Bruk khik ramik piah ngak tabiakpandap panda 

Anak bruk kan kandah yau gauk, dom doanh nghiệp di Bình Thuận brei mboh rilo kham merat dalam peih ngak tui panuac ieu, kakei di dom pakat karja ka bruk pacang caga COVID-19. Meng nan, bruk ngak mbang pablei salih di doanh nghiệp gah ngak kong khik hu tani tanat, ngak hu glaong jang dut haong tukvak ini thun dahlau. Kuhria rah tapa dalam 8 bilan thun 2021, bruk ngak tabiak di gah ngak kong tỉnh Bình Thuận kuhria tagok 4,35% dut haong tukvak ini thun dahlau, yaom jien meng bruk ngak kong mek hu jaik 23.960 tỷ đồng, tagok labaih 6% dut haong tukvak ini thun dahlau.

Yau nan min, dalam tukvak peih bruk brei daok atah di gauk, bruk ngak kong di dom puk palei peih ngak tui sarak 16 gaok biak rilo kan kandah. Kayua lac doanh nghiệp caong khin patui veik bruk ngak brei khik hu dom  bruk pacang caga jit saong peih ngak tui 1 dalam 2 jalan ngak, atau peih ngak gam 2 jalan nagk. Cambaih laih nan lac jalan ngak  “3 di labik” (Ngak tabiak di labik, mbang menyum di labik, padeih padei jeng di labik) saong jalan ngak “1 jalan nao – 2 labik tal” (tok hu sa jalan pajeng ba urang ngak meng labik ngak tal labik daok di urang ngak). Yau nan, dahlau di tuk karja palei brei pacadhu bruk brei daok atah di gauk, Sở Công Thương mboh lac di Phan Thiết hu 225/246 doanh nghiệp ngak kong njauk padeih ngak. Dalam tukvak ini, bal hu 21 doanh nghiệp peih ngak tui jalan “3 di labik” atau “1 jalan nao - 2 labik tal”. Ngan haong La Gi, hu 14/21 doanh nghiệp ngak kong padeih ngak bruk, tok hu 7 labik tut angan ngak tui jalan ngak khik hu bruk pacang caga jit ruak.  

Tapa duah thau, Sở Công thương tỉnh Bình Thuận mboh lac ngan haong doanh nghiệp ngak kong di dom labik oh pandar Sarak 16 ye dalam tukvak tapa jeng daok peih ngak. Saong bahrau ini hadei di tuk pacadhu bruk brei daok atah di gauk, dom doanh nghiệp dalam ban Phan Thiết jeng yau ban sit La Gi hu peih ngak gilac tui jalan ngak 50% trực tuyến, parabha ka...

Jaik di ini, kadha kuhria caga gilac veik bruk ngak dalam tukvak siam mekre bahrau ka jaik abih dom bruk ngak mbang kinh tế daok hu rilo puk palei sangka. Jeng mbuan thau kayua meng ini tal puac thun 2021 nan lac tukvak bo taong abih doanh nghiệp thei jeng caong khin patagok bruk ngak tabiak – pablei salih, kham merat ngak salah blaoh dom bruk hu ba tabiak.  

Anak meta mboh lac, jit COVID-19 yaom lac daok trun saong daok pasang iek hu siam jang min biak kan si thau tal tuk halei jit ruak meng abih, kayua yau nan ye jalan ngak “diuk haong jit” jeng njauk kuhria tal. Min yaom lac yau habar jeng kham merat brei ka jalan ngak oh caik jaoh jaleih bruk pabak brei – ngak tabiak – pablei tabiak, daong grap tanat bruk ngak mbang di dom doanh nghiệp dalam tỉnh.   

Meng dom hagait hu mboh di puk palei, bahrau ini Sở Công Thương tỉnh Bình Thuận hu panuac pathau tagok Cục Công nghiệp (Mentri Công Thương) saong dom jabat thẩm quyền brei ngak dahlau bruk klauk vaccine pacang caga  COVID-19 ka urang ngak di doanh nghiệp, tapa nan pacang cakak hu jit ruak saong patui veik bruk ngak mbang pablei salih. Taphia di nan caong khin Mentri  Công Thương dang tabiak, pambuak bruk haong gah Y tế tacei pato pabak cambaih laih dom jalan ngak, piah peih ngak siam gam pacang caga jit ruak, gam ngak tabiak siam mekre piah ka nyu laghaih haong dom hagait bo jit ruak COVID-19 daok rah tabiak di dom puk palei./.

Urang lang: Jaji -27/9