Hu labaih 10 thun ngak bruk di bhum glaong, pambuak pagam saong mikva bangsa takik, saai hu thau cambaih yaok canah jaklan sit praong di xã Phan Tiến ini. Yaom lac sang daok gaok ralo kan kandah min saai tuk halei jeng kham merat ngak siam bruk ngak di sa urang gru jru. Nan lac urang kamei bác sĩ angan Đoàn Thị Phơn, urak ini lac akaok blai y tế xã Phan Tiến – sa xã biak kan kandah di huyện Bắc Bình, tỉnh Bình Thuận. Pahadar harei gru jru VN 27/2, Đoàn Sĩ – urang vak di rayo sap ndom VN daok di ban raya HCM hu kadha vak brei thau kreh camin abih hatung hatian ka urang ruak di urang kamei bác sĩ ini:

“Adei thau halei oh, tuk anek di saai hu 5 bilan saai hu pok mai ini ye, tal tuk hu urang ndih tapui di sang tabiak drah saai njauk nao tal labik nan cấp cứu. Dalam tuk anek daok di sang cang mum hia abih ia meta, amaik di saai huac lo pok taco nduac nao tal labik cấp cứu, dang gah lingiu, gah dalam saai daok cấp cứu ka urang, yau nan dua amaik anek jeng nao cấp cứu. Sahneng veik mboh rambah min jeng mboh sambai”

Nan lac sa kadha bo bác sĩ Đoàn Thị Phơn oh var hu. Ndih tapui tabiak di bhum taneh Thái Bình min praong tagok saong padang mbang ngui di xã Sông Lũy, huyện Bắc Bình, tỉnh Bình Thuận. Thun 1994, saai bac tamat sang bac trung cấp y tế Phan Thiết. Kayua jien bilan takik, nao ngak ye jalan dhuan atah bayah nan ye pasang saai oh khin saai tui ngak bruk y. Min ngan saong hatai takre bruk ngak, saai  kham merat tame ngak di phân trạm y tế Song Bình daok dalam xã Sông Lũy. Thun 1999, saai salih nao ngak di blai y tế xã Phan Tiến – labik hu ralo bhap bini bangsa takik diuk rai, lac sa dalam 4 xã biak kan kandah di huyện Bắc Bình. Tal thun 2008, hu pakat angaok daong, saai hu vak angan tame sang bac đại học y Phạm Ngọc Thạch, ban raya HCM piah paglaong ilamu ngak bruk. Saong hadei di 4 thun bac megru, urak ini anai y sĩ đa khoa harei dahlau hu jeng sa bác sĩ.

Labaih 10 thun dahlau, Phan Tiến hu iek lac pasak di ruak pandiak dom. Kayua yau nan, blai y tế xã biak sangka tal bruk pathau khan pacang cakak ruak pandiak dom ka mikva. Hu melam sa drei saong baoh pui cambat, bác sĩ Phơn nao tal yaok baoh sang hu urang ruak pandiak dom brei jru saong tacei pato mikva kak kamo dahlau tuk nao ndih. Abih tuk iek ruak, saai gam saong urang jakar y tế palei nao tal sang hu urang kamei metian piah iek ruak saong jak ba adei saai tame blai piah ndih tapui...., yaom lac bruk nao mai dalam tukvak ini biak kan kandah. Tuk mehit dahlak tangi sua, hu bằng bác sĩ bloh ye, saai meda sahneng tal bruk klak labik ini nao halei oh? Bác sĩ Đoàn Thị Phơn lac:

“Ngak labik halei jeng yau nan, praong di abih nan lac lagaih saong drei atau oh. Mikva di labik ini jeng salut mbut, urak ini bo pandar drei trun bhum taneran atau tagok sang iek ruak ye drei oh takre. Piah thau ka mikva ye brei hu tukvak. Ka dua tra lac dahlak mboh urang gru jru bo thau cambaih jit ruak, jit tễ oh lac dalam dua klau harei bo saai daok di labik ini labaih 10 thun ye. Jit tễ di bhum ini ye dahlak thau abih, sang hu hadom urang, thei ruak hagait, sang daok di labik halei nan lac bruk mbuan lagaih ka dahlak”.

Meda lac oh hu sa urang halei daok di bhum glaong Phan Tiến ini bo oh thau tal bác sĩ Phơn – sa urang oh lac abih hatai jai ka bruk ngak bo daok lac sa urang đồng nghiệp siam, sa urang slut mbut, sa urang jakar hadah krah. Nan lac panuac di y sĩ Mang Dí – sa dalam dom urang daok ngak hong bác sĩ Đoàn Thị Phơn di blai y tế xã Phan Tiến ini. Y sĩ Mang Dí daok brei thau lac:

“Dom bruk hagait bo saai ba tabiak, gah ilamu, daong ka adei dalam bruk ngak, daong adei chẩn đoán ruak cambaih laih jang nan lac gah chuyên môn. Daok ngan saong adei saai dalam blai saai bhian pachreih ba ka nyu salah bruk, saai tuk halei jeng klao sambai saong adei saai. Dom hatai saneng, dom caong khin di adei saai jeng hu  saai Phơn caik hatai saong klak rabha, duah jalan daong ka adei saai. Saai njauk lac urang sa-ai  piah ka adei saai bac megru”.

Ndom ka bác sĩ Phơn, ong Nguyễn Thái Trung – phaok giám đốc pasak y tế huyện Bắc Bình, tỉnh Bình Thuận brei thau:

“Dalam bruk ngak Phơn nan lac urang jakar biak abih hatai jai, hu trách nhiệm, biak kham merat dalam bruk ngak, diuk rai siam, ndom puac saong urang daok ngak hong gauk jeng biak siam. Meng tuk blai daok gaok kan kandah, urak ini blai hu padang ngak barau khang kajap, ginup pandap panda ye dahlak saneng lac talei pambuak bruk di bác sĩ Phơn di blai y tế Phan Tiến njauk pok meyaom”

Tuk likau la, saai ndom saong dahlak lac: “Bruk cuk ao blouse oh lac mbuan, tuk yam takai tame nyu hu makna lac chấp nhận hy sinh dom bui sambai di drei saong brei hu trách nhiệm. Urang gru jru meda jeng urang amaik ka dua ba suan yava ka menuac urang, min meyah oh sangka nyu jeng mot mek yava. Saneng mboh yau nan bo rilo thun tapa, bác sĩ Đoàn Thị phơn oh padeih kham merat, ngak siam bruk di drei tui jalan lac: gru jru yau urang amaik./.