Bahrau ini, glai pacang caga Sông Lũy, tỉnh Bình Thuận, labik giáp ranh haong tỉnh Lâm Đồng njauk palai pajoa biak khang. Yaom lac hu brei rilo menuac nao tui iek, khik caga, min gah pô glai jeng kan jhul kadun likuk hu bruk tak mek kayau suan adat hukum daok rah tabiak.

Tiểu khu 73A daok di xã Phan Sơn, huyện Bắc Bình urak ini lac sa dalam dom labik palai pajoa glai khang di tỉnh Bình Thuận. Bhum glai ini daok jaik taphia tỉnh Lâm Đồng nao mai biak kan kandah. Lahik jaik sa harei nao jalan, nao tapa huyện Đức Trọng, tỉnh Lâm Đồng, hadei di nan ndik tagok dom mbuan ceik glaong saong craoh dalam, kol dahlak meng nao tal labik. Pak ini, rilo phun bằng lăng, dầu rái, sến mủ hu đường kính labaih meteh mét njauk kol meblah glai tak jaleih daok ndih angaok mbaok haluk. Tapen nan lac dom papan kayau hu kol meblah glai kaoh bloh, min oh ka ba nao abih. Hadei di tuk duah mboh, dom urang khik caga glai Sa Mai hu pathau khan brei pakat angaok thau. Ong Nguyễn Tấn Hào, akaok bilai khik caga glai Sa Mai lac: Adei sa-ai duah mboh saong pathau khan tagok piah langyah. Urak ini rah tabiak bloh, brei nao tui iek, khik caga luac harei melam di dom labik glai giáp ranh.

Bilan 12 meng bloh, mBan khik iek glai pacang caga Sông Lũy hu padang dom kapul nao pasang iek, duah thau pak labik. Mbăng pasang iek di harei 3 bilan 12 mboh lac di tiểu khu 73A, labik glai khik iek di bilai Sa Mai, 42 got bằng lăng samu labaih 49 m³ kayau njauk kol meblah glai kaoh mek. Di tiểu khu 79 labik khik iek di bilai Đại Ninh, 16 got samu jaik 24 m³ kayau jeng njauk kaoh, pajaleih.  

Dalam 2 mbang pasang iek di harei 16 saong harei 20/12, mboh lac di tiểu khu 73A hu 29 phun bằng lăng, 4 phun dầu rái, 2 phun sến mủ saong 1 phun trâm samu labaih 63 m³ njauk kol meblah glai kaoh, pajaleih. Kol nyu pajeng nao hu meneing, daok veik daok ndih angaok mbaok haluk. Ong Phan Văn Minh, akaok mban khik iek glai pacang caga Sông Lũy, tỉnh Bình Thuận lac: Tuk mboh dom labik hu kol meblah glai, kol dahlak parabha menuac nao khik iek di dom labik giáp ranh. Urak ini padang hu 3 tổ daok khik iek di dom canah jalan bo kol meblah glai bhian tame. Biak di nyu, bruk pacang cakak, cap mek pandap kaoh glai haong menuac meblah glai lac bruk praong jang pren di kol dahlak.

Urak ini daok labaih 35 m³ hu kol meblah glai kaoh bloh min oh ka pajeng nao, daok ndih veik dalam glai. Sở ngak nong saong patagok palei pala tỉnh Bình Thuận brei rilo kapul kiểm lâm cơ động di tỉnh tabiak daong mBan khik iek glai pacang caga Sông Lũy khik iek dom labik pandiak, khik caga hiện trường, cang gah angaok mai ngak harak khởi tố vụ án palai pajoa glai.

Glai pacang caga Sông Lũy praong labaih 23.000 héc-ta, dalam nan labik giáp ranh haong tỉnh Lâm Đồng lac glai hijao hu kayau biak rilo. Kayua yau nan ye, kol meblah glai di tỉnh Lâm Đồng bhian tapa ini kaoh mek. Jalan ceik glai nao mai kan kandah, kol meblah glai hu rilo menuac saong biak jhak, dalam tuk nan kapul khik ikek glai di labik ini biak takik menuac saong kurang công cụ hỗ trợ, nan ye kan pacang hu bruk palai pajoa glai. Bruk cagar veik, taong veik kapul khik iek glai dalam tukvak tapa jeng lac bruk njauk báo động. Bahrau abih, di melam 11 bilan 12 meng bloh, kol meblah glai cagar veik kapul khik iek glai, ba pa-nduac 2 radaih pajeng kayau di bilai Đại Ninh saong bilai Sa Mai. Ndom ka bruk di anak meta, ong Nguyễn Văn Hòa, akaok kapul cơ động, mBan khik iek glai pacang caga Sông Lũy brei thau: Kol dahlak nao tok hu dom mbaik gai điện min, dalam tuk nan kol meblah glai biak jhak, nyu hu mã tấu, hu phao ngak eng, nyu cagar veik, nyu taong veik kapul khik iek glai. Dua tra, kol nyu daok jaik palei Ninh Loan di Đức Trọng, nan ye bruk pacang cakak biak kan)

Glai pacang caga Sông Lũy giáp ranh haong tỉnh Lâm Đồng dui atah labaih 50 mbaik jalan ceik, nao mai kan kandah. Kol meblah glai bhian cagar veik, taong veik kapul khik iek glai, đe dọa tính mạng dom urang khik iek glai. Kapul khik iek glai di labik ini gam takik menuac gam kurang công cụ hỗ trợ, nan ye meyah mboh kol meblah glai, jeng oh cap mek hu dom kapul meblah glai mai meng Lâm Đồng. Meng bruk yau nan, dalam bilan pandiak, abih di nyu nan lac tuk jaik Tết thun sak pabe, mBan khik iek glai pacang caga Sông Lũy jeng daok gaok rilo kan kandah dalam bruk khik iek glai./.