Rilo urang ngak bruk daok gaok kan kandah dalam bruk duah blei sang danaok

10 thun daok di bal raya HCM, sa-ai Đặng Thị Phúc, urang ngak văn phòng daok ngak bruk di Quận 7 njauk pah labik daok, min oh daok hu tani tanat. Kayua lac meng yaom jien bilan labaih 10 triệu đồng yaok bilan, yaom lac kham merat patak pataom min hatai caong khin blei hu sa baoh sang sit di chung cư, jaik labik ngak bruk di sa-ai Phúc yau dak harei dak atah dhua. Tui sa-ai Phúc, yaom baoh sang di chung cư dalam bal raya HCM dak harei dak tagok, dalam tuk jien bilan di rilo urang ngak oh tui samu.

Bruk oh samu gauk gah cung - cầu ini jeng hu ndom tal tapa roh duah darak pasar taneh riya quý 3/2020 di dom doanh nghiệp di bal raya HCM. Công ty CBRE brei mboh dom dự án peih pabei dalam quý ini jeng lac pakat glaong, pabak hu 97% saong dom sang pablei hu lac 89%. Ong Đinh Minh Tuấn, Akaok Batdongsan.com.vn di bal raya HCM brei thau: Angaok blah web di doanh nghiệp, labaih 66% dom manuac urang duah blei baoh sang hu yaom lap oh ka tal 30 triệu sa m². Min, thun 2020 dom sang yaom lap pablei tabiak darak pasar lac biak takik, bo rilo meng lac sang hu yaom glaong. Kadha ini brei mboh hatai caong hu sang daok di bhap bani hu jien mek tame takik oh ka pabak hu, bo rilo meng lac duh ka bruk pablei salih: “Urak ini bruk đô thị hoá rah tabiak khang, cơ sở hạ tầng hu cak rok patagok biak samar, abih di nyu lac thun 2020 rilo hạ tầng hu peih ngak. Anak tal tuk jalan mbak nao mai nyu patagok yau jalan metro atau jalan radaih buýt tame bal raya HCM samar jang ye njauk sangka labik halei hu caong khin glaong”

Tui Gah sang danaok taneh riya bal raya HCM (HoREA), dalam 10 bilan meng akaok thun 2020, darak pasar patrun bruk pabak baoh sang “mbiah haong kadung jien” saong sang daok bhap bani rah ra. Dalam tuk nan, Sở Padang ngak TPHCM brei thau 20 danak dak ngan haong 6.722 baoh sang hu ginup kadha ieu pataom phun jien sang daok meda hu padang ngak di anak tal. Dalam nan, hu 4.876 baoh (samu 72,5%) lac sang pakat glaong; baoh sang yaom mbiah hu 1.683 baoh (samu 25%). Daok baoh sang hu yaom lap tok hu 163 baoh, samu 2,5% dalam abih tih sang daok angaok darak pasar.

HoREA brei thau, bruk padang ngak sang daok brei mboh cambaih bruk oh samu gauk gah cung – cầu angaok darak pasar, ba tal cak rok patagok kurang samu gauk, kurang khang kajap saong daok mboh labaih sang daok pakat glaong. Tui ong Lê Hoàng Châu, akaok HoREA, makna ba tal bruk oh samu gauk gah cung – cầu nan lac kayua po đầu tư gaok kan kandah dalam bruk bayar jien mek taneh padang sang; langiu di nan harak gar hành chính daok srau dhau jeng ngak ka yaom nyu tagok glaong: “Dalam tukvak tapa, yaom lac hu rilo sở, ngành di bal raya HCM hu dom salih bahrau dalam bruk ngak harak gar hành chính. Min mong rah tapa, harak gar hành chính dalam gah buh jien tame ngak, patagok danak dak padang ngak sang danaok jeng daok biak trak, biak kan kandah”

Tui jalan maong di gah doanh nghiệp, ong Lê Hữu Nghĩa, akaok Công ty Lê Thành (jabat bhian padang ngak sang daok bhap bani rah ra) ndom lac, darak pasar oh samu gauk kayua sang daok pakat glaong hu rilo, bhian lac labaih 30 triệu đồng sa m². Daok sang yaom jaik 15 triệu đồng sa m² ye kurang, dalam tuk nan, ini lac dom sang hu menuac caong blei biak rilo. Dom menuac blei baoh sang hu yaom glaong rilo meng lac piah ngak mbang oh lac piah daok. Piah langyah bruk glaong biar gah cung – cầu, ong Nghĩa mboh lac hu klau kadha njauk hu langyah: “Kasa, po buh jien tame padang ngak sang njauk rami ramik veik, duah thau cambaih darak pasar. Kadua, urang blei njauk sahneng kuhria ka nyu hadah hadai, oh njaik lac buh jien blei sang danaok tuk halei jeng hu laba. Ka klau lac jabat karja brei hu harak pathau khan brei bhap bani saong dom po đầu tư thau piah ramik veik darak pasar, ngak habar ka darak pasar cak rok patagok khang kajap”.

Lang yah bruk brei samu gauk gah cung – cầu baoh sang chung cư di bal raya HCM jeng lac langyah bruk tani tanat labik daok ka urang hu jien mek tame biar, khik hu an sinh xã hội, rik daong dak padang bal raya HCM jeng bal raya njauk daok, cak rok patagok khang kajap. Piah ngak hu bruk ini, dom jabat khik iek saong urang pal akaok bal raya HCM dalam thẩm quyền di drei, njauk hu jalan daong langyah kan kandah, tavak tave gah harak gar buh jien tame ngak, padang ngak. Gam haong nan, hu sarak pachreih dom doanh nghiệp hu mbaok tame rilo jang  bruk padang ngak dom sang daok di chung cư hu yaom pablei tabiak lagaih haong rilo bol bhap rahra./.

Urang lang: Jasi – 25/12