Pathau mikva saong taong abih gauk! Pandiak bhang dui atah  ngak kan kandah biak rilo tal bruk pala drak jeng yau bruk ngak mbang, ngak huak di bhap bini tỉnh Ninh Thuận. Tukvak tapa, taphia bruk daong di karja dom pakat, bộ chỉ huy quân sự tỉnh saong quân khu 5 hu dom bruk ngak piah klah rabha dom kan kandah di bhap bini bhum pandiak bhang. Việt Quốc, urang vak di rayo sap ndom VN daok di ban raya HCM hu kadha vak “bol bala daong bhap bini Ninh Thuận yam tapa pandiak bhang”. Daa mikva saong taong abih gauk tui pang:

Phước Dinh lac xã daok jaik tasik di huyện Thuận Nam, tỉnh Ninh Thuận. Kayua pandiak bhang biak khang, ia ngầm di labik ini njom mbak, oh pandar hu. Dalam sa tukvak suai livik, bhap bini njauk blei ia klaok mai pandar. Urak ini, bhap bini oh daok glaih glar ka ia yau dahlau daih kayua hu bruk daong di bol bala. Amuk Thị Quảng, palei Từ Thiện, xã Phước Dinh, huyện Thuận Nam brei thau:

 “Urak ini ia di labik ini njom mbak, menyum oh hu, pandar, menay jeng oh hu. Harei ini hu bộ đội angaok nan ba ia trun ka bhap bini naong, hu ia menay, kapah khan ao, ngak mbang huak”.

Di Ninh Thuận, pandiak bhang khang di akaok bilan thu thun 2014. Tapa thun 2015, pandiak bhang dak harei dak khang. Langiu kan kandah ka bruk ngak nông, yaok ribau baoh sang bhap bini dalam tinh laih tame bruk kurang ia menyum saong ia pandar. Anak bruk yau nan, tỉnh NT ieu taong abih hệ thống chính trị ba tangin tame daong bhap bini yam tapa kan kandah. Bộ chỉ huy quân sự tỉnh NT samar pathau khan jalan daong bhap bini tagok quân khu 5 saong mintri QP. Quân khu 5 brei sa tổ y học dự phòng saong radaih halang ia cơ động tame NT. Radaih hu caik labik hu ia lac binek Lâm Cấm – Kraong Dinh, haling ia tự động, hadei di nan ba tapa dom radaih bồn, bat al labik brei i a ka bhap bini. Đại úy – Bác sĩ Trần Văn Chí, phaok kapul Y học Dự phòng, Cục Hậu cần Quân khu 5 brei thau:

“Ini lac sruh radaih biak bahrau, nan ye chất lượng ia meda lac haci hacih tui tanut di mintri y tế. Saong yaok harei, tui định kỳ kol dahlak jeng duk iek piah khik kajap chất lượng ia hacih ye meng pajeng nao dom labik brei i aka mikva”.

12 urang jakar, urang lin di quân khu 5 saong 6 urang jakar, urang lin di bộ chỉ huy quân sự tỉnh NT daok hu mbaok tame bruk brei i aka bhap bini ngan saong 9 sruh radaih, nan lac: sa radaih haling ia, 7 radaih bồn paajeng ia saong sa radaih khảo sát pasang iek. Dom radaih hu brei bruk ba ia ka 4 labik nan lac: xã Phước Dinh saong xã Phước Diêm di huyện Thuận Nam, xã Phước Trung di huyện Bác Ái saong xã Nhơn Hải, huyện Ninh Hải. Đại tá Hoàng Ngọc Thái, akaok chỉ huy Bộ Chỉ huy Quân sự tỉnh Ninh Thuận lac:

“Meng kham merat di drei, kol dahlak hu ba menuac, radaih, cơ sở vật chất piah pataom tame daong bruk pandiak bhang, daong bhap bini patrun kan kandah, meng yaok pluh ribau khối ia, dalam nan hu ia pandar saong ia menyum ka bhap bini”.

Ngak bruk abih hatai jai, hu trách nhiệm, dom urang jakar, urang lin di bộ chỉ huy quân sự tỉnh saong quân khu 5 hu caik veik rilo siam mekre dalam hatai di bhap bini. Saai Nga Thị Lào daok di palei Từ Thiện, xã Phước Dinh lac

 “Dom saai biak abih hatai jai, dom saai oh huac kan kandah. 12 tuk jala pandiak jeng cang, 1 tuk jeng cang piah ka bhap bini drei naong ia. Gaok tuk urang naong bloh, daok sa urang, dom saai jeng daok la cang”.

Dom bruk ngak daong ka bhap bini di bộ đội quân khu 5 saong bộ đội tỉnh hu daong ka bhap bini yam tapa kan kandah, tani tanat rai diuk. Dalam tuk gaok kan kandah, talei rohim di bol bala saong bhap bini dak hu pambuak kajap jang. Dom tanjoh ia klah ndung bak hatai anit ranam, ngak la-ar hatai menuac di bilan pandiak bhang./.