Dom harei tapa, muk Lê Thị Thu Trà, Phó Chủ tịch Uỷ ban Mặt trận negar Việt Nam quận Tân Bình hu mbaok di labik ngak bruk meng saboh aval. Hadei di tuk thuvi thuvar parabha pandap panda ka dom phường, muk langyah drah samar daong ka dom urang kan kandah tapa jalan phone pandiak di Mặt trận negar Ban raya saong quận. Khaw tin samar hu payua tal dom Kapol ngak bruk drah samar dom phường.

Muk Trà brei thau, 15 phường di Tân Bình jeng hu Pasak an sinh abih, hu Kapol ngak bruk drah samar ngak bruk luac harei melam. Meng harei 23 bilan 8 tuk Ban raya brei ngak khang jang bruk pa-atah gauk, Tân Bình samar brei urang jakar di dom jabat pakat quận haong 380 urang jakar urang lin di Quân đoàn 4 mai tal yaok phường, khik kajap bruk daong pandap mbang ka bhap bini: “Urak ini, meng dom paok an sinh, daong brei di dom urang ngak pahala di quận…phường jeng hu caga nan ye tuk bhap bini gaok kan kandah kurang pandap mbang ye karja ba tal chip, oh caik ka mikva eik lipa”.

Sa-ai Nguyễn Thị Thanh Thảo hu dua urang anek sit daok di Khu phố 1, Phường 4, quận Tân Bình brei thau: dom harei ini sang tok hu mì tôm min mì jaik abih ye. Taduan hu kadung pandap mbang hadei di 2 mon iew tal talei phone pandiak, sa-ai oh sahaneng lac sang drei hu daong samar yau nan: “Oh tabiak jalan nan ye khol dahlak lahik bruk ngak 3 bilan ini ye, oh hu jien nao darak. Adei tavak jien điện jien ia. Khol dahlak habar jeng hu min dua urang anek daok sua tangi hagait mbang mì miat yau nan amaik.”

Jit ruak dui atah 3 bilan ni mai,  jeng lac tukvak dom urang jakar phường, quận kham merat daong ka bhap bini. Rilo urang jakar mặt trận, urang đoàn dam dara daok veik di labik taduan saong parabha pandap mbang piah sumu daong ka urang kan kandah. Urak ini hu bộ đội mai daong prein, thei jeng chreih chrai. Thiếu tá Khương Văn Ninh, Chính trị viên Tiểu đoàn 3, Trung đoàn 250, Sư đoàn 309, Quân đoàn 4 saong urang lin papaok pandap piah pajeng ka bhap bini, brei thau: “Trun tal labik blaoh, khol dahlak tani tanat labik daok labik mbang huak, parabha urang tui dom kapol nyom saong samar tame bruk. Camereip oh ka bhian randap jalan mbak nan ye khol dahlak pambuak saong karja, kapol nyaom di phuong, quan piah jao brei pandap mbang tal tangin bhap bini. Caong lac urang jakar urang lin hu rik daong hasit prein yava gam saong bhap bini Ban raya janeh jit ruak praong.”

  Ủy ban MT negar Việt Nam TP.HCM pataom hu sa kapol urang halan hatian SOS. Tapa tổng đài 1022, hu dom mbang urang iew daong drah samar ye kapol halan hatian brei ba kadung an sinh mai alin, dalam nan hu  6 kg brah, 1 klaok menyek mang, 1 klaok ia tương, 2 paok bột nêm, 1 kg saradang, 4 kg baoh kruac, 2 baoh ploi. Daok sang halei hu uranaih, yaok sang hu alin brei 5 lốc ia tasau limo. Muk Tô Thị Bích Châu, Chủ tịch Uỷ ban MTTQ Việt Nam TP.HCM brei thau:“Dom pakat Mặt trận kham merat  piah ka dom paok an sinh sumu hu tal tangin dom urang kan kandah, urang ngak lahik bruk ngak. Bhap bini sahanang hatai, mboh lac tuk halei jeng hu sahaneng tal, klak rabha, sangka daong meng karja, meng nan ba tangin tame haong Ban raya yam tapa jit ruak praong”.

Urak ini, dom kapol nao darak daong ka bhap bini di dom phường xã dak harei dak ngak bruk tani tanat. Dom labik parabha saong taduan pandap mbang huak yaok harei hu dom phường xã peih praong tal khu phố atau tal sang bhap bini praong, laneng. Dom kadung an sinh, kadung pandap mbang di Ban raya, quận huyện, xã phường hu pataom saong pabak gam di dom labik ini. Dom quận, huyện jeng ndom lac, jien daong oh njauk lac thei jang hu kayua brei daong njauk menuac njauk urang, min pandap mbang ye hu ginup ka taong abih dom urang kan kandah./.

Urang lang: A.Nghiem - 30/8/2021