Yaom lac rai duik harei ni hu rilo salih bahrau, min urang Mông (Điện Biên) jeng dok khik ramik siam ilamu meng kan hadah krah di bangsa drei. Sa dalam dom janih ilamu gheih mekre nan lac adat caik angan anek.

Bhap bini urang Mông dok di palei Huổi Múa, xã Keo Lôm, huyện Điện Biên Đông hu biak rilo adat cambat biak mekre, dalam nan hu adat caik angan hu makna biak prong, nyu brei mboh bruk hu mbaok di sa urang bahrau dalam sang, lac kadha camereip dalam rai duik di anek menuac. Adat cambat siam mekre ini jeng daok hu khik ramik dalam rai duik di bhap bini urang Mông.

Meng tuk ndih tapui tabiak tal tuk metai, urang Mông brei tapa rilo adat cambat yau: rija caik angan đệm (ngan saong urang likei), likhah caga, ndam metai… dalam nan bruk caik angan nan lac adat camereip di sa rai menuac. Adat ni hu peih ngak biak mbuan, mbiah, hu 2 binah lac ieu suan yava song taduan angan.

Sa anek kama Mông menek tabiak hu 3 harei, boh sang hu caga ngak adat ieu suan yava mai piah caik angan brei ka anek kama. Tuk ruah hu harei, maong song daa dom urang pambuak tal baoh sang, dom gauk gar but pajaih mai ginup mbaok, adat caik angan di urang Mông meng hu peih ngak di boh sang labik anek kama nan ndih tapui tabiak. Urang dang tabiak ngak adat meda lac urang dalam but pajaih atau lac ong nội di anek kama hu caik angan.

Meng suboh mesup, adat caik angan hu peih tabiak meng bruk pathau khan dom yang mebang. Urang dang tabiak ngak adat mek menuk metah saong baoh menuk metah caik tagok panyin brah bloh am 2 mbaik glau caik tagok angaok ba caik di anak pambah mbang prong. Tangin di urang dang tabiak ngak adat pan 2 candaih take kubao, gam meroi gam mong tabiak pabah mbang. Dalam meroi, ong pathau brei yang mebhang, ong muk ong kei thau lac sang hu sa anek kama bahrau tabiak rai, likau yang mebhang, ong muk ong kei brei ka nyu hu khang kajap, samar prong. 

Dalam adat caik angan ni, adat prong di abih lac bruk palih ruah song caik angan ka uranaih. Angan di uranaih hu tong abih menuac urang ginum biai, ba tabiak song urang dang tabiak ngak adat lac urang quyết định. Tuk pathau khan yang mebhang bloh, menuk metah hu ba nao tuk tasak, bloh urang dang tabiak ngak adat patui bruk ieu suan yava di uranaih mai. Urang Mông sahaneng lac, tuk anek kama bahrau ndik tapui tabiak suan yava di nyu dok nao grauk labik yau nan ye brei ngak adat ni piah ieu suan mai. Ieu suan di uranaih mai bloh, urang dang tabiak ngak adat mek 4 mbaik gilau caik di takai papan ndih, labik uranaih ndih, ngan song hatai caong harei hadei uranaih prong tagok jak gheih, tari tarieng.

Dalam tuk urang dang tabiak ngak adat peih ngak dom adat cambat caik angan ye urang sik menuk, caga alak, rilaow, labik daok, puh ramik sang danaok piah paling muk kei… Tuk bruk kuhria caga hu salah bloh, adei saai gauk gar but pajaih  patom gauk di kreih sang. Tuk bruk paling yang salah bloh, jeng lac tuk adei saai gauk gar song menuac urang mai brei ka uranaih boh menuk, sa gu menuk tano binai, mbao brah bingi, hasit jien song panuac tadhau yhut ka uranaih samar prong, jhak gheih, thau ngak hamu ngak apuh, naih joi nao glai.

Adat caik angan nan lac sa dalam dom janih ilamu gheih mekre dalam gilang ilamu meng kan di bangsa Mông, nyu hu makna biak prong song lac ilamu meng kan njauk khik ramik song patagok./.