minh Cương daok di palei Triều Dương, xã Tam Thanh jeng hu ngak birau gilai prein khang 500CV saong yaom jien jaik 5 tỷ 800 triệu đồng. Dalam nan 4 tỷ đồng lac jien mesre meng Gilang pariak ngak nong saong Patagok palei pala Phú Qúy. Meng hu phun jien 67, sa-ai Châu Minh Dương meng hu ngak po sruh gilai hu prein khang, nao taong chap ikan di Trường Sa. Sa-ai Cương lac: "Dahlau diah tok hu kapal sit, jamriak 33 CV, nao cap ikan di labik tathik atah meng 40 hải lý min. Dua klau thun ini, ikan hadang di tathik jaik oh daok. Min hu phun jien di sarak 67 ini ngak gilai praong, jamriak bahrau, tabiak tathik atah taong cap hu rilo ikan hadang jang gilai sit dahlau diah."

Gilai trun ia hu labaih 6 bilan, pô gilai  lac sa-ai Châu Minh Cương nao taong ikan hu 3 mbang blaoh di pulao Trường Sa, kaok abih jien buh tame ngak saong bayar ka dom adei sa-ai nao gilai saong gauk, sa-ai daok laba hu jaik 500 triệu đồng. Oh thun halei pasang nao tathik ba jien mai rilo yau ini, sa-ai Nguyễn Thị Mười Một, diuk di sa-ai Cương mboh bui sambai rilo kayua sang hu rilo jien padai jang:“Thun ini ngak gilai 67, saai nao tathik mboh hu rilo jang yaok thun. Jien duah hu rilo jang. Blei sap janih ka anek bik.”

Kuhria tal puac thun 2015, di pulao Phú Qúy hu 130 hồ sơ hu Ủy ban Bhap bini tỉnh Bình Thuận mbaok tangin brei ngak bahrau gilai tui Sarak 67 di Rajaei. Dalam nan, 36 urang hu nao tal gilang pariak tut angan mesre jien saong 24 sruh gilai hu peih jien brei mesre 115 tỷ đồng. Meng phun jien nan, 14 sruh gilai ngak birau hu ba trun ia nao taong chap ikan dalam quý 4 thun 2015. Ong Trần Văn Cường, akok Gilang pariak Ngak nong saong Patagok palei pala huyện đảo Phú Qúy brei thau: tapa tui iek, dalm quý 4, dom gilai ngak bloh trun ia nao taong ikan mboh hu kein laba. Kaoh abih jien buh tame ngak, yaok sruh gilai laba meng 200-300 triệu đồng yaok mbang nao tathik:“ Gilang pariak khol dahlak biak uan tabuan, kayua phun jien di Rajaei buh tame njauk bruk saong ba mai kein laba. Dom gilai nan meda bayar hu jien mesre saong jien jhung njauk tuk vak, hu gilai sanya bayar klaoh sre dahalu tukvak."

Ong Nguyễn Văn Linh, Phó Akok Ủy ban bhap bini huyện đảo Phú Quý brei thau: Huyện thau lac, patagok bruk ngak mbang di tathik nan lac bruk praong di huyen dalam tuk vak anak tal. Kayua yau nan ye, daong patagok bruk taong chap ikan tui Sarak 67 di Rajaei saong dom sarak karei daok peih ngak hu makna biak praong ngan saong urang nao tasik dalam huyen: “Ini lac kadha praong, meng tuk hu Sarak 67 ye mikva hu mesre phun jien nan biak uan tabuan. Urak ini hu dom sruh gilai daok tabiak tathik saong mek hu rilo kein laba. Dahlak sahaneng lac anak tal, gah kinh te tathik di khol drei hu cak rok patagok jang meng Sarak 67 ini.”

Dom mbang nao tathik taong cap hu rilo ikan hadang daok ba bui sambai mai ka urang taog chap ikan di huyen pulao Phú Qúy. Meng dom sruh gilai prein khang, akaok thun sak kra, urang taong ikan di Phú Qúy khang hatai nao tabiak tathik atah, patagok bruk ngak mbang duah jien ka baoh sang, saong tapa nan khik caga bruk ngak po tathik di taneh ia./.