Meng di tuk Bà Rịa-Vũng Tàu hu mai veik bruk siam mekre bahrau, dom tỉnh, ban daok jaik taphia yau: Bình Dương, TPHCM – labik hu dom urang ruak Covid-19 jeng pacang cakak hu jit ruak dalam rahra ye tuai nao ravang me-in ban sit Vũng Tàu dak harei dak hu rilo jang. Meyah dahlau Tết Nguyên đán, dom mblang menei ia tasik di Vũng Tàu oh hu tuai ye urak ini hu meng 1 tal 2 rabau tuai yaok harei, daok harei puac adit ye hu tal 5 rabau tuai sa harei. Gam haong bruk tuai mai rilo, dom nhà hàng, kuan mbang kaya ikan pak ini jeng daok peih pablei veik. Sa-ai Lê Thu Hương, po kuan lisei di jalan Hoàng Hoa Thám, phường 2, ban sit Vũng Tàu brei thau, kayua Covid-19 nan ye dahlau Tết meda lac kuan kreik pabah mbang abih. Urak ini, rilo menuac daok mai ravang me-in veik nan ye tuai dak harei dak hu rilo jang: “Hadei di tuk tỉnh BR-VT hu siam mekre veik, dom kuan peih pablei yaok harei hu meng 70 tal 100 tuai, daok harei puac adit hu rilo jang 3 mbang, jaik 350 tuai sa harei”.

Tui Hiệp hội Du lịch tỉnh BRVT, duk haong tuk dahlau Tết, yaok harei abih labik dalam tỉnh hu 2 tal 3 rabau tuai, dom harei puac adit tagok hu jaik 10 rabau tuai. Ong Hoàng Ngọc Linh, Phaok Chủ tịch Hiệp hội Du lịch tỉnh Bà Rịa-Vũng Tàu ndom lac, tuk dom tỉnh gah Brak klaak bruk pa-atah di gauk ye tuai mai ini meda hu rilo jang dalam dom harei anak tal. Min oh lac biak rilo kayua urang jeng daok huac jit ruak: “Tuai daok nao du lịch kayua tukvak mai tal BRVT di dom radaih hu siam tagok saong tui bruk ngak mbang yau urak ini, tuai jeng daok pilih ruah du lịch takik harei nan ye BRVT lac pilih ruah siam di abih. Di Vũng Tàu, dom hotel glaong rilo tal, hu rilo bilik, tuai jeng hu min oh tagok biak rilo”.

Amuk Trần Thị Thu Hiền, Phaok Yam ndok Sở Du lịch tỉnh Bà Rịa-Vũng Tàu kuhria mboh lac, meng ini tal harei padeih lễ 30/4, tuai mai Vũng Tàu meda hu biak rilo: “Lingik tasik di BR-VT daok biak mekre, saong tukvak ini daok lac bilan du lịch di tỉnh meng dahlau mai. Meyah jit ruak tani tanat ye meng ini tal harei padeih lễ 30/4 meda hu biak rilo tuai”.

Bruk peih ngak dom jalan piah dui tagok veik du lịch dalam tuk jit ruak Covid-19 rah tabiak srau kadau daok hu tỉnh Bà Rịa-Vũng Tàu caik hatai sangka. Ong Trần Đình Khoa, Bí thư Thành ủy Vũng Tàu brei thau, Vũng Tàu hu caga siam di abih ka bruk pacang caga jit piah ka tuai sahanang hatai me-in sambai: “Di dom hotel, labik pah ndih, tuai brei khan cambaih gah y tế, piah meyah hu bruk hagait hadei di nan ye mbuan duah saong peih bruk brei daok karei. Tal tukvak ini, Vũng Tàu hu caga siam di abih piah ka tuai hu dom harei bui sambai di Vũng Tàu hadei di Tết”.

Dom tour du lịch brei klaak, atau padeih veik tuk Tết urak ini daok hu peih ngak veik. Tỉnh Bà Rịa-Vũng Tàu daok patui bruk jak ba dom doanh nghiệp padang rilo pok dui pachreih yau ye trun yaom, alin brei dịch vụ saong hu mbaok tame dom danak dak yaih khan di gah du lịch Việt Nam piah ngak jeng prein khang bahrau ka du lịch di tỉnh/.

Urang lang: M.Phương -13/03/2021